ސަރުކާރުން ޑޮލަރުގެ އަގު ނުއުފުލޭ ކަމަށް ދައްކަން އުޅޭ ވަރަކަށް ޑޮލަރުގެ އަގު ދާނީ އުފުލެމުން ކަމަށް އެމްޑީޕީގެ ޗެއާޕާސަން ކުރީގެ ރައީސް މުހައްމަދު ނަޝީދު މިރޭ ވިދާޅުވެއްޖެ އެވެ.
އެމްޑީޕީން ބޭއްވި "ދަތިވެއްޖެ" މުޒާހަރާގައި ނަޝީދު ވިދާޅުވީ ދެ ނޫހެއްގެ ސަބަބުން ޑޮލަރުގެ އަގު މައްޗަށްދާ ކަމަށް ސަރުކާރުން ބުނެ ހަގީގަތް އޮޅުވާލަން އެކި ވާހަކަތައް ދައްކާ ވަރަކަށް ޑޮލަރުގެ އަގު ދާނީ މައްޗަށް ކަމަށެވެ.
"ކިބުރުވެރިކަންމަތީގައި ތިއްބަވައިގެން އަނެއްކާވެސް އެ ވިދާޅުވަނީ ޑޮލަރުގެ އަގު މައްޗަށްދަނީ ދެ ނޫހެއްގައި ޝާއިއުކޮށްގެންނޭ. ހަގީގަތް އޮޅުވާލަން މަސައްކަތްކުރި މިންވަރަކަށް ޑޮލަރުގެ އަގު ދާނީ ބޮޑުވަމުން،" ނަޝީދު ވިދާޅުވި އެވެ.
ނަޝީދު ވިދާޅުވީ ސަރުކާރަށް ރާއްޖެއަށް ޑޮލަރު އިތުރުކޮށް ނުދެވޭނަމަ، އެ ޑޮލަރު ރާއްޖެއަށް ގެންނަން އެމްޑީޕީއަށް އެނގޭ ކަމަށެވެ. އެގޮތުން އެމަނިކުފާނު ވިދާޅުވީ މި ސަރުކާރަށް ފެހި ނުކުރެވުނު ސިންގްނަލްތައް އެމްޑީޕީއަށް ފެހިކުރަން އެނގޭ ކަމަށާއި މަޝްވަރާގެ މޭޒުގެ ދޮރަށް ވަޑައިގަންނަވަން އެދޭ ކަމަށެވެ.
"އަޅުގަނޑުމެން އެހެންވެގެން ދިވެހި ރައްޔިތުންގެ ޑިމޮކްރެޓިކް ޕާޓީން މި ބުނަނީ ވަޑައިގަންނަވަށޭ. ވާހަކަދައްކާށޭ. އަޅުގަނޑުމެންނަށް އެނގެއޭ އެ ފައިސާ ހޯދާނެ ގޮތް. އަޅުގަނޑުމެންގެ އެބަހުއްޓޭ، ތިބޭފުޅުން ވިދާޅުވީ ފެހި ސިގްނަލްގެ ވާހަކަ،" ނަޝީދު ވިދާޅުވި އެވެ.
"އޭގެއިން އެއްވެސް ސިގްނަލެއް ފެއްސެއް ނުވި. އަޅުގަނޑުމެންނަށް އެނގޭ އެ ފެހި ސިގްނަލް ގެންނާނެ ގޮތް. އަޅުގަނޑުމެން ފަރިތަ މި ފައިސާ ރާއްޖެއަށް ގެނައުން."
ސައީދު ރޭ ނެރުއްވި ޓިކްޓޮކް ވީޑިއޯގައި ވިދާޅުވީ ކަޅު ބާޒާރުގައި ޑޮލަރުގެ އަގުބޮޑުވުމަށް ހިތްވަރުދެނީ ނޫސްތަކުން ޖަހާ ހެޑްލައިންތަކުން ކަމަށާއި ވަކިން ހާއްސަކޮށް ރާއްޖޭގައި ވެރިކަން ކުރައްވާފައި ތިއްބެވި ބޭފުޅުންވެސް ރޭޓް ސެޓްކުރައްވަމުންދާ ކަމަށެވެ.
މީގެއިތުރުން މިދިޔަ އާދީއްތަ ދުވަހުވެސް ސައީދު ވިދާޅުވެފައިވަނީ ހެނދުނު މުޅި ގައުމު ހޭލާއިރު ދެ ނޫހެއްގެ ސުރުހީގައި ޑޮލަރުގެ ރޭޓަކީ 22ރ. އޭ ނުވަތަ 24ރ. އޭ ބުނެ ހަބަރު ފެތުރުމުން މާކެޓުން އެއަށް ރިއެކްޓްކުރާ ކަމަށެވެ.
ޑޮލަރުގެ އަގު އުފުލުމާއި ނޫސްތަކުގައި ޖަހާ ސުރުހީތަކާ މާ ބޮޑު ގުޅުމެއް އޮތް ކަމަށް ގަބޫލުނުކުރެވޭ ކަމަށް އަދަދު ނޫހާއި ސަންގު ޓީވީ ގުޅިގެން ގެނެސްދިން "ޑޮލަރު ސައްލާ" ޕެނަލް ޑިސްކަޝަންގައި މާލީ އަދި އިގުތިސޯދީ ދާއިރާގެ މާހިރުންތަކެއް ބުންޏެވެ.
ހިފެހެއްޓުމެއް ނެތި އުފުލެމުންދާ ޑޮލަރުގެ އަގު ރާއްޖޭގެ ކަޅު ބާޒާރުގައި މިވަގުތު ހުރީ 22.60ރ. އަށެވެ. އެއީ މިއީ މިއަދު ހެނދުނު ހުރި އަގަށްވުރެ 15 ލާރި ބޮޑު އަދަދެކެވެ. ކަޅު ބާޒާރުގައި މިއަދު ހެނދުނު ޑޮލަރުގެ އަގު ހުރީ 22.45ރ. އަށެވެ. މީގެ ކުރިން ދުވަހަކު ވެސް ރާއްޖޭގެ ޑޮލަރުގެ އަގު މިހައި މައްޗަކަށް ނުދެ އެވެ.
ކަޅު ބާޒާރުގައި ޑޮލަރުގެ އަގު ހުއްޓުމެއްނެތި އިންތިހާއަށް ބޮޑުވަމުންދާއިރު، ޑޮލަރު ލިބުމުގައި ވެސް ދަނީ ދަތިތައް ދިމާވަމުންނެވެ.
ޑޮލަރުގެ އަގަށް އަންނަ ބަދަލުތައް އަދަދު ނޫހުގެ ޑޮލަރު ޓްރެކަރ މެދުވެރިކޮށް ވަގުތުން ބަލާލެވޭނެ އެވެ.
