ރާއްޖޭގައި އޮތް ޑޮލަރުގެ ކަޅު ބާޒާރުގައި ރެކޯޑު މިންވަރަކަށް ޑޮލަރުގެ އަގު އުފުލިފައިވާއިރު ކުރިއަށް އޮތް 10 ދުވަހުގެ ތެރޭގައި ޑޮލަރުގެ އަގު 19ރ. އަށް ތިރިކޮށްދިނުމަށް ރައީސް މުހައްމަދު މުއިއްޒުއަށް މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ހުށަހެޅުމެއް ހުށަހަޅުއްވައިފި އެވެ.
މިއަދު އެމްޑީޕީ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ނަޝީދު ވިދާޅުވި ގޮތުގައި ޑޮލަރުގެ މައްސަލަ ހައްލުކުރުމަކީ އިގުތިސޯދީ އިލްމުގެ ތެރޭގައި ވަރަށް ސާފުކޮށް ލިޔެފައި ހުރި ކަންކަމެވެ. އެމްޑީޕީ ސަރުކާރެއްގައި އެ ރޭޓަށް ޑޮލަރުގެ އަގު ގެނެވޭނެކަމާމެދު ޝައްކު ނުކުރައްވާ ކަމަށް ނަޝީދު ވިދާޅުވި އެވެ.
"މުޒާހަރާގައި ހުށަހެޅުމެއް އެބަ ހުށަހަޅަން، ޑިމާންޑެއް އެބަކުރަން. އަޅުގަނޑުމެން މި ބުނަނީ ކުރިއަށް މިއޮތް 10 ދުވަހުގެ ތެރޭގައި ޑޮލަރުގެ އަގު 19 ރުފިޔާއަށް ތިރިކޮށްދޭށޭ، ދެން އެއް މަސްދުވަހުގެ ތެރޭގައި 17 ރުފިޔާއަށް. 17 ރުފިޔާއަކީ ޖެނުއަރީ 2024 ގައި މި ބޭފުޅުން ސަރުކާރާ ހަވާލުވިއިރުގައި އޮތް މިންވަރަށް،" ނަޝީދު ވިދާޅުވި އެވެ.
ހަފްތާއެއްގެ ތެރޭގައި 19 ރުފިޔާއަށް ޑޮަލަރު ރޭޓު ތިރިކުރުމަށް ބާޒާރަށް ދޫކުރަން ޖެހޭ ޑޮލަރުގެ މިންވަރު މަރުކަޒީ ބޭންކަށް އެނގޭނެ ކަމަށް ނަވާރަވަނަ މަޖިލީހުގެ ރައީސްކަން ކުރެއްވި ނަޝީދު ވިދާޅުވި އެވެ. ޑޮލަރު ތާށިކަމުގެ ސަބަބުން ތަކެތީގެ އަގުތަކަށް އަސަރުކުރަމުން އަންނަ ކަމަށް ވެސް ނަޝީދު ވިދާޅުވި އެވެ.
މި ހަފްތާ ފެށުނުއިރު ޑޮލަރުގެ އަގު ވަނީ 22ރ. އަށް އަރައިފަ އެވެ. މިވަގުތު ޑޮލަރެއް ގަންނަން ލިބެނީ 20.25ރ. އަށްވުރެ ބޮޑު ރޭޓެއްގަ އެވެ. ޑޮލަރުގެ އަގު ހުއްޓުމެއްނެތި އިންތިހާއަށް ބޮޑުވަމުންދާއިރު، ޑޮލަރު ލިބުމުގައިވެސް ދަނީ ދަތިތައް ދިމާވަމުންނެވެ.
މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ޑޮލަރު ވިއްކުމަށް ކަނޑައަޅާފައިވާ ރަސްމީ ރޭޓަކީ 15.42ރ. އެވެ. ކަޅު ބާޒާރުގެ މިހާރުގެ އަގަށް ބަލާއިރު، މިއީ ރަސްމީ ރޭޓަށްވުރެ 6.83ރ. ބޮޑު އަދަދެކެވެ. މިއީ އިންސައްތައިން ބަލާނަމަ ރަސްމީ ރޭޓަށްވުރެ 44.29 ޕަސެންޓުގެ ބޮޑުވުމެކެވެ.
އިގްތިސާދީ މާހިރުން ބުނާ ގޮތުގައި ޑޮލަރުގެ އަގު މިހާ ބޮޑަށް އުފުލެން ދިމާވި މައިގަނޑު ސަބަބަކީ ރާއްޖެއަށް އެތެރެކުރާ މުދަލަށް ބޭނުންވާ ޑޮލަރު ރަސްމީ ބޭންކިން ނިޒާމުގެ ތެރެއިން ލިބުން ދަތިވުމެވެ. މީގެ އިތުރުން، ބޭރުގެ ދަރަނިތައް ދެއްކުމަށްޓަކައި ދައުލަތަށް ބޮޑެތި އަދަދުތަކުން ޑޮލަރު ބޭނުންވުމަކީވެސް ކަޅު ބާޒާރުގައި ޑޮލަރަށް އޮތް ޑިމާންޑު އިންތިހާއަށް ބޮޑުވެގެން ދިޔަ ސަބަބެކެވެ.
ޑޮލަރުގެ އަގު ކޮންޓްރޯލުން ނެއްޓިގެން ދިއުމުގެ ސަބަބުން ރާއްޖޭގެ ބާޒާރުގައި މުދަލާއި ހިދުމަތުގެ އަގުތައް ވެސް ދަނީ ހަލުވިކަމާއެކު މަތިވަމުންނެވެ. މީގެ ސަބަބުން އާންމު ރައްޔިތުންގެ ދިރިއުޅުމުގެ ހަރަދުތައް ބޮޑުވެ، އިގްތިސާދީ ގޮންޖެހުންތަކާ ވަނީ ކުރިމަތިލާން ޖެހިފައެވެ.
ޑޮލަރުގެ އަގަށް އަންނަ ބަދަލުތައް އަދަދު ނޫހުގެ ޑޮލަރު ޓްރެކަރ މެދުވެރިކޮށް ވަގުތުން ބަލާލެވޭނެ އެވެ.
