ޑޮލަރު ތާށިކަން ބޮޑުވެ ރަސްމީ ރޭޓަށްވުރެ ބޮޑު އަގެއްގައި ޑޮލަރު ގަންނަން މަޖުބޫރުވުމުން ތަކެތީގެ އަގުތައް އުފުލި ދިރިއުޅުމުގެ އަގުބޮޑުވަމުން އަންނަ ކަމަށާއި އެކަމާ ދެކޮޅަށް ސަރުކާރުން އަޅަމުންދާ ފިޔަވަޅުތަކުގެ ސަބަބުން ހާލަތު އިތުރަށް ގޯސްވަމުން އަންނަ ކަމަށް މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޗެއާޕާސަން ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ޅު ބާޒާރުގައި ޑޮލަރު ވިއްކާ އަގުގެ ހަބަރުޖެހުން މަނާކުރަން ބޭރު ފައިސާއާ ބެހޭ ގާނޫނުގައި ހިމަނަން ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ވަނީ ފާސްކޮށްފަ އެވެ. އެކަމާ ދެކޮޅަށް އެތައް ބަޔަކު އަޑުއުފުލަމުން އަންނައިރު ނަޝީދު ވިދާޅުވި ގޮތުގައި އެއީ ހަބަރު ފަތުރާ ފަރާތްތަކުގެ ދޫބަންދުކުރުމަށް ގެންނަ ބަދަލެކެވެ.
"ސިޔާސަތުތަކަށް މިގޮތަށް ގެންނަ ކުއްލި ބަދަލުތަކުގެ ސަބަބުން މާކެޓުގެ އިތުބާރު ގެއްލި، ހާލަތު އިތުރަށް ގޯސްވޭ. ޑޮލަރުގެ އަގު އުފުލޭ ވާހަކަ ރިޕޯޓުކުރާ މީޑިއާތަކަށް ފިޔަވަޅު އަޅަން އެންމެ ފަހުން ގެނައި އިސްލާހަކީ ނުހަނު އަޖައިބުކުރުވަނިވި ބަދަލެއް،" ނަވާރަވަނަ މަޖިލީހުގެ ރައީސްކަން ވެސް ކުރެއްވި ނަޝީދު ވިދާޅުވި އެވެ.
ސަރުކާރުން ބޭރު ފައިސާއާ ބެހޭ ގާނޫނު ބަދަލުކުރަން ހުށަހެޅީ ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު މާރުކުރެވޭ އިހުތިޔާރު އުވާލާ، ޖުމްލަ އާމްދަނީގެ 20 ޕަސެންޓުގެ މާރުކުރަން މަޖުބޫރުކުރާ ގޮތަށް ބަދަލުކުރާށެވެ. ފައިސާގެ ގާނޫނަށް ސަރުކާރުން ގިނަ ބަދަލުތަކެއް ގެންނަމުން އަންނައިރު ރޭޓު ހިފެހެއްޓުމެއް ނެތި ދަނީ މަތިވަމުންނެވެ/
ޑޮލަރުގެ އަގު ދުވަހުން ދުވަހަށް އުފުލެމުންދާއިރު، އޭގެ ސަބަބުން ދިރިއުޅުމުގެ ހަރަދުތައްވެސް ދަނީ ބޮޑުވަމުން. މި ދަނޑިވަޅުގައި، ބޭރު ފައިސާއާ ބެހޭ ގަވާއިދުތަކާއި ގާނޫނުތަކަށް ދުވަހުން ދުވަހަށް ބަދަލުތައް ގެންނަމުންދާއިރު، ދިވެހި ސަރުކާރު އުޅެނީ ކުރާނެ ނުކުރާނެ ކަމެއް ނޭނގިގެން،" ނަޝީދު ލިޔުއްވި އެވެ.
ކަޅު ބާޒާރުގައި ޑޮލަރު ވިއްކާ އަގުގެ ހަބަރު ޖެހުން މަނާކުރަން ގާނޫނުގައި ހިމަނަން މާލިއްޔަތު ކޮމިޓީން ފާސްކުރިއިރު، ކަޅު ބާޒާރުގައި ޑޮލަރު އަގު މިއަދު ވަނީ 22.85ރ. އަށް އަރައިފަ އެވެ.
ރާއްޖޭގެ އިގްތިސާދަށް ދިމާވެފައިވާ ޑޮލަރުގެ ތާށިކަން ހައްލުކުރުމުގެ ގޮތުން، ރިސޯޓުތަކާއި ގެސްޓުހައުސްތަކުން ލިބޭ ޑޮލަރު ބޭންކުތަކަށް މާރުކުރަން މަޖުބޫރުވާ ގޮތަށް މުހައްމަދު މުއިއްޒު ވަނީ އާ ސިޔާސަތެއް ތައާރަފު ކުރައްވައިފަ އެވެ. އެ ސިޔާސަތު އިއުލާނު ކުރެއްވުމަށްފަހު ސަރުކާރުން ބުނެފައިވަނީ ޑޮލަރުގެ އަގު ދެން އިތުރަށް މައްޗަށް ނުދާނެ ކަމަށެވެ. ނަމަވެސް ބާޒާރުގެ ހަގީގީ ހާލަތު ފެންނަނީ ސަރުކާރުގެ އުންމީދުތަކާ ދެކޮޅަށެވެ.
