ރައީސް މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދުގެ ނުފޫޒުން ވަކި މީހަކަށާއި އޭނާގެ އާއިލާއަށް އެކި ގޮތްގޮތުން ދަތި ކުރަމުންދާކަމުގެ ތުހުމަތުތަކެއް އަމާޒުވެއްޖެ އެވެ.
ސާޖިދާއަށް އެ ތުހުމަތުތައް އަމާޒު ކުރީ ރައީސުލްޖުމްހޫރިއްޔާގެ އޮފީހުގައި ކުރިން މަސައްކަތް ކުރި ޒުވާން އަންހެން މުވައްޒަފެކެވެ. އެ ޒުވާނާ ސޯޝަލްމީޑިއާގައި ލިޔުނު ޕޯސްޓެއްގައި ބުނެފައި ވަނީ އޭނާގެ އާއިލާއަށް އެކި ގޮތްގޮތުން ނުފޫޒު ބޭނުންކޮށްގެން ސާޖިދާ "އަނިޔާ" ދެމުންދާ ކަމަށެވެ.
"އަޅުގަނޑު ވަރަށް އިހުލާސްތެރިކަމާއެކު ދަންނަވަން ތިބޭފުޅާ އަޅުގަނޑުގެ އާއިލާއަށް ތިކުރާ އަނިޔާ ހުއްޓާލުމަށް. ލިބިގެންވާ ނުފޫޒާއި ބާރުގެ ދަށުން އަޅުގަނޑުގެ އާއިލާ ކޮންމެ މީހަކު ވަޒީފާއަކަށްލިޔަސް ބޭރުކޮށްލަނީ ކަމަނާގެ ނުފޫޒުގެ ދަށުން،" ސާޖިދާ ޓެގުކޮށް ކޮށްފައިވާ އެ ޕޯސްޓުގައި ލިޔެފައިވެ އެވެ.
އޭނާގެ އާއިލާގެ ކޮންމެ މީހަކު ވަޒީފާއަކަށް ކުރިމަތިލި ނަމަވެސް، އޮންނަނީ ބްލެކް ލިސްޓުކޮށްފައި ކަމަށް ވެސް އެ ޕޯސްޓުގައި ބުނެފައިވެ އެވެ. އަދި، އެކަން ކޮށްފައި އޮންނަނީ ސީދާ ސާޖިދާގެ ނުފޫޒުންކަމަށް މައުލޫމާތު ލިބޭ ކަމަށް އެ ޕޯސްޓުގައި ލިޔެފައިވެ އެވެ.
"ހޮސްޕިޓަލްއަކަށްލިޔަސް، ކަރެކްޝަންއަށްލިޔަސް އަދި، އެހެންތާކަށް ލިޔަސް މި ބުނަނީ ބްލެކްލިސްޓު ކޮށްފަޔޯ ހުރީ ކަމަނާގެ [ސާޖިދާގެ] ނުފޫޒުގެ ދަށުން، އަޅުގަނޑު ވެސް މުސްލިމެއްގެ ހައިސިއްޔަތުން ތި މުސްލިމު އުޚްތާއަށް މިކަހަލަ ލާއިންސާނީ ކަންކަން ނުކުރުމަށް ދަންނަވަން،" އެ ޕޯސްޓުގައި ލިޔެފައިވެ އެވެ.
"މި ނިކަމެތި އާއިލާއަށް އާއިލާއަށް ތިކުރާ އަނިޔާ ހުއްޓާލާ."
ރައީސް އޮފީހުގައި ކުރިން މަސައްކަތްކުރި އެ މުވައްޒަފުގެ އާއިލާއަށް އެކި ގޮތްގޮތުން ދަތިކުރަމުންދާ ކަމަށް އޭނާ ބުނެފައިވާއިރު، ޖިނާއީ ކުށެއްގެ ތަހުގީގަށް ކަމަށްބުނެ އޭނާގެ ޕާސްޕޯޓު ވެސް ފުލުހުން ވަނީ ކޯޓު އަމުރެއްގެ ދަށުން ހިފަހައްޓައިފަ އެވެ.
އަދަދުއަށް އެނގިފައިވާ ގޮތުގައި އޭނާގެ ޕާސްޕޯޓު އަދި ޓްރެވެލް ޑޮކިއުމެންޓުތައް ފުލުހުން ހިފަހައްޓާފައި ވަނީ އޯގަސްޓު 27، އިން ފެށިގެން ނޮވެމްބަރު 26، ގެ ނިޔަލަށެވެ.
މި ނޫހުގެ ނޫސްވެރިން ގުޅުމުން އަދި މެސެޖު ކުރުމުން ވެސް ސަރުކާރުގެ ތަރުޖަމާނު މުހައްމަދު ހުސެއިން ޝަރީފް ޖަވާބު ނުދެއްވާތީ މި ހަބަރަށް ވެސް ސަރުކާރުގެ ކޮމެންޓެއް ލިބިފައެއް ނުވެ އެވެ.
