މާދަމާގެ ކުރިން އިންޑިއާއަށް 50 މިލިއަން ޑޮލަރުގެ ބޮންޑު ދައްކަންޖެހޭ ކަމަށާއި، އެ ފައިސާ ދެއްކުމުން އަސާސީ ކަންކަމަށް ހަރަދުކުރާ މިންވަރަށް ވެސް ސަރުކާރުގައި ފައިސާ ނުހުންނާނެ ކަމަށް ކުރީގެ ރައީސް، މުހައްމަދު ނަޝީދު ވިދާޅުވެއްޖެ އެވެ.
އެކްސްގައި ނަޝީދު ކުރެއްވި ޕޯސްޓެއްގައި ވިދާޅުވީ މާދަމާގެ ކުރިން އިންޑިއާއަށް ދައްކަންޖެހޭ ފައިސާ އަނބުރާ ދެއްކުމުން މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ޔޫސަބަލް ރިޒާވް ވަރަށް ބޮޑަށް ދަށްވާނެ ކަމަށެވެ.
"އެހެންކަުން މާދަމާއިން ފެށިގެން އެމްއެމްއޭގެ ޔޫސަބަލް ރިޒާވް ވަރަށް ބޮޑުތަނުން ދަށްވާނެ އެވެ. ކާޑަށް، ތެލަށް އަދި ބޭހަށް ދައްކާނެ ފައިސާ ސަރުކާރުގައި ނުހުންނާނެ އެވެ،" ނަޝީދުގެ ޕޯސްޓުގައި ލިޔުއްވާފައިވެ އެވެ.
މިއަދުގެ ނިޔަލަށް އިންޑިއާއަށް ދައްކައި ހަލާސްކުރަންޖެހޭ 50 މިލިއަން ޑޮލަރަކީ އިންޑިއާ ސަރުކާރު މެދުވެރިވެގެން ބަޖެޓު ސަޕޯޓުގެ ގޮތުގައި އެސްބީއައިއަށް ވިއްކާފައިވާ 150 މިލިއަން ޑޮލަރުގެ ޓީބިލުތަކަށް ދައްކަން ޖެހޭ ފައިސާގެ އެންމެ ފަހު ޕޭމަންޓެވެ.
ބޭނުންކުރެވޭ ރިޒާވު 2026
| Label | Value |
|---|---|
| ޖެނުއަރީ | 301 Million USD |
| ފެބްރުއަރީ | 337 Million USD |
| މާޗު | 409 Million USD |
| އޭޕްރިލް | 244 Million USD |
| މެއި | 260 Million USD |
| ޖޫން | 248 Million USD |
| ޖުލައި | 221 Million USD |
| އޮގަސްޓު | 200 Million USD |
މީގެ ކުރިން، ދެ ފަހަރެއްގެ މަތިން މި ސަރުކާރުން ވަނީ 100 މިލިއަން ޑޮލަރު އިންޑިއާއަށް ދައްކައިފަ އެވެ.
މާދަމާގެ ކުރިން، 50 މިލިއަން ޑޮލަރު ދިވެހި ސަރުކާރުން ދައްކަންޖެހޭއިރު، އެމްއެމްއޭއިން އިއްޔެ އާންމުކުރި އެންމެ ފަހުގެ ރިޒާވު އަދަދުތަކުން ދައްކާ ގޮތުގައި މިދިޔަ މަސް ނިމުނުއިރު ޖުމްލަ ރިޒާވުގައި ހުރީ 643.8 މިލިއަން ޑޮލަރެވެ. ނަމަވެސް، ބޭނުންކުރެވޭ ރިޒާވު ވަނީ 221.8 މިލިއަން ޑޮލަރުން 200.6 މިލިއަން ޑޮލަރަށް ތިރިވެފަ އެވެ.
ނަޝީދު އެ ވިދާޅުވާ ގޮތަށް 50 މިލިއަން ޑޮލަރު ދައްކާފައި ބޭނުންކުރެވޭ ރިޒާވުގައި ބާކީ އޮންނާނީ 150 މިލިއަން ޑޮލަރެވެ. މި އަދަދުގެ ތެރެއިން ބޭންކުތަކުގައި އިންވެސްޓުކޮށްފަ ހުރި އަދަދު އުނިކޮށްފަ، ކުރިން ހިސާބުކުރާ ގޮތަށް ބޭނުންކުރެވޭ ރިޒާވު ހިސާބުކުރާ ނަމަ ބާކީ އޮންނާނީ އެންމެ 29 މިލިއަން ޑޮލަރެވެ.
