ރަށްރަށުގެ ކޮންމެ ބިމެއް ވެސް ދައުލަތަށް ނެގޭ ގޮތަށް ލާމަރުކަޒީ ގާނޫނަށް ގެންނަން ހުށަހަޅާފައިވާ އިސްލާހު ބޭރުކޮށްލަން ގޮވާލާ އާންމުން ހުށަހެޅި ޕެޓިޝަނަށް ބޮޑު ތަރުހީބެއް ލިބިފައި އޮއްވާ ޕެޓިޝަން ގަވާއިދަށް ގެނައި އިސްލާހު ވެރިކަން ހިންގާ ޕީޕަލްސް ނެޝަނަލް ކޮންގްރެސް އިން ދިފާއުކޮށްފި އެވެ.
ޕެޓިޝަން ގަވާއިދު އިސްލާހު ކުރީ، އެއް ކަމަކަށް އެއް ފިޔަވަޅެއް އަޅަން ގޮވާލާ ހުށަހެޅޭނީ އެއް ޕެޓިޝަން ކަމަށް ބުނާ މާއްދާ ބާތިލްކޮށް، އެއް ފިޔަވަޅެއް އަޅަން ގޮވާލައި ކިތަންމެ ޕެޓިޝަނެއް ވެސް ހުށަހެޅޭ ގޮތަށެވެ.
އެގޮތަށް ގަވާއިދު ބަދަލުކުރީ، އާންމުންގެ ޕެޓިޝަނަށް ގޮންޖަހަން ވެގެން ސަރުކާރުން ހުށަހެޅި ޕެޓިޝަން މަޖިލީހުގެ ތަޅުމަށް ނުގެންގޮސް ކޮމިޓީއަށް ގެންދަން އޮޅިގެން ނިންމުމުންނެވެ. ޕީއެންސީ އިން ބޭނުންވަނީ އެ ޕާޓީގެ ޕެޓިޝަނަށް ވެސް ތަޅުމުގައި ބަހުސް ކުރަންށެވެ.
ޕެޓިޝަން ގަވާއިދަށް ގެނައި އިސްލާހު ޕީއެންސީ އިން ދިފާއު ކުރީ ރައްޔިތުންގެ ޕެޓިޝަނަށް މަޖިލީހުގައި ބަހުސް ކުރި ވަގުތެވެ. އެ ޕެޓިޝަނަށް ބަހުސް ކުރަން މަޖުބޫރުވީ 2100 އަށް ވުރެ ގިނަ ސޮއި ހަމަކުރުމުންނެވެ.
އެ ބަހުސްގެ ތެރެއިން އިދިކޮޅު އެމްޑީޕީގެ މެންބަރަކު ވިދާޅުވި އެއްޗަކަށް ރައްދު ދެއްވަމުން ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ، ޕެޓިޝަން ގަވާއިދު އިސްލާހު ކުރީ އެންމެންގެ ފައިދާއަށެވެ.
މަޖިލީހުގެ ގަވާއިދަށް ގެނައި ބަދަލުން ފުރުސަތު ލިބެނީ ހަމައެކަނި ޕީއެންސީއަކަށް ނޫން. ހަމަ ހުރިހާ ފަރާތަކަށް އިތުރު ފުރުސަތު ފަހިވެގެންދަނީ. ކުރީގަ އޮތް ގޮތުން އެއް ކަމަކަށް، އެއް ފަރާތަށްވުރެ ގިނަ ފަރާތަށް ހުށަނޭޅޭ ގޮތަށް އޮތް އޮތުން ބަދަލު ކުރީމާ، ހައްތަހާ ވެސް އަޅުގަނޑުމެން މި ބަލަނީ ރައްޔިތުންނަށް ދެވެން އޮތް ފުރުސަތު އިތުރު ކުރެވޭތޯ،" އަބްދުއްރަހީމް ވިދާޅުވި އެވެ.
އަބްދުއްރަހީމްގެ އިތުރުން، ޕެޓިޝަން ގަވާއިދު އިސްލާހު ކުރަން ހުށަހެޅި ފުނަދޫ ދާއިރާގެ މެންބަރު މުހައްމަދު މަމްދޫހު ވެސް ވަނީ އެ އިސްލާހު ދިފާއުކޮށްފަ އެވެ.
"މި ދުނިޔޭގައި މި ހިނގާ ތަފާތު ޑިމޮކްރަސީތަކުގެ ތެރޭގައި މި ހިރަ ޕާލަމެންޓަރީތަކަށް އެ ފުރުސަތު ހަގީގަތުގައި އޮވޭ. ކުރިން މި އޮންނަ ގޮތުން ވިއްޔާ އެއް މައުލޫއަކަށް ޕެޓިޝަން ހުށަހެޅީމާ ދެން އަޅުގަނޑުމެންނަށް މި އޮންނަނީ އެއާ ވިދިގެން އެއާ ގުޅުވާ ޕެޓިޝަނެއް ހުށަނޭޅޭނެ ގޮތަށް،" އޭނާ ވިދާޅުވި އެވެ.
ލާމަރުކަޒީ ގާނޫނަށް އިސްލާހު ގެންނަން ހުށަހަޅާފައި ވަނީ ތުޅާދޫ ދާއިރާގެ މެންބަރު އަބްދުލްހަންނާނު އަބޫބަކުރެވެ. އޭނާއަކީ އަމިއްލަ ގޮތުން އިންތިހާބުވެފައިވާ މެންބަރެއް ނަމަވެސް މަސައްކަތް ކުރައްވަނީ ސަރުކާރާއެކު އެވެ.
ހަންނާނު ހުށަހެޅުއްވި ބިލުގައިވާ ގޮތަށް ރައްޔިތުންގެ ބިން ދައުލަތަށް ނެގުމަކީ ލާމަރުކަޒީ ގާނޫނުގެ ދަށުން ސަރުކާރަށް މިހާރު ވެސް ލިބޭ ބާރެކެވެ. އަދި ސަރުކާރުން ޕްރޮޖެކްޓެއް ހިންގާ ނަމަ އެ ޕްރޮޖެކްޓުގެ އިދާރީ ކަންކަން ހަމަޖެއްސުމާއި ދޭންޖެހޭ ހުއްދަތައް ދިނުމަކީ ކައުންސިލުގެ މައްޗަށް މިހާރު ވެސް ގާނޫނު ލާޒިމް ކުރާ ކަމެކެވެ.
ލާމަރުކަޒީ ގާނޫނަށް ހަންނާނު މިހާރު ހުށަހަޅުއްވައިގެން އުޅޭ އިސްލާހުގެ ސަބަބުން އަންނާނެ ބަދަލަކީ، މަންޒަރުން ކައުންސިލުތައް ފޮހެވުމެވެ. ކައުންސިލުން ބިން ކަނޑައިދެން ދެން، އިދާރީ ކަންކަން ހަމަޖައްސަން ދެން ސަރުކާރުން މަޑުކުރަންޖެހޭ ކުރުން އެއިރުން ނިމުމަކަށް އަންނާނެ އެވެ. އެއިރުން، ރަށްރަށުގެ ބިންތަކާއި އެ ބިންތަކަށް އޮތް ބާރު ރަށު ރައްޔިތުންގެ ކިބައިން ހަމަ އެކީ ނިގުޅައިގަނެވުނީ އެވެ.
