ރަށްރަށުގެ ބިންތައް ސަރުކާރަށް ނެގޭ ބިލާ އެއްކޮޅަށް ސަރުކާރު އަޑީގައި އޮވެ ހުށަހެޅި ޕެޓިޝަނުގައި ސޮއިކުރަން ސަރުކާރު ހިއްސާވާ ކުންފުނިތަކުގެ މުވައްޒަފުންނަށް މަޖުބޫރުކޮށްގެން 24 ގަޑިއިރު ތެރޭގައި 7500 ސޮއި ހަމަކޮށްފި އެވެ.
ކައުންސިލްތަކުގެ އިހުތިސާސްގައި ހިމެނޭ ބިންތައް ސަރުކާރަށް ނެގޭގޮތަށް ހުށަހެޅި ބަދަލު ފާސްކުރަން ގޮވާލައި ސަރުކާރު އަޑީގައި އޮވެގެން ޕެޓިޝަނެއްގައި ސޮއިކުރުވަން ފެށީ މިދިޔަ އަންގާރަ ދުވަހުގެރޭ އެވެ. އެ ޕެޓިޝަނުގައި މިހައިތަނަށް ސޮއިކޮށްފައި ވަނީ އެންމެ 7518 މީހުންނެވެ.
ސަރުކާރު ހިއްސާވާ ކުންފުނިތަކުގެ ތެރެއިން، ހައުސިން ޑިވެލޮޕެމެންޓް ކޯޕަރޭޝަން (އެޗްޑީސީ) އާއި ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ) ގެ އިތުރުން، ފެނަކަ ކޯޕަރޭޝަން ވޭސްޓް މެނޭޖުމެންޓް ކޯޕަރޭޝަން (ވެމްކޯ) އަދި، ސްޓެލްކޯގެ މުވައްޒަފުން ވަނީ އެ ޕެޓިޝަންގައި ސޮއިކުރަން މެނޭޖުމެންޓުން މަޖުބޫރުކޮށްފައިވާކަން އަދަދު އަށް ކަށަވަރުކޮށްދީފަ އެވެ.
ސަރުކާރު އަޑީގައި އޮވެ ހުށަހަޅާ ޕެޓިޝަނުގައި ސޮއިކުރަން އެސްއޯއީތަކުގެ މުވައްޒަފުންނަށް މަޖުބޫރު
މި ޕެޓިޝަނުގައި ސޮއިނުކުރާ މީހުންނަށް ފިޔަވަޅު އަޅާނެ ކަމުގެ ބިރު ދައްކަމުންދާއިރު، މިއީ މަޖިލީހުގެ ގަވާއިދަށް ބަދަލުތަކެއް ގެނައުމަށްފަހު ސަރުކާރު އަޑީގައި އޮވެގެން ކުރިއަށްގެންދާ ކަމެކެވެ.
އެ ކުންފުނިތަކުގެ މުވައްޒަފުންނަށް އަންގާފައި ވަނީ ރޭގެ 12:00 ގެ ކުރިން ޕެޓިޝަނުގައި ސޮއިކޮށް އެކަން ވެރިންނަށް އެންގުމަށެވެ.
"ހުރިހާ އެންމެން ސޮއިކުރަން އަންގާފައި އޮތީ، އެމީހުން ބަލާ ކޮންބައެއްތޯ ސޮއިކުރަނީ، ނުކުރަނީ، ސޮއި ނުކުރާ މީހުންނަށް ފިޔަވަޅު އަޅާނެ،" މި ނޫހާ ވާހަކަދެއްކި އެޗްޑީސީގެ މުވައްޒަފަކު ބުންޏެވެ.
މަޖިލީހަށް އެ ޕެޓިޝަން ހުށަހެޅީ އެއް ކަމެއްގައި އެއް ފިޔަވަޅެއް އަޅަން ގޮވާލައި ކިތަންމެ ގިނަ ޕެޓިޝަނެއް ވެސް ހުށަހެޅޭ ގޮތަށް ރައްޔިތުންގެ މަޖިލީހުގެ ގަވާއިދު ބަދަލުކުރުމަށްފަހު އެވެ.
މިއީ ކައުންސިލްތަކުން ބަލަހައްޓާ ބިންތައް ސަރުކާރަށް ނެގޭގޮތަށް މަޖިލީހަށް ހުށަހަޅާފައިވާ ބިލު ފާސްކުރަން ގޮވާލައި ސަރުކާރު އަޑީގައި އޮވެ ހުށަހެޅި ދެވަނަ ޕެޓިޝަނެވެ.
އެ ބިލު ފާސްކުރަން ގޮވާލައި ސަރުކާރު އަޑީގައި އޮވެ ހުށަހެޅި ފުރަތަމަ ޕެޓިޝަނަށް 855 މީހުންގެ ސޮއި ހަމަވުމާއެކު، އެ ޕެޓިޝަން ހުށަހެޅި ބޭފުޅާއަށް އޮޅިގެން ވަނީ އެ ޕެޓިޝަން ކޮމިޓީއަށް ފޮނުވިފަ އެވެ. އެހެންކަމުން، ޕެޓިޝަންއަކާ ގުޅިގެން މަޖިލިސް ތަޅުމުގައި ބަހުސްކުރަން ލާޒިމުވާ މިންވަރަށް އެ ޕެޓިޝަނަށް ސޮއި ހަމަކުރުމުގެ ފުރުސަތު ވަނީ ގެއްލިފަ އެވެ.
މަޖިލިސް ގަވާއިދު ބަދަލުކުރަނީ، ސަރުކާރު އަޑީގައި އޮވެގެން ސޮއި ހަމަކުރަން ފެށި ޕެޓިޝަން އޮޅިގެން ކޮމިޓީއަށް ފޮނުވުމުން
ލާމަރުކަޒީ ގާނޫނަށް ހުށަހަޅާފައިވާ އިސްލާހަށް ތާއީދުކޮށް ސަރުކާރުގެ ބައިވެރިވުމާއެކު ތައްޔާރުކުރި ޕެޓިޝަން، މަޖިލީހުގެ ތަޅުމުގައި ބަހުސްކުރެވޭ މިންވަރަށް ސޮއި ހަމަވުމުގެ ކުރިން އޮޅިގެން ކޮމިޓީއަށް ވަނީ ފޮނުވާލައިފަ އެވެ. މަޖިލީހުގެ ގަވާއިދަށް ބަދަލުތަކެއް ގެންނަން މަސައްކަތް ކުރަނީ އިތުރު ހަމަ އެ މައްސަލައިގައި އިތުރު ޕެޓިޝަނެއް ހުށަހެޅުމަށެވެ.
އެހެން އެކަންވުމުން، މަޖިލިސް ގަވާއިދުގެ 257-1 ގެ (ޅ) އުނިކުރަން ސަރުކާރު ހިންގާ ޕީއެންސީއަށް ނިސްބަތްވާ ފުނަދޫ ދާއިރާގެ މެންބަރު، މުހައްމަދު މަމްދޫހު މަޖިލީހަށް ހުށަހެޅި އެވެ. އެ މާއްދާގައި އޮންނަނީ މައްސަލައަކާ ގުޅިގެން މަޖިލީހަށް ހުށަހަޅާފައިވާ ޕެޓިޝަނެއްގައި އެޅުމަށް ގޮވާލައިފައިވާ ފިޔަވަޅެއް އެޅުމަށް އެދި އިތުރު ޕެޓިޝަނެއް ހުށަނޭޅޭނެ ކަމަށެވެ.
އޭނާ ހުށަހެޅުއްވި ގޮތަށް މިދިޔަ އަންގާރަ ދުވަހު އޮތް މަޖިލީހުގެ ޖަލްސާގައި ވަނީ މަޖިލީހުގެ ގަވާއިދު ބަދަލުކޮށްފަ އެވެ. އެ މާއްދާ އުވައިލަން މަޖިލީހުން ފާސްކުރީ ވޯޓުގައި ބައިވެރިވެވަޑައިގެންނެވި 56 މެންބަރުންގެ ވޯޓުންނެވެ. އެ ބަދަލު ގެނައުމާ ދެކޮޅަށް ވޯޓުދެއްވީ 10 މެންބަރުންނެވެ.
ރަށްރަށުގެ ބިންތައް ސަރުކާރަށް ނެގޭ ގޮތަށް މަޖިލީހަށް ހުށަހަޅާފައިވާ ބިލު އޮތް ގޮތަށް ފާސްކުރުމަށް ގޮވާލައި މަޖިލީހަށް ޕެޓިޝަނެއް ހުށަހެޅުމުގެ މަސައްކަތް ސަރުކާރުން ފެށީ، އެ ބިލާ ދެކޮޅަށް ހުށަހެޅި ޕެޓިޝަނެއްގައި ސޮއި ހަމަކޮށް މަޖިލީހުގެ ތަޅުމާ ހަމައަށް މައްސަލަ ގޮސްފައި ވަނިކޮށެވެ. ސޯޝަލް މީޑިއާ އެކްޓިވިސްޓު މިދުއަމް ސައުދު ހުށަހެޅި ޕެޓިޝަނުގައި އޮތީ އެ ބިލަކީ ލާމަޒުކަޒީ ގާނޫނޫގެ ރޫހާ ހިލާފު ބިލެއް ކަމަށް ބުނެ އެ ބިލު އަނބުރާ ގެންދިޔުމަށް ގޮވާލައިފަ އެވެ.
