ލަންޑަން (ޖުލައި 30) - ކުޅުންތެރިއަކާ ނަސްލީ ގޮތުން ދިމާކޮށްލައިފިނަމަ މަދުވެގެން 10 މެޗުގެ ސަސްޕެންޝަނެއް ދޭ ގޮތަށް އިނގިރޭސި ފުޓްބޯލް އެސޯސިއޭޝަން (އިނގިރޭސި އެފްއޭ) އިން ގަވާއިދު އިސްލާހުކޮށްފި އެވެ.
މީގެ ކުރިން، އިނގިރޭސި އެފްއޭ އިން އަމަލުކުރަމުން އަައި ގަވާއިދުގައިވާ ގޮތުން، މި ފަދަ ނަސްލީގޮތުން ދިމާކުރުމުގެ މައްސަލަތަކަށް ކުޅުންތެރިންނަށް މަދުވެގެން އަންނަނީ، 6-12 މެޗާ ދެމެދުގެ ސަސްޕެންޝަނެކެވެ. އެ ގޮތުން، މި ސަސްޕެންޝަންތައް ދެމުން އައީ، ކުޅުންތެރިން ނިސްބަތްވާ ދަރިފަސްކޮޅަށް ބޭއިހުތިރާމް އަދާކުރުމާއި ހަމުގެ ކުލަ އަށް ނޫނީ ނިސްބަތްވާ ގައުމަށް ނޫނީ ދީނީ ގޮތުން އަދި ބޭއަދަބީކޮށް ދިމާކޮށްލާ މައްސަލަތަކުގަ އެވެ.
ނަސްލީގޮތުން ދިމާކުރުމާ ދެކޮޅަށް އަޅާ ފިޔަވަޅުތައް މިހާރަށް ވުރެން ވަރުގަދަ ކުރުމަށް އެފްއޭ އިން ނިންމީ ފާއިތުވި ސީޒަންތަކުގައި ލިބިފައިވާ ހިޔާލުތަކާއި އެކިއެކި ކަންކަމަށް ބެލުމަށް ފަހު އެވެ. އިނގިރޭސި އެފްއޭ އިން ބުނީ އެންމެ ބޮޑު ވިސްނުމެއް އޮތީ ނަސްލީ ތަފާތުކުރުމުގެ އެއްވެސް މައްސަލައެއް ދިމާނުވާނެ ފަދަ މާހައުލަަކަށް ފުޓްބޯޅަ މެޗުތައް ހެދުން ކަމަށެެވެ.
"މިދިޔަ އަހަރުތަކުގައި މި ފަދަ މައްސަލަތަކުގައި ވަރަށް ބޮޑު ކުރިއެރުންތަކެއް ހޯދިއްޖެ، އެކަަމަކު، އެހާ ހިސާބުން ނުނިންމައި، އުސޫލުތައް އިތުރަށް ހަރުދަނާ ކުރުމަކީ އަހަރެމެންގެ ޒިންމާއެއް،" އިނގިރޭސި އެފްއޭގެ ބަޔާނުގައިވެ އެވެ.
ނަސްލީ ގޮތުން ދިމާކުރާ މައްސަލަތަކުގައި، މަދުވެގެން 10 މެޗުގެ ސަސްޕެންޝަން ދެވޭނެ ހާލަތްތައް އެފްއޭ އިން ވަރަށް ރަނގަޅަށް ޓީމުތަކަށް ހިއްސާކުރާނެ އެވެ. އަދި، ބައެއް ހާލަތްތަކުގައި މި ފަދަ މައްސަލަތަކުގައި ކުޅުންތެރިޔާގެ ފަރާތުން ލިބޭ އެއްބާރުލުމާއި ކުށަށް އިއުތިރާފުވެ، މާފަށް އެދޭ ހާލަތްތަކުގައި، އެކަން ފުރިހަަމަ އަށް ބެލުމަށް ފަހު، ހަ މެޗުގެ ސަސްޕެންޝަނެއް ދެވޭނެ ހާލަތެއް އޮންނަ ގޮތަށް ވެސް އުސޫލުތެރޭގައި ހިމަނަން އިނގިރޭސި އެފްއޭ އިން ވަނީ މަޝްވަރާކޮށްފަ އެވެ.
ތަކުރާރުކޮށް ނަސްލީ ތަފާތުކުރުމުގެ ކަންކަމުގައި ބައިވެރިވާ ކުޅުންތެރިންނަށް 12 މެޗަށް ވުރެން ބޮޑު ސަސްޕެންޝަނެއް އައުމުގެ ފުރުސަތު ވެސް އޮންނާނެ ކަމަށް އެފްއޭ އިން ވަނީ ބުނެފަ އެވެ.
