ލަންޑަން (އޮގަސްޓް 12) - އިނގިރޭސި ޕްރިމިއާ ލީގުގެ ޗެމްޕިއަން، އާސެނަލުން އެ ކްލަބްގެ ޒުވާން ތަރި، މައިލްސް ލެވިސް-ސްކެލީ، މި ފަހަރުގެ ޓްރާންސްފާ މާކެޓްގައި ދޫކޮށްލަން ތައްޔާރުވެފައިވާ ކަމަށް މީޑިއާ ރިޕޯޓްތައް ބުނެފި އެވެ.
އުމުރުން 19 އަހަރުގެ ލެވިސް-ސްކެލީ އަކީ މިދިޔަ ދެ ސިޒަނަށް ބަލާއިރު، އާސެނަލް އެކަޑަމީން ޕްރޮމޯޓްވެގެން އައިސް ފުރަތަމަ ޓީމުގައި އެންމެ ގިނަ މެޗު ކުޅެފައިވާ ކުޅުންތެރިޔާ އެވެ. އެ ގޮތުން، ވާތު ބެކަކަށް ކުޅުމުގެ އިތުރުން މިޑްފީލްޑް ލައިނުގެ އެކި މަަގާމުތަކަށް ވެސް ލެވިސް-ސްކެލީ ވަނީ ކުޅެފަ އެވެ.
އެހެން ނަމަވެސް، މި ފަހަރުގެ ޓްރާންސްފާ މާކެޓްގައި އާސެނަލުން ބޮޑު އަގު ދީފައި ނިއުކާސަލް ޔުނައިޓެޑްގެ ކެޕްޓަން، ބްރޫނޯ ގިމާރޭސް ގެނެސްފައިވާއިރު، ލެވިސް-ސްކެލީ އަށް ފުރަތަމަ ޓީމުން ޖާގަ ލިބުމުގެ ދަތިކަން ކުރިއަށް ވުރެން ވަނީ ބޮޑުވެފަ އެވެ.
އެ ގޮތުން، މެދު ތެރެއަށް ކުޅޭ ކުޅުންތެރިންގެ ގޮތުގައި އާސެނަލް ސްކޮޑުގައި، ގިމާރޭސްގެ އިތުރުން، ޑެކްލަން ރައިސް، މާޓިން އޮޑެގާޑް، މާޓިން ޒުބިމެންޑީ އަަދި މިކޭލް މެރީނޯ ހުރިއިރު، ވާތުބެކަށް ކުޅުމަށް، ރިކާޑޯ ކަލަފިއޯރީ އާއި ޕިއޭރޯ ހިންކަޕިއޭ އެބަހުއްޓެވެ. ލެވިސް-ސްކެލީ ކުޅޭ ދެ މަގާމަށް ވެސް ސީނިއާ ގިނަ ކުޅުންތެރިންތަކެއް ތިބިއިރު، އޭނާގެ ޑިވެލޮޕްމަންޓާއި، އާސެނަލްގެ ޓްރާންސްފާ ބަޖެޓަށް ވިސްނައި، އެ ކްލަބުން މިހާރު ނިންމާފައިވަނީ، ރަނގަޅު އޮފާއެއް ލިބިއްޖެނަމަ ލެވިސް-ސްކެލީ ދޫކޮށްލާށެވެ.
އެ ގޮތުން، އިނގިރޭސި މީޑިއާ ރިޕޯޓްތައް ބުނާގޮތުން، އާސެނަލުން ވަނީ، ލެވިސް-ސްކެލީ އަށް ޗެލްސީ އާއި މެންޗެސްޓާ ޔުނައިޓެޑްގެ ޝައުގުވެރިކަން ހުރިތޯ ބަލަން މަސައްކަތް ފަށައިފަ އެވެ.
އިނގިރޭސި ގައުމީ ޓީމަށް ވެސް ކުޅެފައިވާ ލެވިސް-ސްކެލީ އާއި މެންޗެސްޓާ ޔުނައިޓެޑްގެ ފޯވާޑް، މާކަސް ރެޝްފޯޑް ބަދަލުކުރުމަކީ ރަނގަޅު ޑީލަކަށް ވާނެ ކަމަށް ވެސް ބައެއް މީޑިއާތަކުން. ވަނީ ރިޕޯޓްކޮށްފަ އެވެ. މިދިޔަ ސީޒަނުގައި ލޯނަކަށް ބާސެލޯނާ އަށް ކުޅުނު ރެޝްފޯޑްގެ އެއްބަސްވުން އެ ކްލަބުން ދާއިމީ ނުކުރުމުން، އޭނާ މި ވަގުތު ހުރީ ޔުނައިޓެޑްގަ އެވެ.
އާސެނަލަށް ޖުމްލަ އެކު، 75 މެޗު ކުޅެދީފައިވާ ލެވިސް-ސްކެލީ ހޯދަން، ޗެލްސީން ވެސް މަސައްކަތްކުރާނެ ކަމަށް ރިޕޯޓްތައް ބުނެ އެވެ.
