ލަންޑަން (އޮގަސްޓް 1) - ނިއުކާސަލް ޔުނައިޓެޑްގެ ކެޕްޓަން، ބްރެޒިލްގެ މިޑްފީލްޑަރު، ބްރޫނޯ ގިމާރޭސް ފަސް އަހަރުގެ ކޮންޓްރެކްޓެއްގައި، އިނގިރޭސި ޕްރިމިއާ ލީގުގެ ޗެމްޕިއަން، އާސެނަލަށް ބަދަލުވާން އެއްބަސްވުމަކަށް އަތުވެފައިވާ ކަމަށް މީޑިއާ ރިޕޯޓްތައް ބުނެފި އެވެ.
މި ފަަހަރުގެ ޓްރާންސްފާ މާކެޓް ފެށުނުތަނާހެން އާސެނަލުން ގިމާރޭސްއާ އެކު މަޝްވަރާތައް ފެށި އެވެ. އަދި، ނިއުކާސަލްއާ އެކު ފަހުން ވާހަކަތައް ކުރިއަށްގެންގޮސް، ރިޕޯޓްތައް ބުނާގޮތުން، އާސެނަލުން ގިމާރޭސް ގެންނާނީ ޖުމްލަ އެކު، 95 މިލިއަން ޑޮލަރު ދައްކާ ޑީލެއްގެ ދަށުންނެވެ.
ފްރާންސާއި އިނގިރޭސި ބައެއް ނޫސްތަކުން ރިޕޯޓްކުރާގޮތުގައި، ކުރިން ލިޔޯނަށް ކުޅުނު ގިމާރޭސް ގަންނަން އާސެނަލުން އެންމެ ފުރަތަމަ ދައްކާނީ 85 މިލިއަން ޑޮލަރެވެ. ބާކީ 10 މިލިއަން ޑޮލަރު ދޭނީ، އާސެނަލްގައި ހުރެ އޭނާ ހާސިލްކުރާ ކަންކަމަށް ބަލައިފަ އެވެ.
އުމުރުން 28 އަހަރުގެ ގިމާރޭސް، 2022 ވަނަ އަހަރު ނިއުކާސަލް އަށް ސޮއިކުރުމަށް ފަހު، ފާއިތުވި ސީޒަންތަކުގައި ވަނީ އެ ޓީމަށް މޮޅު ކުޅުމެއް ދައްކައި، ޓީމުގެ ކެޕްޓަން ބޭންޑް ވެސް ހާސިލްކޮށްފަ އެވެ. ނިއުކާސަލް އަށް 195 މެޗުން 31 ގޯލު ޖަހައިދީފައިވާ ގިމާރޭސް، އާސެނަލަށް ގެންދިއުމަށްޓަކައި، އެ ޓީމަށް ކުޅޭ ބްރެޒިލްގެ ގަބްރިއެލް މަގާޅައެސް އާއި ގަބްރިއެލް މާޓިނެލީ އަދި ގަބްރިއެލް ޖީސޫސް ވަނީ ވަރަށް ބާރުއަޅައިފަ އެވެ.
މި ފަހަރުގެ ޓްރާންސްފާ މާކެޓް ފެށުނު ފަހުން، ނިއުކާސަލްގެ މުހިންމު ގިނަ ކުޅުންތެރިންތަކެއް ވަނީ އެ ޓީމު ދޫކޮށްލައިފަ އެވެ. އެ ގޮތުން، އިނގިރޭސި ފޯވާޑް، އެންތަނީ ގޯޑަން ބާސެލޯނާ އަށް ބަދަލުވިއިރު، އިޓަލީގެ މިޑްފީލްޑަރު ސަންޑްރޯ ޓޮނާލީ ގުޅުނީ ޓޮޓެންހަމް ހޮޓްސްޕާސްއާ އެވެ. އަދި، މިހާރު އޮތްގޮތުން ގިމާރޭސް އާސެނަލަށް ސޮއިކުރާނެ އެވެ.
ގިމާރޭސް ވަނީ، އެމެރިކާ، މެކްސިކޯ އަދި ކެނަޑާގައި މި ފަހަރު ބޭއްވި ފީފާ ވޯލްޑް ކަޕްގައި ބްރެޒިލްގެ މެޗުތަކުގައި ފުރަތަމަ އެގާރައިގައި ހިމެނިގެން ވެސް އެ ޓީމަށް ކުޅެދީފަ އެވެ.
ނިއުކާސަލް ޔުނައިޓެޑަށް ފަސް އަހަރު ކޯޗުކޮށްދިން އެޑީ ހޯވް ވަނީ އެ ޓީމުގެ ކޯޗުގެ މަގާމުން އަމިއްލަ އަށް ވަކިވެފަ އެވެ. ނިއުކާސަލްއާ ހަވާލުވާނެ ކަމަށް ބެލެވެނީ، ސައުދީ ޕްރޯ ލީގުގައި މަަސައްކަތްކުރި މަތިއަސް ޔައިސްލާ އެވެ.
