ލަންޑަން (އޮގަސްޓް 3) - އެމެރިކާ، މެކްސިކޯ އަދި ކެނަޑާގައި މި ފަހަރު ބޭއްވި ފީފާ ވޯލްޑް ކަޕް ފުޓްބޯޅަ މުބާރާތުގެ ފައިނަލަށް ދަތުރުކުރި އާޖެންޓީނާގެ ސްކޮޑުގައި ހިމެނުނު މިޑްފީލްޑަރު، ވަލެންޓިން ބާކޯ، ފްރާންސްގެ ސްޓްރާސްބޯ ދޫކޮށ ހަތް އަހަރުގެ ކޮންޓްރެކްޓެއްގައި ޗެލްސީ އަށް ބަދަލުވެއްޖެ އެވެ.
އުމުރުން 21 އަހަރުގެ ބާކޯ އަކީ، މި ސީޒަނުގައި ޒަބީ އަލޮންސޯ ކޯޗުކަމާ ހަވާލުވި ޗެލްސީން، މި ފަހަރުގެ ޓްރާންސްފާ މާކެޓްގައި ގެނައި ހަ ވަނަ ކުޅުންތެރިޔާ އެވެ. ޗެލްސީން މި ފަހަރު ސޮއިކުރި ކުޅުންތެރިންނަކީ، މޯގަން ރޮޖާސް، ޑެނީ ވެލްބެކް، އެމަނުއަލް އެމެގާ، މެކްސެންސް ލަކްރޯ އަދި މާކޯ ޕަލެސްޓްރާ އެވެ.
ބާކޯ ވަނީ މީގެ ކުރިން ޕްރިމިއާ ލީގުގައި އެއް އަހަރު ހޭދަކޮށްފަ އެެވެ. ބޮކަ ޖޫނިއާސްގެ ޔޫތު ޓީމުތަކަށް ކުޅުނު ބާކޯ އެންމެ ފުރަތަމަ ޔޫރަޕްގެ ކްލަބަކަށް ބަދަލުވީ، އިނގިރޭސި ޕްރިިމިއާ ލީގުގެ ބްރައިޓަަން ހޯލްވް އެންޑް އަލްބިއަން އަށެވެ. އެ ގޮތުން، 2024 ވަނަ އަހަރު ބްރައިޓަން އަށް 10 މިލިއަން ޑޮލަރަށް ބަަދަލުވި ބާކޯ، އެ ކްލަބްގައި ހޭދަކުރީ އެންމެ އަހަރަކެވެެ.
ފްރެންޗް ލީގުގެ ސްޓްރާސްބޯ އަށް ބާކޯ ފުރަތަމަ ލޯން ޑީލެއްގައި ގުޅުމަށް ފަަހު، ފަހުން އެއްބަސްވުން ދާއިމީ ކުރީ އެވެ. ޗެލްސީން ދިގު މުއްދަތުގެ ކޮންޓްރެކްޓެއްގައި ބާކޯ ސޮއިކުރީ ކިހާ ވަރެއްގެ ޓްރާންސްފާ ފީއެއް ދައްކާފައިކަން މީޑިއާގައި ހާމަކޮށްފައިނުވި ނަމަވެސް، ރިޕޯޓްތައް ބުނާގޮތުން، އެ ފީ 20 މިލިއަން ޑޮަލަރަށް ވުރެން އިތުރެވެ.
ސްޓްރާސްބޯ އަކީ ވެސް ޗެލްސީ ހިންގާ ކޮންސޯޓިއަމް ލީޑުކުރާ އެމެރިކާގެ މަހުޖަނު ޓޮޑް ބޯލީގެ ކުންފުންޏެއް ކަމަށްވާ ކްލިއާލޭކް ކެޕިޓަލްސް އިން ހިންގާ ޓީމެކެވެ.
