ލަންޑަން (އޮގަސްޓް 5) - ހަތް މަހެއްހާ ދުވަހު ރެއާލް މެޑްރިޑްގެ ކޯޗަކަށް ހުރެފައި މަގާމުން ދުރުވާން ޖެހުމުން އެ ލިބުނު މާޔޫސްކަން މިހާރު އޭނާގެ ހިތުން ފިލައިފި ކަމަށް ޗެލްސީގެ ކޯޗުކަމާ ހަވާލުވެ ހުރި ސްޕެއިނުގެ ޒަބީ އަލޮންސޯ ބުނެފި އެވެ.
ކުރިން ބަޔާ ލެވަކޫސަަނަށް ކޯޗުކޮށްދިން އަލޮންސޯ، މިދިޔަ އަހަރުގެ މެއި މަހު ރެއާލްގެ ކޯޗުކަމާ ހަވާލުވެ، އެ މަގާމުގައި ހުރެވުނީ 233 ދުވަހެވެ. މި އަހަރުގެ ޖެނުއަރީ މަހު ރެއާލުން ނިންމީ އޭނާ ވަކިކުރާށެވެ.
ކޯޗިން ކެރިއަރު އަލުން ކުރިއަށްގެންދިއުމަށްޓަކައި، އަލޮންސޯ، ޗެލްސީގެ ކޯޗުކަމާ ހަވާލުވީ ހަތަރު އަހަރުގެ ކޮންޓްރެކްޓެއްގަ އެވެ.
"ނަސީބަކުން އަހަރެންގެ ކެރިއަރުގައި މާޔޫސްވާންޖެހޭ މާ ގިނަ ކަންތައްތަކެއް ނެތް ކުރިމަތިވެފައެއް. މާޔޫސްކަމެއް ކުރިމަތިވި (މި ފަހުން) އެކަމަކު، މިހާރު ހިތުން ފިލައިފި. މިހާރު އަމާޒުކަނޑައަޅައިގެން މި ހުރީ ދެން އޮތް ހަރުފަތަށް ދާން. އެ މަސައްކަތް ހަގީގަތުގައި ފަށައިފިން މެޑްރިޑާ ހަމައިން،" ރެއާލަށް 34 މެޗުގައި ކޯޗުކޮށްދިން އަލޮންސޯ، އެ ޓީމުގައި ހޭދަކުރި ތަޖުރިބާ އަށް އިޝާރާތްކޮށް ބުންޏެވެ.
"އަހަރެން ބޭނުންވި ގޮތަށް އެ ނުދިޔަ ކަންކަމާ ހެދި އަހަރެން އަމިއްލަ ނަފްސާ ވަރަށް ސުވާލުކުރިން. އެއީ، ކޮންކަމެއްތޯ ހަގީގަތުގައި އަހަންނަށް އިތުރަށް ރަނގަޅަށް ކުރެވޭނީ. އެންމެ ބޮޑަށް ކަންކަން ދަސްވާނީ، ބޭނުންވާ ގޮތަށް ކަންކަން ނުވާއިރު،"
ކުރިން ލިވަޕޫލަށް ކުޅުނު އަލޮންސޯ، އެނބުރި އިނގިރޭސި ފުޓްބޯޅަ އަށް މި އައީ 17 އަހަރަށް ފަހު އެވެ. ލިވަޕޫލްގެ ކޯޗުކަމާ އަލޮންސޯ ހަވާލުވާނެ ކަމަށް މީޑިއާގައި އަޑުފެތުރުނު ނަމަވެސް، އޭނާ ހަވާލުވީ ޗެލްސީއާ އެވެ.
މިދިޔަ ސީޒަނުގައި ޗެލްސީން، އިނގިރޭސި ޕްރިމިއާ ލީގުގެ 10 ވަނައިގައި ނިންމިިއިރު، އެ ޓީމަށް އެންމެ ފަހުން ލީގުގެ ގަދަ ދެ ޓީމުގެ ތެރޭގައި ހިމެނެވުނީ ވެސް 2017 ވަނަ އަހަރު އެވެ. އެއީ، އެންޓޯނިއޯ ކޮންޓޭގެ ކޯޗުކަމުގައި އެ ޓީމުން 2016-2017 ވަނަ ސީޒަނުގައި ލީގުގެ ޗެމްޕިއަންކަން ހޯދިއިރު އެވެ.
މިދިޔަ ސީޒަނުގައި ޗެލްސީން ވަނީ ދެ ކޯޗުން މަގާމުން ވަކިކޮށްފަ އެވެ. އެއީ، މިހާރު މެންޗެސްޓާ ސިޓީއާ ހަވާލުވެ އެ ހުރި އިޓަލީގެ އެންޒޯ މަރެސްކާ އާއި ސްޓްރާސްބޯގެ ކޯޗަކަށް ހުއްޓައި ގެނައި ލިއަމް ރޮސެނިއާ އެވެ.
އަލޮންސޯ ބުނީ، އޭނާ ޗެލްސީގެ ވަޒީފާއާ ހަވާލުވީ، އެ މަގާމުގައި ހުންނައިރު، އަންނާނެ ޑިމާންޑްތައް އެނގިހުރެ ކަމަށެވެ.
"ބޭރުން ބަލާއިރު ވެސް އަހަންނަށް ޗެލްސީގެ މަންޒަރު ވަރަށް ރަނގަޅަށް ފެނޭ. ޕޮޒިޓިވް ކަންތައްތައް ވެސް އެބަހުރި ދެން އަހަރެން ވިސްނަން ޖެހޭ ކަންކަން ވެސް ހުރި. އެހެންވީމަ، އެ ކަންކަމާ މެދު އަހަރެން ވިސްނައި، ހައްލު ހޯދާނަން،" އަލޮންސޯ ބުންޏެވެ.
"މިދިޔަ ސީޒަން ނިމުނުއިރު ޓީމުގެ ހާލަތު އޮތްގޮތުން ވަރަށް ގޯސްހެން ހީވިޔަސް ހަގީގަތުގައި އެ ގޮތަަކަށް ނޫން އޮތީ. އެކުގައި މަސައްކަތްކޮށްފިއްޔާ ކުރު މުއްދަތެއްގައި ވެސް ރަނގަޅުކުރެވޭނެ ކަންކަން ގިނަ،"
ފުޓްބޯޅަ ލީގުތަކުގެ ތަފާސް ހިސާބުތަކުން ދައްކާ ގޮތުގައި، 2022-2023 ވަނަ ސީޒަނުގެ ފަހުން، އަލޮންސޯ ހަވާލުވެ ހުރި ޓީމުތަކުން، އެވްރެޖްކޮށް މެޗަކަށް 2.2 ޕޮއިންޓް ހޯދާފައިވެ އެވެ. އޭނާ އަށް ވުރެން ރެކޯޑް ރަނގަޅީ ޕީއެސްޖީގެ ލުއިސް އެންރީކޭ އާއި ރެއާލް މެޑްރިޑްގައި ހުރި ކާލޯ އަންޗެލޮޓީ އެވެ. އެންރީކޭ، 2.34 ޕޮއިންޓް މެޗަކަށް ހޯދާފައިވާއިރު، އަންޗެލޮޓީ ވަނީ 2.25 މެޗަކަށް ހޯދައިފަ އެވެ.
