ލަންޑަން (އޮގަސްޓް 4) - ދެ އަހަރުގެ ކޮންޓްރެކްޓެއްގައި ޗެލްސީ އަށް ބަދަލުވާން ނިންމި އެންމެ ބޮޑު ސަބަަބަކީ އެ ކްލަބުން ލިބުނީ ދޫނުކޮށްލެވޭނެ ފުރުސަތަކަށްވާތީ ކަމަށް އިނގިރޭސި މިޑްފީލްޑަރު، ޖޯޑަން ހެންޑަސަން ބުނެފި އެވެ.
އުމުރުން 36 އަހަރުގެ ހެންޑަސަންގެ ކެރިއަރުގެ އެންމެ މުހިންމު އަހަރުތައް ހޭަދަކުރީ ލިވަޕޫލްގެ ކެޕްޓަނެއްގެ ގޮތުގަ އެވެ. އެ ގޮތުން، ތިރީސް އަަހަރަށް ފަހު ލިވަޕޫލުން އިނގިރޭސި ޕްރިމިއާ ލީގުގެ ޗެމްޕިއަންކަން ހޯދިއިރާއި ސާދަ އަހަރަށް ފަހު ޗެމްޕިއަންސް ލީގުގެ ތަށި އުފުލާލިއިރު، ކެޕްޓަނަކީ ހެންޑަސަން އެވެ. މީގެ އިތުރުން، ހެންޑަސަން ލީޑަރަކަށް ހުރެ، ލިވަޕޫލުން ޔުއެފާ ސުޕަ ކަޕާއި ފީފާ ކްލަބް ވޯލްޑް ކަޕްގެ ޗެމްޕިއަންކަން ވެސް ހޯދި އެވެ.
ލިވަޕޫލް ދޫކޮށް، 2023 ވަނަ އަހަރު ހެންޑަސަން ފުރަތަމަ ބަދަލުވީ ސައުދީ ޕްރޯ ލީގުގެ އަލް އިއްތިފާގަށެވެ. އޭގެ ފަހުން، ނެދަލެންޑްސްގެ އަޔަކްސް އަށް ވެސް ކުޅުމަށް ފަހު، މިދިޔަ ސީޒަން ފެއްޓުމުގެ ކުރިން، އެނބުރި ޕްރިމިއާ ލީގަށް އައީ ބްރެންޓްފޯޑަށެވެ. މިދިޔަ ސީޒަނުގައި ބްރެންޓްފޯޑަށް 32 މެޗު ކުޅުނު ހެންޑަސަން، އެ ޓީމުގެ އެއްބަސްވުން ނިމުމަކަށް ގެނައީ، ޗެލްސީގެ ހުށަހެޅުމެއް ލިބުމުންނެވެ.
ހެންޑަސަން ބުނީ، ޗެލްސީ އަށް ބަދަލުވުމުގައި އެ ކްލަބްގެ ކޯޗަކަށް ހުރި ލިވަޕޫލްގެ ކުރީގެ މިޑްފީލްޑަރު، ޒަބީ އަލޮންސޯ މުހިންމު ދައުރެއް އަދާކުރި ކަމަށެވެ.
"ޗެލްސީ ފަދަ ކްލަބެއްގެ ސައިޒާއި، އަލޮންސޯ ފަދަ އަހަރެން ވަރަށް އިހުތިރާމްކުރާ ކޯޗެއް ހުއްޓައި، ޗެލްސީގައި މި އޮތް ސްކޮޑު ފަދަ ވަރުގަދަ ޓީމަކާ އެކު މަސައްކަތްކުރަން ލިބޭ ފުރުސަތަކީ ދޫނުކޮށްލެވޭނެ އެއްޗެއް،" ސަންޑަލެންޑުން ކެރިއަރު ފެށި ހެންޑަސަން ބުންޏެވެ.
ހެންޑަސަން ބުނީ، ޗެލްސީގައި ހުރެ ލިބޭ ކޮންމެ ފުރުސަތެއްގެ ބޭނުން އެންމެ ރަނގަޅަށް ހިފައި، އެ ކްލަބް ދާން ބޭނުންވާ މިސްރާބުން ކުރިއަށް ގެންދިއުމަށްޓަކައި، އޭނާ އަށް ކޮށްދެވުނު ހުރިހާ ކަމެއް ކުރުމަށްޓަކައި ތައްޔާރަށް ހުރި ކަމަށެެވެ.
އެމެރިކާ، މެކްސިކޯ އަދި ކެނަޑާގައި މި ފަހަރު ކުރިއަށްދިޔަ ފީފާ ވޯލްޑް ކަޕްގެ ތިން ވަނަ އިންގްލެންޑުން ހޯދިއިރު، އެ ޓީމުގައި ވެސް ހެންޑަސަން ހިމެނެ އެވެ.
މި ފަހަރުގެ ޓްރާންސްފާގައި ޗެލްސީން ގެނައި ކުޅުންތެރިންނަށް ބަލާއިރު، ކަޒަކްސްތާންގެ ފޯވާޑް ޑަސްޓާސް ސަޓްޕައޭވް، ބްރެޒިލްގެ ވާތުބެކް ޑެނެއާ، ނެދަލެންޑްސްގެ ފޯވާޑް އެމަނުއެލް އެމެގާ، ޕޯޗުގަލްގެ ވިންގް ޖިއޮވާނީ ކުއެންޑާ، އިޓަލީގެ ވާތުބެކް މާކޯ ޕަލެސްޓްރާ، އެސްޓަން ވިލާގެ މިޑްފީލްޑަރު މޯގަން ރޮޖާސް، ސްޓްރާސްބޯގެ ވަލެންޓިން ބާކޯ، ބްރައިޓަންގެ ޑެނީ ވެލްބެކް އަދި ހެންޑަސަން ހިމެނެ އެވެ.
