މެންޗެސްޓާ (އޮގަސްޓް 8) - މެންޗެސްޓާ ސިޓީގެ ކެޕްޓަން، ރޮޑްރީގޯ (ރޮޑްރީ)، މި ފަހަރުގެ ޓްރާންސްފާ މާކެޓްގައި އެ ކްލަބް ދޫކޮށްލައިފިނަމަ، ބަދަލުގައި ގެންނަން ނިންމާފައިވަނީ ޗެލްސީގެ އާޖެންޓީނާގެ މިޑްފީލްޑަރު، އެންޒޯ ފެނާންޑޭޒް ކަމަށް މީޑިއާ ރިޕޯޓްތައް ބުނެފި އެވެ.
ފީފާ ވޯލްޑް ކަޕްގެ ޗެމްޕިއަންކަން ސްޕެއިނުން ހޯދިއިރު، މުބާރާތުގެ މޮޅު ކުޅުންތެރިޔާގެ މަގާމު ހޯދި، 30 އަހަރުގެ ރޮޑްރީ ހޯދަން ސްޕެއިނުގެ ގަދަ ދެ ބާރު ކަމަށްވާ ރެއާލް މެޑްރިޑާއި ބާސެލޯނާ އިން އަންނަނީ ވާދަކުރަމުންނެވެ. ބުރަކަށީގެ އަނިޔާ އަކަށް ފަރުވާ ހޯދަމުން އަންނަ ރޮޑްރީގެ އޭޖެންޓް ވަނީ، ބާސެލޯނާ އަކީ ރޮޑްރީ ކްލަބް ބަދަލުކުރާނަމަ އިހުތިޔާރުކުރާ ޓީމު ކަަމަށް ބުނެފަ އެވެ.
އެއާ އެކު، ބާސެލޯނާ އިން ރޮޑްރީގެ ސޮއި ހޯދަން ވަނީ 50 މިލިއަން ޑޮލަރުގެ ބިޑެއް ކޮށްފަ އެވެ. އެހެން ނަަމަވެސް، ބާސެލޯނާގެ އެ އޮފާ އަނބުރާ ފޮނުވާލުމަށް ފަހު، ސިޓީން ނިންމާފައިވަނީ އެންމެ ކުޑަ އަގެއްގައި ވެސް ރޮޑްރީ ދޫކޮށްލާނީ، 90 މިލިއަން ޑޮލަރުގެ ޑީލެއްގައި ކަމަށް ބާސެލޯނާ އަށް އަންގައިފަ އެވެ.
މީގެ ހަ އަހަރު ކުރިން ސިޓީން ރޮޑްރީގެ ސޮއި ހޯދަން އެތުލެޓިކޯ އަށް 73 މިލިއަން ޑޮލަރުގެ ފީއެއް ޖުމްލަ އެކުގައި ދެއްކި އެވެ. ކްލަބް ލެވަލްގައި ސިޓީގައި ހުރެ ހޯދޭނެ ބޮޑެތި ހުރިހާ ކާމިޔާބީއެއް ރޮޑްރީ ވަނީ ހާސިލްކޮށްފަ އެވެ. ބެލޮންޑިއޯ އެވޯޑް ވެސް ހާސިލްކޮށްފައިވާ ރޮޑްރީ ވަނީ، ސިޓީ އަށް މިހާތަނަށް ކުޅެދިން، 298 މެޗުން 28 ލަނޑު ޖަަހައި، 32 ލަނޑުޖަހަން ފުރުސަތު ތަނަވަސްކޮށްދީފަ އެވެ.
ގަތަރުގައި 2022 ވަަނަ އަހަރު ބޭއްވި ވޯލްޑް ކަޕްގެ ޗެމްޕިއަންކަން އާޖެންޓީނާ އިން ހޯދިއިރު، އެ މުބާރާތުގެ އެންމެ މޮޅު ޒުވާން ކުޅުންތެރިޔާ، އެންޒޯ، 25، އެ މުބާރާތަށް ފަހު، ދެން އައި ޓްރާންސްފާ މާކެޓްގައި، ބެންފީކާ ދޫކޮށް ޗެލްސީ އަށް ސޮއިކުރީ ބޮޑު އަގުގަ އެވެ.
އެ ގޮތުން، އެންޒޯގެ ސޮއި ހޯދަން ޗެލްސީންް 130 މިލިއަން ޑޮލަރު ދެއްކި އެވެ.
ޗެލްސީގެ މެނޭޖްމަންޓާ މިދިޔަ ސީޒަންގެ ތެެރެއިން ޖެހުނު މައްސަލައެއްގައި މި ފަަހަރުގެ ޓްރާންސްފާގައި އެންޒޯ އެ ޓީމު ދޫކޮށްލާނެ ކަމަށް އޮތީ ބެލެވިފަ އެވެ.
އެކަމަކު، ޗެލްސީގެ އާ ކޯޗު ޒަބީ އަލޮންސޯގެ ޕްލޭނުގައި އެންޒޯ އަކީ މުހިންމު ކުޅުންތެރިއެއް ކަމަށްވަނީ ބުނެފަ އެވެ.
ސިޓީން އެންޒޯ ގެންނަން އެންމެ ބޮޑަށް ބާރު އަޅަނީ، މިދިޔަ ސީޒަން ފެށިއިރު ޗެލްސީގަައި ހުރި ކޯޗު އެންޒޯ މަރެސްކާ އެވެ. މަރެސްކާ އަށް މިދިޔަ އަހަރު ފަހުކޮޅު، ޗެލްސީގެ ކޯޗުކަން ގެއްލުނުއިރު، އޭނާ ވަނީ، ޕެޕް ގާޑިއޯލާ، 10 އަހަރަށް ފަހު، ސިޓީ ދޫކޮށްލުމުން އެ ޓީމުގެ ކޯޗުގެ ޒިންމާއާ ހަވާލުވެފަ އެވެ. އިޓަލީ އަށް އުފަން މަރެސްކާ ވަނީ މީގެ ކުރިން ގާޑިއޯލާގެ އެސިސްޓަންޓް ކޯޗަކަށް ސިޓީގައި މަސައްކަތްކޮށްފަ އެވެ.
