މިހާރު ކުރިއަށްދާ ވޮލީބޯލް އެސޯސިއޭޝަން ކަޕްގެ ފިރިހެން ޑިވިޝަންގެ އެންމެ ފަހުގެ ޗެމްޕިއަން، ދިވެހި ސިފައިންގެ ކްލަބުން މި ފަހަރުގެ މުބާރާތުގައި ކުޅުނު ފުރަތަމަ މެޗުގައި، ދަޑިމަގު ސްޕޯޓްސް އެންޑް ރެކްރިއޭޝަން އަތުން އުނދަގޫ މޮޅެއް ހޯދައިފި އެވެ.
ސިފައިން ހިމެނެނީ އަށް ޓީމު ވާދަކުރާ މި ފަހަރުގެ ވީއޭއެމް ކަޕްގެ ގްރޫޕް ބީގަ އެެެވެ. އިއްޔެ، ހަވީރު އެ ޓީމުން ކުޅުނު މެޗުގައި، ދަޑިމަގު އަތުން މޮޅުވީ 3-2 ސެޓުންނެވެ. އަދި، މި ގްރޫޕްގައި ރޭ ކުޅުނު މެޗުން، ކްލަބް އެމްޓީސީސީން ވަނީ ސީދާ ތިން ސެޓުން ސަން ސްޕޯޓްސް ކްލަބް ބަލިކޮށްފަ އެވެ.
ޒުވާނުންގެ މަރުކަޒު އެތެރެ ކޯޓުގައި އިއްޔެ ކުޅުނު މެޗުގެ ފުރަތަމަ ދެ ސެޓު ދަޑިމަގުން ވަނީ 21-25، 23-25 އިން ގެންގޮސްފަ އެވެ.
ފުރަތަމަ ދެ ސެޓު ގެއްލުމާ އެކު، ބްރެޒިލްގެ ކުޅުންތެރިޔާ، ޕެރޯޓޯ އާއި ގަައުމީ ޓީމުގެ އާދަމް ނަސީމް (އެޑަމް) އަދި އަހުމަދު ފައިރޫޒް ހިމެނޭ ސިފައިންގެ ޓީމުން ދެން ކުޅުނު ތިން ސެޓަށް ނުކުމެ ތަފާތު ހިތްވަރެއް ދެއްކި އެވެ. އަދި، މި ސެޓުތައް ގެންގޮސްގެން މެޗުން މޮޅުވި އެވެ. ސިފައިންގެ ޓީމުން މި ސެޓުތައް ގެންދިޔައީ، 25-22، 25-11 އަދި 15-07 އިންނެވެ.
ގައުމީ ވޮލީ ޓީމުގެ ކުރީގެ ކެޕްޓަން، އިޝާން މުހައްމަދު (ބަޓިސް)ގެ ކެޕްޓަންކަމުގައި ކުޅޭ އެމްޓީސީސީން ރޭގެ މެޗުގެ ސެޓުތައް ގެންދިޔައީ، 25-18، 25-17 އަދި 25-20 އިންނެވެ.
މިދިޔަ އަހަރުގެ ވޮލީބޯލް އެސޯސިއޭޝަން ކަޕް ފައިނަލުގައި، ކްލަބް އެޗްޑީސީ ބަލިކޮށް ތަށި އުފުލާލީ ސިފައިންގެ ކްލަބުންނެވެ.
މުބާރާތުގައި މިއަދު އޮތީ ގްރޫޕް އޭގެ ދެ މެޗެވެ.
މިއަދު ހަވީރު ކުޅޭ މެޗުގައި ބައްދަލުކުރާނީ ފުރަތަމަ ދެ މެޗުން ބަލިވި، ޕޮލިސް ކްލަބާއި ޔުނައިޓެޑް ހެންވޭރިއަންސް އެވެ. އަދި، މިރޭ ކުޅޭ މެޗުގައި ބައްދަލުކުރާނީ ފުރަތަމަ މެޗުތަކުން މޮޅުވި، ކްލަބް އެޗްޑީސީ އާއި ލަޔަންސް ސްޕޯޓްސް ކްލަބް އެވެ. ލަޔަންސް އިން ފުރަތަމަ މެޗުގައި ޔުނައިޓެޑް ހެންވޭރިއަންސް ބަލިކުރިއިރު، އެޗްޑީސީން ވަނީ ޕޮލިސްގެ މައްޗަށް ކުރިހޯދައިފަ އެވެ.
މުބާރާތުގެ ގްރޫޕް ސްޓޭޖު މެޗުތައް އަންނަ ހަފްތާގެ ހޯމަ ދުވަހުގެ ނިޔަލަށް ކުރިއަށްދާއިރު، ސެމީ ފައިނަލް ކުޅެން ނިންމާފައި އޮތީ އަންނަ ހަފްތާގެ ބުދަ ދުވަހު އެވެ. ތިން ވަނަ ހޮވާ މެޗާއި ފައިނަލް މެޗު އޮތީ އަންނަ ހަފްތާގެ ބުރާސްފަތި ދުވަހު އެވެ.
ސޯޝަލް ސެންޓަރުގައި ކުރިއަށްދާ މި ފަހަރުގެ މުބާރާތުގެ މެޗުތައް ބަލަން ސަޕޯޓަރުން ޓިކެޓް ގަންނަން ޖެހެ އެވެ. ވޮލީބޯލް އެސޯސިއޭޝަނުން ހަަމަަޖައްސާފައިވާ ޓިކެޓްގެ އަގަކީ، 30 ރުފިޔާ އެވެ.
