ވޮލީބޯލް އެސޯސިއޭޝަން ކަޕް (ވީއޭއެމް ކަޕް)ގެ ފިރިހެެން ޑިވިޝަންގެ ކުޅުން އިއްޔެ ފެށުނުއިރު، ފުރަތަމަ މެޗުތަކުން، ކްލަބް އެޗްޑީސީ އާއި ލަޔަންސް ރެކްރިއޭޝަން ކްލަބް މޮޅުވެއްޖެ އެވެ.
ޖުމްލަ އެކު އަށް ޓީމާ އެކު ކުރިއަށްދާ ވީއޭއެމް ކަޕްގެ މެޗުތައް ކުޅެނީ ޒުވާނުންގެ މަރުކަޒު އެތެރެ ކޯޓުގަ އެވެ. މުބާރާތުގެ ފުރަތަމަ ދުވަހު ކުރިއަށްދިޔައީ، ގްރޫޕް އޭގެ މެޗުތަކެވެ.
އެ ގޮތުން، އިއްޔެ ހަވީރު ކުޅުނު ފުރަތަމަ މެޗުގައި، ޔުނައިޓެޑް ހެންވޭރިއަންސްއާ ބައްދަލުކުރީ ލަޔަންސް އެވެ. އަދި، ރޭ ކުޅުނު މެޗުގައި، އެޗްޑީސީން ވާދަކުރީ ޕޮލިސް ކްލަބްއާ އެވެ.
ވަރުގަދަ ސްކޮޑަކާ އެކު މުބާރާތަށް ނުކުތް ލަޔަންސް އިން ޔުނައިޓެޑް ހެންވޭރިއަންސް އަތުން މޮޅުވީ ފަސޭހަކަމާ އެކު، ސީދާ ތިން ސެޓުންނެވެ. މެޗުގެ ސެޓުތައް ލަޔަންސް އިން ގެންދިޔައީ، 25-16، 25-18 އަދި 25-18 އިންނެވެ. ލަޔަންސް ޓީމު ކުޅެމުން އަންނަނީ، ގައުމީ ވޮލީބޯޅަ ޓީމުގެ ކުރީގެ ކެޕްޓަން، އަލީ ހުޒާމް (ހުޒަންޓެ)ގެ ކެޕްޓަންކަމުގަ އެވެ. އެ ޓީމުގައި ތަޖުރިބާކާރު ކުޅުންތެރިންނާއި ޒުވާން ކުޅުންތެރިން ވެސް ހިމެނޭއިރު، ޓީމުގެ ކޯޗަކީ އަޝްރަފް އަލީ (އަޝްރާ) އެވެ.
އިސްމާއިލް ސާޖިދު (ކުޑަކާއްޓެ)ގެ ކެޕްޓަންކަމުގައި ކުޅޭ އެޗްޑީސީން ވަނީ ރޭ 3-0 ސެޓުން ޕޮލިހުންގެ މައްޗަށް ކުރިހޯދައިފަ އެވެ. ހަސަން ނިލާމް (ޕާޓޭ) އާއި ޝަމާއިލް ހުސެއިން ވެސް ހިމެނޭ އެޗްޑީސީ މި ފަހަރު ވަރުގަދަ ސްކޮޑަކާ އެކު މުބާރާތަށް ނުކުތްއިރު، ރޭގެ މެޗުގައި އެ ޓީމުން ސެޓުތައް ގެންދިޔައީ، 25-20، 25-23 އަދި 25-23 އިންނެވެ.
މުބާރާތުގައި މިއަދު އޮތީ ގްރޫޕް ބީގެ މެޗުތަކެވެ.
މިއަދު ހަވީރު، 16:00 ގައި ފަށާ މެޗުގައި ދިވެހި ސިފައިންގެ ކްލަބުން ކުޅޭނީ ދަޑިމަގު ސްޕޯޓްސް އެންޑް ރެކްރިއޭޝަން ކްލަބާ އެވެ. އަދި، މިރޭ، 20:30 ގައި ފަށާ މެޗުގައި، ކްލަބް އެމްޓީސީސީން ވާދަކުރާނީ ސަން ސްޕޯޓްސް ކްލަބާ އެވެ.
މުބާރާތުގެ ގްރޫޕް ސްޓޭޖު މެޗުތައް އަންނަ ހަފްތާގެ ހޯމަ ދުވަހުގެ ނިޔަލަށް ކުރިއަށްދާއިރު، ސެމީ ފައިނަލް ކުޅެން ނިންމާފައި އޮތީ އަންނަ ހަފްތާގެ ބުދަ ދުވަހު އެވެ. ތިން ވަނަ ހޮވާ މެޗާއި ފައިނަލް މެޗު އޮތީ އަންނަ ހަފްތާގެ ބުރާސްފަތި ދުވަހު އެވެ.
މިދިޔަ އަހަރުގެ ފައިނަލުގައި، ކްލަބް އެޗްޑީސީ ބަލިކޮށް ތަށި އުފުލާލީ ސިފައިންގެ ކްލަބުންނެވެ.
ސޯޝަލް ސެންޓަރުގައި ކުރިއަށްދާ މި މުބާރާތުގެ މެޗުތައް ބަލަން ސަޕޯޓަރުން ޓިކެޓް ގަންނަން ޖެހެ އެވެ. ވޮލީބޯލް އެސޯސިއޭޝަނުން ހަަމަަޖައްސާފައިވާ ޓިކެޓްގެ އަގަކީ، 30 ރުފިޔާ އެވެ.
