ރާއްޖޭގައި މަސައްކަތްކުރާ މީހުންގެ ތެރެއިން ޑޮލަރުން މުސާރަ ލިބެ ފަރާތްތަކުން ކަޅު ބާޒާރުަގައި ޑޮލަރު މާރުކުރާ ކަމަށާއި ރާއްޖޭގައި ކުރާ ހުރިހާ މުއާމަލާތްތަކެއް ދިވެހި ފައިސާއިން ކުރާ ގޮތަށް ބަދަލުކުރުމަށްޓަކައި ޑޮލަރުން މުސާރަ ދިނުމުގެ ކަންކަން މަނާކުރުމަށް ބަދަލުތަކެއް ގެނައުމުގެ އިޝާރާތެއް ގަވަރުނަރު އަހުމަދު މުނައްވަރު ދެއްވައިފި އެވެ،
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން މުނައްވަރު ވަނީ މާލީ މުއާމަލާތްތައް ދިވެހި ފައިސާއިން ކުރާ ގޮތަށް ބަދަލުތަކެއް ގެނައުމެއް ނިންމަވާފައިވާކަން ހާމަކުރައްވާފަ އެވެ. ރާއްޖޭގައި ޑޮލަރުން ބައިވަރު މާލީ މުއާމަލާތް ކުރާ ކަމަށް އެމްއެމްއޭއިން ބޭނުންވަނީ 2030 ވަނަ އަހަރާ ހަމައަށް މި ބަދަލުތައް ގެނައުން ކަމަށް މުނައްވަރު ވިދާޅުވި އެވެ.
"މުސާރަތައް ވެސް މިހާރު އެ ދެއްވަނީ، މިސާލަކަށް ޓީއެމްްއޭއިން ބެލިކަމުގައި ވިޔަސް، އެގޮތަށް ރިސޯޓުތަކަށް ބެލިކަމުގައިވިޔަސް ޑޮލަރުން އިނގޭތޯ، އެހެންވީމާ މި ޑޮލަރުން މުސާރަ ދިނުމުގެ ކަންތައްތަކަށް ވެސް ބަދަލުތަކެއް އަންނަން ޖެހޭނެ. އޭރުން ހަގީގަތުގައި ދިވެހި ރުފިޔާއަށް އޮންނަ ޑިމާންްޑު އިތުރުވެގެންދާނީ،" މުނައްވަރު ވިދާޅުވި އެވެ.
މިހާރު ފަތުރުވެރިކަމުގެ ދާއިރާއިން ސަރުކާރަަށް ބިމު ކުލީގެ ގޮތުގައި ދައްކަން ޖެހޭ ފައިސާ ބޭރު ފައިސާއިން ދައްކާ ކަމަށާއި އެއީ ވެސް ބަދަލުކުރަން ޖެހޭ ކަމެއް ކަމަށް މުނައްވަރު ވިދާޅުވި އެވެ. ރާއްޖޭގައި މިވަގުތު ބޭރު ފައިސާ ބޭނުންކުރާ މިންވަރު ހުރީ 40 ޕަސެންޓަށްވުރެ މަތީގައި ކަމަށް މުނައްވަރު ވިދާޅުވި އެވެ.
"މެކްރޯ ބަދަލުތަކެއް ވެސް ގެންނަން ޖެހޭނެ. އެގޮތަށް ބަޖެޓުގެ ސިޔާސަތަށް ވެސް ސްޓެބިލައިޒޭޝަނަށް އަންނަން ޖެހޭނެ. އަޅުގަނޑުމެންގެ ވިޝަންއަކީ ރާއްޖޭގައި އޮންނަން ޖެހޭނީ މޭނޭޖްޑް-ފްލޯޓެއް [އެކްސްޗޭންޖު ރޭޓެއް] ކަހަލަ ގޮތަކަށޭ. މޭނެޖްޑް ފްލޯޓަކަށް ދާއިރު ވެސް އެމްއެމްއޭގެ ރިޒާވެއް ހުންނަން ޖެހޭ،" މުނައްވަރު ވިދާޅުވި އެވެ.
ބޭރު ފައިސާއިން ކުރާ މުއާމަލާތްތައް މޮނީޓާ ކުރުމަށް އިތުރު ފިޔަވަޅުތަކެއް އަޅަން ނިންމާފައިވާ ކަމަށް ވެސް ގަވަރުނަރު މިއަދު ހާމަކުރެއްވި އެވެ.
"މިހާރު އާމްދަނީ ލިބޭ ކަމުގައިވާނަމަ އެ ބޭފުޅުންނަށް އަގުކުރެވޭ، ޕޭމަންޓުގެ ގޮތުގައި އެބަ ދެއްކޭ ބޭރު ފައިސާއިން ވެސް. އެކަމު ބޭރު ފައިސާއިން ދެއްކި ކަމުގައިވިޔަސް އަޅުގަނޑުމެންނަށް އެނގެން އެބަ ޖެހޭ ކޮން ކަމަކަށްތޯ އެ ލިބޭ އާމްދަނީ އެ ބޭފުޅުން ހޭދަކުރަމުންދަނީ،" މުނައްވަރު ވިދާޅުވި އެވެ.
އެއީ ޑޮލަރުން އާމްދަނީ ލިބޭ މީހުން ކަޅު ބާޒާރުގައި ޑޮލަރު މާރުކޮށް އާމްދަނީ ހޯދާތީ ކަމަށް މުނައްވަރު ވިދާޅުވި އެވެ. ސަރުކާރުން ބޭއްވި މި ނޫސްވެރިންގެ ބައްދަލުވުމުގައި ވަނީ ޑޮލަރުން އާމްދަނީ ލިބޭ ފަރާތްތައް ވަރަށް ބޮޑަށް ކުށްވެރި ކުރައްވައި ވާހަކަ ދައްކަވައިފަ އެވެ.
"އަޅުގަނޑުމެންނަށް ފާހަގަކުރެވެނީ ޑޮލަރުން އާމްދަނީ ލިބޭ ފަރާތްތައް ބްލެކް މާކެޓުގައި އެ ޑޮލަރު ވިއްކާ ކަމަށް. އަޅުގަނޑުމެންނަށް މޮނީިޓާ ކުރެވޭނީ ތަފާސްހިސާބު ލިބިގެންތާ. އެހެންވެ އެ އިސްލާހު ވެސް އަޅުގަނޑުމެން މި ގެންނަނީ،" މުނައްވަރު ވިދާޅުވި އެވެ.
ރާއްޖޭގައި މަސައްކަތްކުރާ ގިނަ ބިދޭސީންނަށް މުސާރައިގެ ގޮތުގައި ފައިސާ ލިބެނީ ޑޮލަރުންނެވެ. އޭގެ އިތުރުން ރިސޯޓުތަކާއި ބައެއް ކުންފުނިތަކުގައި މަސައްކަތް ކުރާ ދިވެހިންނަށް ވެސް ޑޮލަރުން މުސާރަ ލިބެ އެވެ.
