ބޭރު ފައިސާ މާރުކުރުމުގެ ގާނޫނުގެ ދަށުން ބޭންކުތަކަށް ޑޮލަރު މާރުކުރަން ޖެހޭ ހުރިހާ ވިޔަފާރިތަކުން އަހަރު ފެށުމުގެ ކުރިން، އެ ވިޔަފާރިއަކުން ބޭރު ފައިސާއިން ކުރަން މުދަލާއި ހިދުމަތްތައް ހޯދުމަށް ކުރަން ބޭނުންވާ ހަރަދުތައް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް ހުށަހަޅަން ޖެހޭ ގޮތަށް ގަވާއިދު ބަދަލުކޮށްފި އެވެ.
ބޭރު ފައިސާއާ ބެހޭގެ އާންމު ގަވާއިދަށް ގެނައި ބަދަލުތަކުގެ ދަށުން، މި ގޮތަށް ބަޖެޓު ތައްޔާރުކޮށްފައި ހުށަހަޅަން ޖެހޭނީ ބޭރު ފައިސާ މާރުކުރަން ޖެހޭ ރިސޯޓުތަކާއި ގެސްޓްހައުސްތަކާއި ސަފާރީތަކުގެ އިތުރުން އަހަރެއްގެ ތެރޭގައި 25 މިލިއަން ޑޮލަރަށް ވުރެ ބޮޑު އާމްދަނީއެއް ބޭރު ފައިސާއިން ލިބޭ ވިޔަފާރިތަކުންނެވެ.
އެމްއެމްއޭއިން މި ގޮތަށް ބަޖެޓު ހުށަހަޅަން އަންގާފައި ވަނީ ވިޔަފާރިތަކުން ބޭރު ފައިސާއިން ކުރަން ޖެހޭ ހަރަދުތައް ކުރަން އޮތޯރިޓީގެ ހުއްދަ ހޯދުމުގެ ގޮތުންނެވެ. މިއީ މި ފަހުން ގާނޫނު ބަދަލުކުރިއިރު، ހިމަނާފައިވާ ކަމެކެވެ. އެމްއެމްއޭގެ ހުއްދަ ނުހޯދައި މި މުއާމަލާތްތައް ކުރުމަކީ މަނާ ކަމެކެވެ.
ގާނޫނުގައި މިހާރު އޮންނަނީ ބޭރު ފައިސާއިން އާމްދަނީ ލިބޭ ވިޔަފާރިއަކުން ގަންނަ މުދަލާއި ހޯދާ ހިދުމަތުގެ އަގު، ބޭރު ފައިސާއިން އަދާކުރުމަށް އެ ވިޔަފާރިއަކުން ބޭނުންވާނަމަ އެމްއެމްއޭގެ ހުއްދަ ހޯދަން ޖެހޭނެ ކަމަށެވެ.
މި ހުއްދަ ހޯދުމުގެ ގޮތުން، އެމްއެމްއޭއިން ވަނީ ވިޔަފާރިތަކުން އެ ތަނެއްގެ އަހަރީ ބަޖެޓުގައި މުދަލާއި ހިދުމަތް ހޯދުމަށް ބޭރު ހަރަދުކުރާނެ ކަމަށް ބަޖެޓުކޮށްފައިވާ އަދަދު އަހަރު ފެށުމުގެ 30 ދުވަސް ކުރިން ހުށަހަޅަން އަންގާފަ އެވެ. މި ހަރަދުތަކުގެ ބޭރުން އަހަރުގެ ތެރޭގައި އެހެން ހަރަދެއް ކޮންމެހެން ކުރަން ޖެހިއްޖެ ހާލަތެއްގައި އެ ހަރަދު ކުރަން ވެސް އެމްއެމްއޭގެ ހުއްދަ ހޯދަން ޖެހެ އެވެ.
އަންނަ އަހަރުގެ ކުރާ ހަރަދުތައް ހުށަހެޅުމުގެ އިތުރުން، މިއަދުން ފެށިގެން މި އަހަރުގެ ބާކީ އޮތް ދުވަސްތަކުގެ ތެރޭގައި ބޭރު ފައިސާއިން ކުރަން ޖެހޭ ހަރަދުތައް ވެސް ކުރިއަށް އޮތް 14 ދުވަހުގެ ތެރޭގައި އެމްއެމްއޭއަށް ހުށަހަޅަން ޖެހެ އެވެ.
އެމްއެމްއޭއަށް ލިބޭ ބާރުތަކުގެ ތެރޭގައި އެ ހަރަދުތައް ކުރަން ވިޔަފާރިތަކަށް ހުއްދަ ނުދިނުން ހިމެނެ އެވެ. މިހެން ނިންމާ ހާލަތުގައި، އެކަމުގެ ސަބަބު ބަޔާންކޮށް، ލިޔުމުން ޖަވާބު ދޭން ޖެހެ އެވެ.
އޭގެ އިތުރުން އަހަރުގެ ފުރަތަމަ ހަ މަ ބޭރު ފައިސާއިން ހުށަހަޅާފައިވާ އަދި އަދާކޮށްފައިވާ އިލްތިޒާމުތަކާއި މުއާމަލާތްތައް، އެމްއެމްއޭއިން އަންގާފައިވާ ގޮތަށް، ކޮންމެ އަހަރެއްގެ ޖުލައި 28 ގެ ކުރިން ހުށަހަޅަން ޖެހެ އެވެ. އަދި އަހަރުގެ ފަހު ހަ މަސް ދުވަހުގެ މައުލޫމާތު، ޖެހިގެން އަންނަ އަހަރުގެ ޖެނުއަރީ 28 ގެ ކުރިން ހުށަހަޅަން ޖެހެ އެވެ.
ހަރަދު ކުރަން ހުއްދަ ހޯދަން ޖެހުނަސް، އެމްއެމްއޭއިން ވަނީ، މުދަލެއް ނޫނީ ހިދުމަތެއްގެ އަގު ބޭރު ފައިސާއިން ބަލައިގަންނަން ހުރަހެއް ނެތް ކަމަށް ގަވާއިދުގައި ކަނޑައަޅާފަ އެވެ.
އެޑިޓަރުގެ ނޯޓު: މި ހަބަރު ކުރިން ޝާއިއުކުރިއިރު، މުސާރަތައް ދޭން ހުއްދަ ނަގަން ޖެހޭނެ ކަމަށް ލިޔެފައިވަނީ ލިޔުންތެރިޔާގެ ކުށަކުންނެވެ. ވީމާ މިކަމަށް ޓަކައި ކިޔުންތެރިންގެ ކިބައިން މައާފަަށް އެދެމެވެ.
