މަޔޯކާ، ސްޕެއިން (މެއި 21) - އަތުގެ ކުޑަހުޅަށް ލިބިފައިވާ އަނިޔާއާ ހެދި ސްޕެއިނުގެ އެއް ވަނަ ކުޅުންތެރިޔާ، ކާލޯސް އަލްކަރާޒަށް މި އަހަރުގެ ތިން ވަނަ ގްރޭންޑް ސްލޭމް ޓެނިސް މުބާރާތް، ވިމްބަލްޑަންގައި ވެސް ނުކުޅެވޭނެ ކަމަށް ބުނެފި އެވެ.
އުމުރުން 23 އަހަރުގެ އަލްކަރާޒްގެ އަތުގެ ކުޑަހުޅަށް އަނިޔާގެ މި މަައްސަލަ ދިމާވީ، މިދިޔަ އޭޕްރީލް މަހު، ބާސެލޯނާ އޯޕަންގެ ފުރަތަމަ ބުރުގައި ފިންލެންޑްގެ އޮޓޯ ވާޓަނެން އަތުން މޮޅުވި މެޗުގަ އެވެ. އެ ހިސާބުން އެ މުބާރާތުން ވަކިވި އަލްކަރާޒަށް އޭގެ ފަހުން އަދި ކުޅުމަށް އެނބުރި އާދެވޭ ގޮތެއްނުވި އެވެ.
އެ ގޮތުން، އަލްކަރާޒަށް ގެއްލުނު މުބާރާތްތަކުގެ ތެރޭގައި، މެޑްރިޑް އޯޕަން އާއި މޮންޓެ ކާލޯ އަދި އިޓާލިއަން އޯޕަން ވެސް ވަނީ ގެއްލިފަ އެވެ. އަދި، މި މަހު ފަށާ ފްރެންޗް އޯޕަން މުބާރާތުގައި ވެސް އަލްކަރާޒް ނުފެންނައިރު، އިންސްޓަގްރާމްގައި ކުރި ޕޯސްޓެއްގައި، އަލްކަރާޒް ބުނެފައިވަނީ، އަންނަ މަހު ފަށާ ވިމްބަލްޑަން އަށް ވެސް އޭނާ ފިޓްނުވާނެ ކަމަށެވެ.
ފްރެންޗް އޯޕަންގެ އެންމެ ފަހުން ދެ އަހަރުގެ ޗެމްޕިއަން އަލްކަރާޒް ބުނީ، އަތުގެ ކުޑަހުޅަށް ލިބިފައިވާ އަނިޔާގެ ރިކަވަރީގެ ކަންކަން ދަނީ ރަނގަޅަށް ކަމަށެވެ. އެކަމަކު، ވިމްބަލްޑަންގައި ކުޅެވޭ ވަރަށް ފިޓްނުވާނެ ކަމަށް އަލްކަރާޒް ވަނީ ބުނެފަ އެވެ.
"މެޗުތައް ކުޅެވޭ ވަރަށް އަދި އަހަރެން ތައްޔާރެއް ނޫން، އެހެންވެ، އަހަރެން ވިމްބަލްޑަންގައި ވެސް ބައިވެރިނުވާން ނިންމައިފިން. ގްރާސް ކޯޓަކީ އަހަރެން ވަރަށް ޝައުގުވެރިވާ ސީޒަނެއް. އެކަމަކު، މި ފަހަރު ކުއީންސް އާއި ވިމްބަލްޑަންގައި ވެސް އަހަރެން ނުފެންނާނެ،" ވިމްބަލްޑަންގެ ޗެމްޕިއަންކަން ދެ ފަހަރު ހޯދާފައިވާ އަލްކަރާޒް ބުންޏެވެ.
އަލްކަރާޒް މި ފަހަރުގެ ޓެނިސް ސީޒަން ފެށީ ވަރަށް ރަނގަޅަށެވެ. އެ ގޮތުން، އަހަރުގެ ފުރަތަމަ ގްރޭންޑް ސްލޭމް ކަމަށްވާ އޮސްޓްރޭލިއަން އޯޕަން ކާމިޔާބުކޮށް، "ކެރިއާ ސްލޭމް" ފުރިހަމަ ކުރި އެވެ. އެއީ، މިހާތަނަށް އަލްކަރާޒަށް ނުލިބި އޮތް ފަހު ގްރޭންޑް ސްލޭމްގެ ތަށި އުފުލާލައިގެންނެވެ.
މިދިޔަ މަހު ދުނިޔޭގެ ރޭންކިންގައި އަލްކަރާޒް ފަހަަތަށް ޖައްސާލުމަށް ފަހު، އިޓަލީގެ ޖަނިކް ސިނާ، އެއް ވަނަ އަށް އެރިއިރު، އަލްކަރާޒް، އަނިޔާގައި މި ހުރި މުއްދަތުގައި ސިނާ އަންނަނީ ގިނަ ރޭންކިން ޕޮއިންޓްތަކެއް ހޯދައި، އެއް ވަނައިގައި ޕޮއިންޓުގެ ފަރަގު ބޮޑުކުރަމުންނެވެ.
ރިޕޯޓްތައް ބުނާގޮތުން، ޖުލައި މަސް ތެރޭގައި އަލްކަރާޒަށް އެނބުރި ކުޅުމަށް އާދެވޭނެ އެވެ.
