ރޯމް (މެއި 6) - ޓެނިހުގެ ގްރޭންޑް ސްލޭމް މުބާރާތްތަކުގައި އެކަށީގެންވާ މިންގަނޑެއްގެ ތެރެއިން އިނާމް ފައިސާ ބޮޑުނުވާނަމަ، ކުޅުންތެރިން އެކުވެގެން މުބާރާތް ބޮއިކޮޓް ކުރުމަކީ މި ކަމުގައި އޮތް ހައްލެއްގެ ގޮތުގައި ދެކޭ ކަމަށް މަޝްހޫރު އަންހެން ޓެނިސް ތަރި، ބެލަރޫސްގެ އަރީނާ ސަބަލެންކާ ބުނެފި އެވެ.
ދުނިޔޭގެ އަންހެން ޓެނިސް ރޭންކިން އެއް ވަނައިގައި އޮތް ސަބަލެންކާ ހިމެނޭ ގޮތަށް، ޓެނިހުގެ އަންހެން އަދި ފިރިހެން ގަދަ 10 ކުޅުންތެރިން އަންނަނީ އަހަރެއްގެ ތެރޭގައި އޮންނަ ހަތަރު ގްރޭންޑް ސްލޭމް ޓެނިސް މުބާރާތުގެ އިނާމް ފައިސާ ބޮޑުކުރަން ޑިމާންޑްކުރަމުންނެވެ.
އަހަރުގެ ގްރޭންޑް ސްލޭމް ދެ ވަނަ ޓެނިސް މުބާރާތް، މި މަހު ފަށާ ފްރެންޗް އޯޕަންގެ އިނާމް ފައިސާ ވަނީ 9.5 ޕަސެންޓް އިތުރު ކޮށްފަ އެވެ. މިއީ، މުބާރާތުން ޖުމްލަ ލިބޭ އާމްދަނީގެ ނިސްބަތަށް ބަލާއިރު އަދިވެސް، 22 ޕަސެންޓް މަދު އަދަދެކެވެ.
ރޯމްގައި ކުރިއަށްދާ އިޓާލިއަން އޯޕަންގެ ކުރިން ސަބަލެންކާ ބުނެފައިވަނީ، މި ކަންކަން މިހެން ކުރިއަށްދާ ކަމަށްވާނަމަ، ކުރިއަށް އޮތްތަނުގައި، ކުޅުންތެރިން މި ކަމާ ދެކޮޅަށް ޝުއޫރު ފާޅުކުރުމުގެ ގޮތުން މުބާރާތްތަކުން ބޮއިކޮޓް ކުރުމަކީ ގާތުގައި އޮތް ކަމެއް ކަމަށެވެ.
"އަހަންނަށް ފެންނަ ގޮތުގައި މިއީ، ކަންނޭނގެ ދެން އަހަރެމެންގެ ހައްގު ހޯދަން އިހުތިޔާކުރަން ޖެހޭނެ މަގަކީ. މި މުޅި ކަންތައްތައް މި އޮންނަނީ އަހަރެމެންނާ ގުޅިފައި. އަހަރެމެންނާ ނުލައި މި މުބާރާތްތަކެއް ނޯންނާނެ. ޝައުގުވެރިކަމެއް ނޯންނާނެ. އެކަމަކު، އަހަރެމެންނަށް މި ހަދަނީ އިހާނެތި ގޮތެއް،" 28 އަހަރުގެ ސަބަލެންކާ ބުންޏެވެ.
ހަތަރު ވަނަ އަށް ރޭންކް ކޮށްފައިވާ އެމެރިކާގެ ތަރި، ކޮކޯ ގޯފް ވެސް ވަނީ ކުޅުންތެރިން އެކުވެގެން މުބާރާތެއް ބޮއިކޮޓް ކުރަން ނިންމައިފިނަމަ، އޭނާގެ 100 ޕަސެންޓް ތާއީދު އޮންނާނެ ކަމަށް ބުނެފަ އެވެ. އެކަމަކު، ޕޮލެންޑްގެ އީގާ ސްވިއަޓެކް އާއި އިނގިރޭސި ކުޅުންތެރިޔާ، އެމާ ރަޑުކާނޫ ވަނީ، ބޮއިކޮޓް ކުރުމަކީ އެންމެ ރަނގަޅު ވިސްނުން ކަމުގައި ވާނެތޯ ސުވާލު އުފައްދައިފަ އެވެ.
ގްރޭންޑް ސްލޭމް އެހެން މުބާރާތްތަކަށް ބަލާއިރު، މިދިޔަ އަހަރު ފްރެެންޗް އޯޕަން އިން ވަނީ 20 ޕަސެންޓް އިނާމް ފައިސާ ބޮޑުކޮށްފަ އެވެ. މި އަހަރުގެ ފުރަތަމަ ގްރޭންޑް ސްލޭމް އޮސްޓްރޭލިއަން އޯޕަންގައި އިނާމް ފައިސާގެ ޕޫލް ބޮޑުވި ނިސްބަތް އުޅެނީ، 16 ޕަސެންޓަށް ވުރެން ކުޑަ ތަންކޮޅެއް މަތީގަ އެވެ. ޖުލައި މަހު ފަށާ ވިމްބަލްޑަން ޓެނިސް މުބާރާތުގެ އިނާމް ފައިސާގެ ކަންކަން އަންނަ މަހު އިއުލާނުކުރާނެ ކަމަށް މުބާރާތް އިންތިޒާމް ކުރާ ފަރާތްތަކުން ވަނީ މީޑިއާ އަށް މައުލޫމާތު ދީފަ އެވެ.
