އިސްތަންބޫލް، ތުރުކީ (އޮގަސްޓް 6) - މިސްރުގެ ގައުމީ ފުޓްބޯޅަ ޓީމުގެ ކެޕްޓަން، މުހައްމަދު ސަލާހު، ތުރުކީ ސުޕަ ލީގުގެ ކްލަބް، ޓްރަބްޒޯންސްޕޯރަށް ބަދަލުވީ އެ ލީގުގެ އެންމެ މުސާރަ ބޮޑު ކުޅުންތެރިޔާގެ ގޮތުގައި ކަމަށް ތުރުކީގެ މީޑިއާތަކުން ރިޕޯޓްކޮށްފި އެވެ.
ދެ އަހަރުގެ ކޮންޓްރެކްޓެއްގައި، އުމުރުން 34 އަހަރުގެ ސަލާހު، ޓްރަބްޒޯންސްޕޯރަށް ސޮއިކުރިއިރު، ބޯނަހާ އެކު ހަފްތާ އަކު އޭނާ އަށް 475,000 ޑޮލަރު ލިބޭނެ ކަމަށް ތުރުކީގެ މީޑިއާ ރިޕޯޓްތައް ބުނެފި އެވެ. މިއީ، ތުރުކީ ލީގުގައި ކުޅޭ ކުޅުންތެރިއަކަށް މިހާތަނަށް ލިބޭ އެންމެ ބޮޑު މުސާރަ އެވެ.
މީގެ ކުރިން، ތުުރުކީ ލީގުގައި އެންމެ ބޮޑު މުސާރަ ލިބޭ ކޮންޓްރެކްޓެއްގައި ހުރީ، ގަލަތަސަރާއިގެ ނައިޖީރިއާ ފޯވާޑް ވިކްޓަ އޮސީމެން އެެވެ. އޭނާ އަށް ހަފްތާ އަކު ލިބޭ މުސާރަ އުޅެނީ، 370،000 ޑޮލަރުގަ އެވެ. ލިސްޓުގެ ތިން ވަނައިގައި އޮތީ މި ފަހަރުގެ ޓްރާންސްފާ މާކެޓްގައި، ފެނަބާޗޭ އަށް ސޮއިކުރި އެންގޯލޯ ކާންޓޭ އެވެ. ފްރާންސްގެ ކާންޓޭ އަށް ހަފްތާ އަކު 280،000 ޑޮލަރު ލިބޭ ކަމަށް ރިޕޯޓްތައް ބުނެ އެވެ.
މި ލިސްޓުގެ ގަދަ ފަހެއްގައި ދެން ހިމެނެނީ، ފެނަަބާޗޭގެ ކީޕަރު، ބްރެޒިލްގެ އެޑަސަން އާއި ގަލަތަސަރާއި އަށް ކުޅޭ ޖަރުމަނުގެ ލެރޯއި ސާނޭ އެވެ.
ސަލާހުގެ ސޮއި ހޯދަން ތުރުކީ ސުޕަ ލީގުގެ ކްލަބް ބެސިކްޓާސްގެ މެނޭޖްމަންޓަށް އެ ކްލަބްގެ ސަޕޯޓަރުން އަންނަނީ ޕްރެޝަރު ބޮޑު ކުރަމުންނެވެ. . ރިޕޯޓްތައް ބުނާގޮތުން، ބެސިކްޓާސް އިން ވަނީ ސަލާހަށް އަހަރަކު، 15 މިލިއަން ޑޮލަރުގެ މުސާރައެއް ލިބޭ ޕްރޮޕޯސަލެއް ހުށަހަޅައިފަ އެވެ. އެ ޑީލްގެ ކަންކަން ކުރިއަށްދަނިކޮށް، މަޝްވަރާތައް މަޑުޖެހިފައިވަނީ، ސަލާހު، ފުރަތަމަ ކޮންޓްރެކްޓްގައި ސޮއިކުރާއިރު، ހަމަޖައްސަައިދޭ ބޯނަހުގައި، ސަލާހުގެ އޭޖެންޓް ރަމީ އައްބާސް އަށް 30 ޕަސެންޓްގެ ކޮމިޝަނެއް ހަމަޖައްސައިދޭން ހުށަހެޅުމުން ކަމަށް ރިޕޯޓްތައް ބުނެ އެވެ.
ބެސިކްޓާސްގެ ޑީލަށް ލަސްތަކެއް އައުމާ އެކު، ތުރުކީ ސުޕަ ލީގުގެ ޓްރަބްޒޯންސްޕޯރުން ސަލާހުގެ ސޮއި ހޯދުުމުގެ ޑީލަށް ވަނީ އެވެ. އަދި، ލަސްތަކެއް ނުވެ، އެ ޑީލް އެއްބަސްވުމަކާ ހަމައަށް ގެންދިޔައީ އެވެ.
ބްލެކް ސީ ސްޓޯމްގެ ނަމުން މަޝްހޫރުވެފައިވާ ޓްރަބްޒޯންސްޕޯރަކީ ތުރުކީގެ ޗެމްޕިއަންކަން ހަތް ފަހަރު ހޯދާފައިވާ ޓީމެކެވެ. އޭގެ ތެރެއިން ހަ ތަށި ހޯދީ 1976 އާއި 1984 ވަނަ އަހަރާ ދެމެދުގަ އެވެ. އެންމެ ފަހުން، 2022 ވަނަ އަހަރު އެ ޓީމުން ލީގު ހޯދީ 38 އަހަރުގެ މެދުކެނޑުމަކަށް ފަހު އެވެ. ޓްރަބްޒޯންސްޕޯރަކީ ތުރުކީ ލީގު ޗެމްޕިއަންކަން ހޯދި ހަ ޓީމުގެ ތެރެއިން އެއް ޓީމެކެވެ.
ޓްރަބްޒޯންސްޕޯރުގެ ގިނަ އަދަދެއްގެ ސަޕޯޓަރުން ވަނީ ސަލާހަށް މަރުހަބާ ކިއުމަށްޓަކައި ބޭއްވި އިވެންޓްގައި ބައިވެރިވެފަ އެވެ. ޓްރަބްޒޯންސްޕޯރަކީ، ތުރުކީގެ ސަރުކާރާ ގުޅުން އޮތް ވިޔަފާރިވެރިންތަކެއް ހިންގަމުން އަންނަ ކްލަބެކެވެ.
ކުރިން ޗެލްސީ އަށް ކުޅުނު ސަލާހު، ލިވަޕޫލާ ގުޅުނީ، 2017 ވަނަ އަހަރު އިޓަލީގެ ރޯމާ ދޫކޮށް ޖުމްްލަ އެކު، 45 މިލިއަން ޑޮލަރުގެ ޕެކޭޖެއްގަ އެވެ. އޭގެ ފަހުން، ތިން ފަހަރެއްގެ މަތިން ސަލާހު ލިވަޕޫލާ އެކު، އެއްބަސްވުމެއް ހަދައި، އެ ޓީމު ދޫކޮށްލަން މި ނިންމީ ނުވަ އަހަރު އެ ޓީމަށް ކުޅެ، ގިނަ ކާމިޔާބީތަކެއް ހޯދުމަށް ފަހު އެވެ.
ލިވަޕޫލަށް ކުޅެދިން، 442 މެޗުން 257 ލަނޑު ޖެހި ސަލާހު ވަނީ، އެ މެޗުތަކުގައި، 123 ލަނޑު ޖަހަން ފުރުސަތު ތަނަވަސްކޮށްދީފަ އެވެ.
ލިވަޕޫލާ އެކު، ގިނަ ރެކޯޑްތަކެއް ހަދާފައިވާ ސަލާހު ވަނީ އެ ޓީމާ އެކު، ދެ ފަހަރު ޕްރިމިއާ ލީގާއި އެއް ފަހަރު ޗެމްޕިއަންސް ލީގާއި ކްލަބް ވޯލްޑް ކަޕާއި ޔުއެފާ ސުޕަ ކަޕާއި އެފްއޭ ކަޕްގެ އިތުރުން ދެ ފަހަރު ލީގު ކަޕްގެ ޗެމްޕިއަންކަން ހޯދައިފަ އެވެ. ސަލާހަކީ ޕީއެފްއޭ އިން ހޮވާ އެންމެ މޮޅު ކުޅުންތެރިޔާގެ މަގާމު ތިން ފަހަރެއްގެ މަތިން ހޯދި ހަމައެކަނި ކުޅުންތެރިޔާ އެވެ.
