ފަތުރުވެރިކަމަށް ދޫކޮށްފައިވާ ތަންތަނަށް ގަވާއިދާ އެއްގޮތަށް ކުލި ނުދައްކާ ފަރާތްތަކަށް ފިޔަވަޅު އަޅަން ނިންމާފައިވާ ކަމަށް ބުނެ ޓޫރިޒަމް މިނިސްޓްރީން އިންޒާރުކޮށްފި އެވެ.
ޓޫރިޒަމް މިނިސްޓްރީން މިއަދު ގެޒެޓުކުރި އިއުލާނެއްގައި ބުނީ ފަތުރުވެރިކަމަށް ދޫކޮށްފައިވާ ތަންތަނުގެ ތެރެއިން ހިންގަމުންދާ ތަންތަނާއި އެ މިނިސްޓްރީގެ ހުއްދަނެތި އޮޕަރޭޝަންތައް މެދުކަނޑާލައިފައިވާ ތަންތަނުގެ ތެރެއިން، އެއްބަސްވުމުގައި ވާގޮތަށް ކުއްޔާއި ޖޫރިމަނާ ނުދައްކާ ފަރާތްތަކަށް ފިޔަވަޅު އަޅާނެ ކަމަށެވެ.
ނަމަވެސް އެ ފަރާތްތަކަމެދު އަޅާނެ ފިޔަވަޅެއް ހާމައެއް ނުކުރެ އެވެ. ޓޫރިޒަމް ބޭނުންތަކަށް ދޫކޮށްފައިވާ ބިންތަކުން ކޮންމެ ކުއާޓަރެއްގެ ކުި އެ ކުއާޓަރެއް ފެށުމުގެ ކުރިން ދައްކަންޖެހޭނެ އެވެ. ކުއާޓާރު ފެށުމުގެ ކުރިން އެ ފައިސާ ނުދައްކައިފިނަމަ، 0.0493 ޕަސެންޓުގެ ރޭޓުން ޖޫރިމަނާ އަރަމުންދާނެ އެވެ.
މީރާގެ ތަފާސްހިސާބުތަކުން ދައްކާގޮތުގައި، މި އަހަރުގެ ފުރަތަމަ ކުއާޓާރުގައި ރިސޯޓު ކުލީގެ ގޮތުގައި ބަލައިގެންފައި ވަނީ 586 މިލިއަން ރުފިޔާ އެވެ. އެ ކުއާޓަރު ނިމުނުއިރު، ރިސޯޓު ކުލީގެ ގޮތުގައި ދައުލަތަށް ލިބެންޖެހި ނުލިބި ހުރި ފައިސާގެ އަދަދު ވަނީ ހަ ބިލިއަން ރުފިޔާއަށް އަރައިފަ އެވެ. އެއީ އިންސައްތައިން ބަލާނަމަ، ޓެކުސް ނޫން އާމްދަނީން ދައުލަތަށް ނުލިބި ހުރި ފައިސާގެ 94.7 ޕަސެންޓެވެ.
ފަތުރުވެރިކަމަށް ދޫކޮށްފައިވާ ތަންތަނުގެ ތެރެއިން ކުލި ނުދައްކާ ފަރާތްތަކާމެދު ފިޔަވަޅު އަޅާނެކަމަށް ބުނެ ސަރުކާރުން އިންޒާރު ދީފައި މިވަނީ، ޑޮލަރުގެ އަގު އިންތިހާއަށް އުފުލި ތަކެތީގެ އަގު ބޮޑުވަމުންދާ ދަނޑިވަޅެއްގަ އެވެ.
އެ މައްސަލައަށް ހައްލެއް ހޯދުމަށްޓަކައި ސަރުކާރުން ދަނީ، އޮފްޝޯ ބުކިން ޕްލެޓްފޯމްތަކާއި ބޭރުގެ ޓުއާ އޮޕަރޭޓަރުންނާއި ޓްރެވަލް އެޖެންޓުން ފޯރުކޮށްދޭ މުދަލާއި ހިދުމަތުން ޖީއެސްޓީ ނެގުމަށާއި ރާއްޖޭގައި ޕްރޮޖެކްޓުތައް ހިންގާ ބޭރުގެ ކޮންޓްރެކްޓަރުންގެ އަތުން ވިތުހޯލްޑިން ޓެކްސްގެ ގޮތުގައި ނަގާ އަދަދު ފަސް ޕަސެންޓުން 10 ޕަސެންޓަށް އިތުރުކުރުމަށް ގާނޫނަށް އިސްލާހުތަކެއް ހުށަހަޅައިފަ އެވެ.
