ގާޒާއަށް ސުލްހަ ގެނައުމަށް އެމެރިކާގެ ރައީސް ޑޮނަލްޑް ޓްރަމްޕްގެ މަންދޫބުން އާދީއްތަ ދުވަހު ގާހިރާގައި މިސްރާއި ގަތަރު އަދި ތުރުކީގެ މެދުވެރިންނާ ބައްދަލުކުރައްވައިފި ކަމަށް ޑިޕްލޮމެޓިކް މަސްދަރަކުން ބުނެފި އެވެ.
މެދުވެރިންނާއި ޓްރަމްޕްގެ މަންދޫބުންނާ ދެމެދު ބޭއްވުނު ބައެއް ބައްދަލުވުންތަކުގައި ހަމާސްގެ އޮފިޝަލުން ބައިވެރިވެފައިވާ ކަމަށް އެ މަސްދަރުން މައުލޫމާތުދެ އެވެ. މި ބައްދަލުވުންތަކުގައި ޓްރަމްޕްގެ މަންދޫބެއްގެ ގޮތުން އެމަނިކުފާނުގެ ދަނބިދަރިކަލުން ޖެރެޑް ކުޝްނާ އާއި ގާޒާގެ ސުލްހައިގެ ކަންކަމާ ބެހޭ ޓްރަމްޕްގެ މަންދޫބު ނިކޮލާއި މިލަޑެނޯވް ބައިވެރިވެވަޑައިގެންނެވި އެވެ.
އިސްރާއީލުގެ އިސް އޮފިޝަލަކު ބުނި ގޮތުގައި، ކުޝްނާ އާއި މިލަޑެނޯވް ހޯމަ ދުވަހު އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާ ބައްދަލުކުރެއްވުމަށް ވަނީ ހަމަޖެހިފަ އެވެ. ނަތަންޔާހޫ ވަނީ ގާޒާގެ ސުލްހައަށްޓަކައި ޓްރަމްޕް އެންމެ ފަހުން ހުށަހެޅުއްވި މަގުޗާޓަކީ ބަލައިގަނެވޭނެ އެއްޗެއް ނޫން ކަމަށް އޮގަސްޓް 9 ވަނަ ދުވަހު ވިދާޅުވެފަ އެވެ.
އެ އޮފިޝަލް އިތުރަށް ވިދާޅުވީ، ހަމާސްއިން އެ ޖަމާއަތުގެ ބާރުތައް އަލުން ވަރުގަދަކުރަމުންދާ ދަނޑިވަޅެއްގައި، ގާޒާގައި ތިބި ހަމާސްގެ ހަނގުރާމަވެރިންނަށް އަމާޒުކޮށްގެން ދޭ ހަމަލާތައް ހުއްޓާލުމަށް ވޮޝިންޓަނުން އެދެމުންދާތީ އެކަމާ މެދު އިސްރާއީލުން ކަންބޮޑުވާ ކަމަށެވެ.
ޓްރަމްޕްގެ ސުލްހައިގެ މަޝްރޫއުގައި ގޮވާލާފައިވަނީ ގާޒާގައި ހިންގާ އަސްކަރީ އޮޕަރޭޝަންތައް ވަގުތުން ހުއްޓާލުމަށެވެ. މި މަޝްރޫއުގައިވާ ގޮތުން، އިސްރާއީލުގެ ސިފައިން ގާޒާއިން ފައިބަމުންދާއިރު ހަމާސްއިން ހަތިޔާރު ބަހައްޓަން ޖެހޭނެ އެވެ. އަދި ފަލަސްތީނުގެ އާ މަދަނީ ސަރުކާރެއްގެ ދަށުން ގާޒާ އަލުން އާބާދުކުރުމަށް ވެސް މި މަޝްރޫއުގައި ހިމަނާފައިވެ އެވެ.
