އިސްރާއީލުން ހިފާފައިވާ ހުޅަނގު އައްސޭރީގައި ފަލަސްތީނު ރައްޔިތުންގެ ގެތައް ވަށާލައި، އެ މީހުންނަށް ބިރުދައްކަމުންދާ ހަރުކަށި ޔަހޫދީ ވަޒަންވެރިންގެ އަމަލުތައް، އެ ގައުމުގެ ބޮޑުވަޒީރު ބެންޖަމިން ނަތަންޔާހޫ އާންމުކޮށް ކުށްވެރިކުރުމަށް އެމެރިކާއިން ބާރުއަޅަމުންދާ ކަމަށް އެމެރިކާ އާއި އިސްރާއީލުގެ އޮފިޝަލުން ބުނެފި އެވެ.
ހުޅަނގު އައްސޭރީގެ ގުސްރާ އަވަށުގައި ފަލަސްތީނު ރައްޔިތުން ދިރިއުޅޭ ގެތަކުން ފެނާއި ކަރަންޓުގެ ހިދުމަތް މެދުކަނޑާލުމަށް ފަހު، ޔަހޫދީ ވަޒަންވެރިން އެ ގެތައް ވަށާލައިގެން ތިބޭތާ މިހާރު ގާތްގަނޑަކަށް ހަފުތާއެއް ވެއްޖެ އެވެ. އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ބުނާ ގޮތުގައި، މިއީ ފަލަސްތީނުގެ ދައުލަތެއް ގާއިމުކުރުމަށް ކަނޑައަޅާފައިވާ ބިންތަކުން އިތުރު ބައިތައް އަތުލައިގަތުމަށް ރާވައިގެން ހިންގާ ވަރުގަދަ ކެމްޕޭނެކެވެ.
މި އަމަލުތަކަށް އެމެރިކާއިން ވަނީ އާންމުކޮށް ފާޑުކިޔައިފަ އެވެ. އެގޮތުން، ހުޅަނގު އައްސޭރީގައި ޔަހޫދީން އާބާދުކުރުމަށް ވަރަށް ބޮޑަށް ތާއީދުކުރައްވާ، އެމެރިކާއިން އިސްރާއީލަށް ކަނޑައަޅާފައި ހުންނަވާ ސަފީރު މައިކް ހަކަބީ ވެސް ވަނީ، ފަލަސްތީނު މީހުންގެ ގެތައް ވަށާލައިގެން ތިބި މީހުންނަކީ "އިސްރާއީލުގެ ޓެރަރިސްޓުން" ކަމަށް ސިފަކުރައްވައި ބުރާސްފަތި ދުވަހު އެ މީހުންގެ އަމަލުތައް ކުށްވެރިކުރައްވައިފަ އެވެ.
އެމެރިކާ އާއި އިސްރާއީލުގެ އޮފިޝަލަކު ހުކުރު ދުވަހު ވިދާޅުވި ގޮތުގައި، ވައިޓް ހައުސްގެ އިސް އޮފިޝަލުން މިހާރު ގެންދަވަނީ އެ މީހުންގެ އެ އަމަލުތައް އާންމުކޮށް ކުށްވެރިކުރުމަށް ބޮޑުވަޒީރު ނަތަންޔާހޫއަށް ބާރުއަޅުއްވަމުންނެވެ.
މި މައްސަލައިގައި ވޮޝިންޓަނުން އިހުތިޖާޖު ކުރަން ފެށީ، ވަޒަންވެރިންގެ ހަމަލާތަކުގެ އަމާޒަކަށް ވެފައިވާ ގެތަކުގެ ތެރޭގައި ފަލަސްތީނު ދަރިކޮޅުގެ އެމެރިކާ ރައްޔިތެއްގެ ގެ ހިމެނޭކަން އެނގުމާ ގުޅިގެންނެވެ.
