ލިވަޕޫލް (ޖޫން 1) - ހުސްވެފައިވާ ލިވަޕޫލްގެ ކޯޗުކަން ހަވާލުކުރަން ސްޕެއިނުގެ ކޯޗު އަންޑޯނީ އިރައޯލާއާ އެކު ރަސްމީކޮށް މަޝްވަރާތައް ފަށާފައިވާ ކަމަށް އިނގިރޭސި މީޑިއާތަކުން ރިޕޯޓްކޮށްފި އެވެ.
ބޯންމައުތުގެ ކޯޗަކަށް ހުރި އިރައޯލާ މި ނިމުނު ސީޒަނަށް ފަހު އެ ޓީމު ދޫކޮށްލިއިރު، އޭނާ އަށް އެހެން ޓީމުތަކާ ހަވާލުވާން ލިބުނު ފުރުސަތުތައް ވަނީ ދޫކޮށްލައިފި އެވެ. ލިވަޕޫލްގެ ކޯޗުގެ މަގާމު ހުސްވީ މިދިޔަ ދެ ސީޒަނުގައި އެ ޓީމަށް އިރުޝާދުދިން ނެދަލެންޑްސްގެ އާނާ ސްލޮޓް ވަކިކުރަން އެ ކްލަބުން ނިންމުމުންނެވެ. މަގާމާ ހަވާލުވި ފުރަތަމަ ސީޒަނުގައި ސްލޮޓް ވަނީ ލިވަޕޫލަށް ޕްރިމިއާ ލީގުގެ ޗެމްޕިއަންކަން ހޯދައިދީފަ އެވެ. އެކަމަކު، ނިމިދިޔަ ސީޒަނުގައި ލިވަޕޫލް، ހުރިހާ މުބާރާތަކުން 20 މެޗުން ބަލިވެ، ދަށް ރެކޯޑަކާ ކުރިމަތިލާން ޖެހި ސްލޮޓަށް ވަޒީފާ ގެއްލުނީ އެވެ.
މީގެ އަށް އަހަރު ކުރިން އިރައޯލާ ކޯޗިން ކެރިއަރު ފެށީ ސައިޕްރަސްގެ އޭއީކޭ ލަނާކާ އިންނެވެ. އެ ޓީމަށް 2018-2019 ސީޒަނުގައި ކޯޗުކޮށްދިނުމަށް ފަހު، ޖެހިގެން އައި ސީޒަނުގައި، ސްޕެއިނުގެ މިރަންޑެސް އަށް ކޯޗުކޮށްދިންނެވެ. އެ ކްލަބްގައި ކުރި މަސައްކަތް ރަނގަޅުވުމުން 2020-2023 އަށް ރަޔޯ ވަޔެކާނޯގައި ކޯޗުކޮށްދޭން ފުރުސަތެއް ލިބުނެވެ. ވަޔެކާނޯ އަށް ފަހު، ދެން، އިރައޯލާ ފެނުނީ ބޯންމައުތުގެ ކޯޗެއްގެ ގޮތުގަ އެވެ. އިރައޯލާ، ބޯންމައުތުގެ ކޯޗުކަމާ ހަވާލުވީ 2023 ވަނަ އަހަރުގެ ޖޫން މަހު އެވެ. އެއީ، އޭރު އެ ޓީމުގެ ކޯޗަކަށް ހުރި ގެރީ އޮނީލް ވަކިކުރުމަށް ފަހު ބޯންމައުތު މެނޭޖްމަންޓުން ގެނައި ބަދަލެކެވެ. އިރައޯލާ އަށް ދެ އަހަރުގެ ކޮންޓްރެކްޓެއް އެންމެ ފުރަތަމަ ބޯންމައުތުން ދިންއިރު، ފަހުން އެ އެއްބަސްވުން އާ ކޮށް މި ސީޒަން ނިމުމުން އޭނާ ބޯންމައުތު ދޫކޮށްލާނީ، ތިން އަހަަރު އެ ޓީމުގައި ހޭދަކޮށްފަ އެވެ.
ލިވަޕޫލުން އިރައޯލާއާ އެކު ރަސްމީކޮށް ވާހަކަތައް ދައްކަން ފަށާފައިވާއިރު، އޭނާ އަށް ދޭނީ ދެ އަހަރުގެ އެއްބަސްވުމެއް ކަމަށް މީޑިއާ ރިޕޯޓްތައް ބުނެ އެވެ.
އާ ކޯޗެއް ހޯދުމުގެ މަސައްކަތުގެ ތެރޭގައި ލިވަޕޫލުން، ޖަރުމަނުގެ ސްޓުޓްގާޓުގެ ކޯޗު ސަބެސްޓިއަން ހޮއެނޭސް އާއި ފްރާންސްގެ ލޯންސްގެ ކޯޗު ޕިއޭރޭ ސާޖް އަށް ބެލި ނަމަވެސް، ލިވަޕޫލް ޓެކްނިކަލް ޓީމުގެ ލަފަޔަކީ އިރައޯލާ ގެނައުން ކަމަށް ރިޕޯޓްތައް ބުނެ އެވެ.
އިރައޯލާ އަށް ޗެލްސީ އާއި އޭސީ މިލާންގެ އޮފާ ލިބުނު ކަމުގައި ވިޔަސް އޭނާ ވަނީ ބަޔާ ލެވަކޫސަން އާއި ލިވަޕޫލްގެ އޮފާ އަކަށް މަޑުކުރަން ނިންމައިފަަ އެެވެ. އަދި، ބަޔާ ލެވަކޫސަނުން އިރައޯލާއާ ވާހަކަތައް ފަށަން ތައްޔާރުވާން އުޅެނިކޮށް، ލިވަޕޫލުން މި ވަނީ އެ ޑީލްގެ ތެރެއަށް ވަދެފަ އެވެ.
ރިޕޯޓްތައް ބުނާގޮތުން، މި މަހު 11 ވަަނަ ދުވަހު ފަށާ ވޯލްޑް ކަޕްގެ ކުރިން އިރައޯލާގެ ޑީލް ނިންމައި، އަންނަ ސީޒަނަށް ޓީމު ތައްޔާރުކުރުމުގެ މަސައްކަތް ފަށަން ލިވަޕޫލުން ވަނީ އަމާޒުހިފައިފަ އެވެ.
