ލިވަޕޫލް (އޮގަސްޓް 10) - ލިވަޕޫލްގެ ކުޅުން ބޭނުންވާ ލެވަލް ހިފަހައްޓަން ވަގުތުނަގާނެ ކަަމަށް އެ ޓީމުގެ އާ ކޯޗު އަންޑޯނީ އިރައޯލާ ބުނެފި އެވެ.
ޕްރީ ސީޒަނުގައި ލިވަޕޫލުން އެންމެ ފަހުން ކުޅުނު ދެ މެޗުގައި ވެސް ބަލިވީ ކުރިން ލީޑު ލިބިފައި އޮއްވަ އެވެ. އެ ގޮތުން، އެމެރިކާ ޓުއާގެ ފަހު މެޗުގައި ލީޑްސް ޔުނައިޓެޑް ކައިރިން، 40 މިނިޓް ތެރޭ، ދެ ގޯލުގެ ލީޑެއް ނަގައި، 4-2 އިން ބަލިވިއިރު، އެންފީލްޑްގައި ރޭ ކުޅުނު މެޗުގައި މޮނާކޯ ކައިރިން 30 މިނިޓް ތެރޭ ދެ ގޯލުގެ ލީޑެއްގައި ލިވަޕޫލް ވަނީ 3-2 އިން ބަލިވެފަ އެވެ.
ރޭގެ މެޗަށް ފަހު، އިރައޯލާ، ލިވަޕޫލްގެ މީޑިއާ ޗެނަލަށް ދިން އިންޓަވިއުއެއްގައި ބުނެފައިވަނީ، މޮނާކޯއާ ދެކޮޅަށް ކުޅުނު މެޗު ވެސް ދިޔައީ ލީޑްސް މެޗު ދިޔަ ގޮތަށް ކަމަށެވެ. އަދި، ކަންކަން ރަނގަޅުކުރަން ޖެހޭކަން ވަރަށް ސާފުކޮށް މި ދެ މެޗުން އެނގިގެން ގޮސްފައިވާ ކަމަށް އިރައޯލާ ވަނީ ބުނެފަ އެވެ.
"ވަރަށް ރަނގަޅަށް ފުރަތަަމަ ހާފު ދިޔައި. ހާއްސަ ގޮތެއްގަައި ފުރަތަަމަ 30 މިނިޓް. ހަގީގަތަށް ބުނަންޏާ އަހަރެމެންގެ މި ވަގުތު ނެތް އެ މިންވަރެއް މުޅި މެޗުގައި ބޮޑު ބަދަލުތަކެއް ގެނެސްގެން ކުޅޭކަށެއް. އެހެންވީމަ، އެ މީހުން (މޮނާކޯ) ހައްގުވެގެން ހޯދި ނަތީޖާއެއް މިއީ،" ރޭގެ މެޗަށް ފަހު އިރައޯލާ ބުންޏެވެ.
ކުރިން ބޯންމައުތަށް ކޯޗުކޮަށްދިން އިރައޯލާ ބުނީ، ޕްރީ ސީޒަނުގެ ފުރަތަމަ ދެ މެޗުން މޮޅުވިއިރު، ކަންކަން ރަނގަޅަށް ދިޔަ ކަމަށާއި މަޑުމަޑުން ލެވަލް ހިއްލާލުމަށް މަސައްކަތްކުރާއިރު، ހުރި މައްސަލަތައް އިތުރަށް ފާހަގަވެގެންދާނެ ކަމަށެވެ.
"ދަތިތަކެއް މި ހުރީ މުޅި މެޗު ބޭނުންވާ ލެވަލަށް ހިއްލާލައިގެން ކުޅެން. އަހަރެމެން ގިނަ ބަދަލުތަކެއް ޓީމަށް ގެނެސްގެން ކުޅެން ފަށާއިރަށް އެބަ ފެނޭ ކުޅުންތެރިންގެ ވަރުބަލިކަމާއި އެހެން ކަންކަމާ ހުރެ ބޭނުންވާ ލެވަލް ދެމެހެއްޓުމަށް އުނދަގޫކަން. ޔަގީންކަމެއް، އަހަރެމެން މަސައްކަތް ކުރަން އެބަޖެހޭ،" އިރައޯލާ ބުންޏެވެ.
"ބޭނުންވާ ލެވަލްގައި ހިފަހައްޓަން ވަގުތުނަގާނެ،"
އިރައޯލާ، ލިވަޕޫލާ ހަވާލުވީ ދެ އަހަރުގެ ކޮންޓްރެކްޓެއްގަ އެވެ.
އިނގިރޭސި ޕްރިމިއާ ލީގުގެ އާ ސީޒަނުގައި ލިވަޕޫލުން ކުޅޭ ފުރަތަމަ މެޗުގައި މި މަހު، 23 ވަނަ ދުވަހު ރަށުންބޭރުގައި ނިއުކާސަލް ޔުނައިޓެޑާ ކުޅުުމުގެ ކުރިން، ޕްރީ ސީޒަނުގައި ލިވަޕޫލްގެ ބާކީ އެއް މެޗު އެބައޮތެވެ. އެއީ، މި މަހުގެ 16 ވަނަ ދުވަހު، އެންފީލްޑްގައި އިޓަލީގެ ކޯމޯއާ ކުޅޭ މެޗެވެ.
