ޕެރިސް (އޮގަސްޓް 7) - މި ފަހަރުގެ ޓްރާންސްފާ މާކެޓްގައި ލިވަޕޫލުން ގަންނަން މަސައްކަތް ކުރަމުން އަންނަ ފްރާންސްގެ ފޯވާޑް، ބްރެޑްލީ ބާކޮލާގެ ޑީލު ކުރިއަށްދިއުމަށްޓަކައި، އޭނާގެ ކޮންޓްރެކްޓް މި ވަގުތު އޮތް ޔޫރަޕްގެ ޗެމްޕިއަން، ޕީއެސްޖީން ދޫދޭން ވިސްނަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
ކުރިން ލިޔޯނަށް ކުޅުނު ބާކޮލާ، 23، ވިއްކާލަން ޕީއެސްޖީން ކިޔާ އަގު އުޅަނީ 190 މިލިއަން ޑޮލަރުގަ އެވެ. އެކަމަކު، ލިވަޕޫލުން އެންމެ ބޮޑަށް ވެސް ބާކޮލާ ގެންނަން ހަރަދުކުރަން ނިންމާފައި އޮތީ 140 މިލިއަން ޑޮލަރެވެ. އެއީ، އެންމެ ފުރަތަމަ 110 މިލިއަން ޑޮލަރު ދީފައި، ލިވަޕޫލާ އެކު، ބާކޮލާ ސޮއިކުރާ ފަސް އަހަރުގެ ކޮންޓްރެކްޓްގެ ތެރޭގައި ވަކި ކަންތައްތަކެއް ފުރިހަަމަވެއްޖެނަމަ، އިތުރު 30 މިލިއަން ޑޮލަރު ދޭ ގޮތަށެވެ.
އެ އޮފާ ލިވަޕޫލުން ހުށަހަޅާފައި އޮތީ، ޕީއެސްޖީން އެ ޑީލާ މެދު ގޮތެއް ނިންމުމަށް ވަކި ގޮތެއް ކަނޑައަޅަން ފުރުސަތު ދީފަ އެވެ.
ސްޕެއިނާއި އިނގިރޭސި ގިނަ މީޑިއާތަކުން ރިޕޯޓްކުރަމުން އަންނަ ގޮތުގައި، ބާކޮލާ ވަނީ ޕީއެސްޖީ ދޫކޮށްލައި، ކުޅުމުގެ ފުރުސަތު ގިނައިން ލިބޭ ޓީމަކަށް ދާން ބޭނުންވާކަން ޕީއެސްޖީ މެނޭޖްމަންޓަށް އަންގައިފަ އެވެ.
އެ ރިޕޯޓްތައް ބުނާގޮތުން، ބާކޮލާ ބޭނުމީ ލިވަޕޫލާ ގުޅުމަށް ކަމަށްވާއިރު، މި ޑީލް ކުރިއަށްދާން އޮތީ ޕީއެސްޖީ އާއި ލިވަޕޫލުން ބާކޮލާގެ ޓްރާންސްފާ ފީއަކާ މެދު އެއްބަސްވެގެންނެވެ.
ލިވަޕޫލުން، ޕީއެސްޖީ އަށް ކުޅޭ އުމުރުން 18 އަހަރުގެ ސެނެގާލްގެ ފޯވާޑް، އިބްރާހިމް އެމްބާޔޭ ހޯދަން ވެސް މަސައްކަތްކުރަމުން އަންނަ ކަމަށް ފްރާންސްގެ ނޫސްތަކުން ރިޕޯޓްކޮށްފައިވެ އެވެ. އެ ގޮތުން، ބާކޮލާ އާއި އެމްބާޔޭ، ދެ ކުޅުންތެރިން އެއްކޮށް ގަންނަނަމަ، ލިވަޕޫލުން ޖުމްލަ އެކު މި ޑީލުގައި، 180 މިލިއަން ޑޮލަރަށް ވުރެން ބޮޑު ފީއެއް ހޭދަކުރަން ޖެހޭނެ ކަމަށް ރިޕޯޓްތައް ބުނެ އެވެ.
އިނގިރޭސި ނޫސްތަކުން ރިޕޯޓްކުރާގޮތުގައި، މި ފަހަރުގެ ޓްރާންސްފާ މާކެޓްގެ ތެރޭގައި، ލިވަޕޫލުން ކާޓިސް ޖޯންސް އާއި ކޯޑީ ގަކްޕޯ ދޫކޮށްލައި، ޓްރާންސްފާގައި ހޭދަކުރާ ބަޖެޓް ބޮޑުކުރުމުގެ ފުރުސަތު އެބައޮތެވެ.
ސްޕެއިނުގެ ކޯޗު އަންޑޯނީ އިރައޯލާގެ ކޯޗުކަމުގައި މި ސީޒަނަށް ތައްޔާރުވަމުން އަންނަ ލިވަޕޫލުން ވަނީ 50 މިިލިއަން ޑޮލަރުގެ ޕެކޭޖެއްގައި އޮސަސޫނާ އަށް ކުޅެމުން އައި 23 އަހަރުގެ ފޯވާޑް ވިކްޓަ މުނޯޒް ގަނެފަ އެވެ.
