ލިވަޕޫލް (ޖޫން 5) - ލިވަޕޫލްގެ ކޯޗުކަމާ ހަވާލުވީ އެ މަގާމުގައި ހުރެ އަދާކުރަން ޖެހޭ ޒިންމާތަކާއި މިހާރުގެ ހާލަތު ވެސް އެނގި ހުރެ ކަމަށް ސްޕެއިނުގެ ކޯޗު އަންޑޯނީ އިރައޯލާ ބުނެފި އެވެ.
ލިވަޕޫލްގެ ކޯޗުގެ މަގާމު ހުސްވީ މިދިޔަ ދެ ސީޒަނުގައި އެ ޓީމަށް އިރުޝާދުދިން ނެދަލެންޑްސްގެ އާނާ ސްލޮޓް ވަކިކުރަން އެ ކްލަބުން ނިންމުމުންނެވެ. މަގާމާ ހަވާލުވި ފުރަތަމަ ސީޒަނުގައި ސްލޮޓް ވަނީ ލިވަޕޫލަށް ޕްރިމިއާ ލީގުގެ ޗެމްޕިއަންކަން ހޯދައިދީފަ އެވެ. އެކަމަކު، ނިމިދިޔަ ސީޒަނުގައި ލިވަޕޫލް، ހުރިހާ މުބާރާތަކުން 20 މެޗުން ބަލިވެ، ދަށް ރެކޯޑަކާ ކުރިމަތިލާން ޖެހި ސްލޮޓަށް ވަޒީފާ ގެއްލުނީ އެވެ.
އުމުުރުން 43 އަހަރުގެ އިރައޯލާ އަށް ލިވަޕޫލުން ދިނީ ދެ އަހަރުގެ ކޮންޓްރެކްޓެކެވެ. އެއީ، ފުރަތަމަ ކުރު ކޮންޓްރެކްޓެއްގަައި މަސައްކަތްކުރަން އިރައޮލާ ވެސް ބޭނުންވާތީ އެވެ. މިދިޔަ ސީޒަނުގައި ބޯންމަައުތަށް އިނގިރޭސި ޕްރިމިއާ ލީގުގެ ހަ ވަނަ އާ އެކު އެ ކްލަބްގެ ތާރީހުގައި ފުރަތަމަ ފަހަރަށް ޔޫރަޕްގެ މުބާރާތަކުން ފުރުސަތު ހޯދައިދިން އިރައޯލާ ބުނީ، ލިވަޕޫލަކީ އޭނާގެ ކެރިއަރުގެ އެންމެ ބޮޑު ޗެލެންޖު ކަމަށާއި އެ ޓީމާ ހަވާލުވެ، އަދާކުރަން ޖެހޭ ޒިންމާތައް އެނގޭ ކަމަށެވެ.
"އަހަރެން މި ހުރީ މަސައްކަތް ފަށަން ކެތްމަދުވެފައި. ލިވަޕޫލަކީ ކޮބައިކަން ނޫނީ ކިހާ ބޮޑު ޓީމެއްކަން އެންމެނަށް ވެސް އެނގޭ. ދުނިޔޭގެ ނިސްބަތުން ބެލިޔަސް ބޮޑު ކްލަބެއް. ލިވަޕޫލާ މެދު ޝައުގުވެރިކަން އޮންނަން މާ ގިނަ ކަންތައްތަކެއްގެ އޮޅުންފިލުވައިދިނުން މުހިންމު ކަމަށް ނުފެންނަނީ ލިވަަޕޫލަކީ ކޮބައިކަން އެނގޭނެތީ،" އިރައޯލާ ބުންޏެވެ.
އޭނާ ބުނީ، ލިވަޕޫލުން ލިބުނު ފުރުސަތާއެކު އެންމެ ރަނގަޅު ލެވަލްގެ ކުޅުންތެރިންނާ އެކު މަސައްކަތްކޮށް، ތަށްޓައް ވާދަކުރުމުގެ އެ ޗެލެންޖުތައް ނަގައިގެން ކުރިއަށް ދިއުމަށް ފުރުސަތު އެބައޮތް ކަމަށެވެ.
"މަގާމަކާ ހަވާލުވާއިރު ހުރިހާ ކަމެއްގެ ޔަގީންކަމެއް ނުދެވޭނެ. ވައުދެއް ނުވެވޭނެ ވަކި ކަމެއްގެ. ދެން، ޔަގީންކަމެއް. އަހަންނަށް އެނގޭ ކޮން ކަމެއްކަން އަހަރެންގެ ފަރާތުން އުންމީދުކުރަނީ. ކޮން ހާލަތެއްގައިކަން މި އޮތީ، އަހަރެން މި ޗެލެންޖަށް ތައްޔާރު،" އެތުލެޓިކް ބިލްބާއޯ އާއި ނިއު ޔޯކް ސިޓީގެ ކުރީގެ މިޑްފީލްޑަރު، އިރައޯލާ ބުންޏެވެ.
މީގެ އަށް އަހަރު ކުރިން އިރައޯލާ ކޯޗިން ކެރިއަރު ފެށީ ސައިޕްރަސްގެ އޭއީކޭ ލަނާކާ އިންނެވެ. އެ ޓީމަށް 2018-2019 ސީޒަނުގައި ކޯޗުކޮށްދިނުމަށް ފަހު، ޖެހިގެން އައި ސީޒަނުގައި، ސްޕެއިނުގެ މިރަންޑެސް އަށް ކޯޗުކޮށްދިންނެވެ. އެ ކްލަބްގައި ކުރި މަސައްކަތް ރަނގަޅުވުމުން 2020-2023 އަށް ރަޔޯ ވަޔެކާނޯގައި ކޯޗުކޮށްދޭން ފުރުސަތެއް ލިބުނެވެ.
ވަޔެކާނޯ އަށް ފަހު، ދެން، އިރައޯލާ ފެނުނީ ބޯންމައުތުގެ ކޯޗެއްގެ ގޮތުގަ އެވެ. އިރައޯލާ، ބޯންމައުތުގެ ކޯޗުކަމާ ހަވާލުވީ 2023 ވަނަ އަހަރުގެ ޖޫން މަހު އެވެ. އެއީ، އޭރު އެ ޓީމުގެ ކޯޗަކަށް ހުރި ގެރީ އޮނީލް ވަކިކުރުމަށް ފަހު ބޯންމައުތު މެނޭޖްމަންޓުން ގެނައި ބަދަލެކެވެ. އިރައޯލާ އަށް ދެ އަހަރުގެ ކޮންޓްރެކްޓެއް އެންމެ ފުރަތަމަ ބޯންމައުތުން ދިންއިރު، ފަހުން އެ އެއްބަސްވުން އާ ކޮށް މި ސީޒަން ނިމުމުން އޭނާ ބޯންމައުތު ދޫކޮށްލީ، ތިން އަހަަރު އެ ޓީމުގައި ހޭދަކޮށްފަ އެވެ.
