ސަރުކާރުން ކުރިއަށްގެންދާ ކަމަށް ބުނާ ސަލްޓަން ޕާކާއި ރަސްފަންނު މަރާމާތުކުރުމުގެ މަސައްކަތުގައި އެއްވެސް ކުރިއެރުމެއް ނުލިބޭތީ އެ ދެ މަޝްރޫއުގެ މަސައްކަތް މާލެ ސިޓީ ކައުންސިލުން ކުރިއަށްގެންދަން އިއްޔެ ފާސްކޮށްފި އެވެ.
ހައުސިން މިނިސްޓަރު ޑރ. އަބްދުﷲ މުއްތަލިބަށް މާލެ ސިޓީގެ މޭޔަރު އާދަމް އާޒިމް ފޮނުއްވި ސިޓީއެއްގައި ވިދާޅުވީ މިނިސްޓްރީން އެދިގެން ސަލްޓަން ޕާކާއި ރަސްފަންނު މަރާމާތުކޮށް ތަރައްގީކުރަން ހަވާލުކުރި ފަހުން މަސައްކަތާ ގުޅޭގޮތުން މައުލޫމާތު ސާފުކުރަން ތަކުރާރުކޮށް ކައުންސިލުން ފޮނުވި އެއްވެސް ސިޓީއަކަށް މިނިސްޓްރީން ޖަވާބު ދީފައި ނުވާ ކަމަށެވެ.
"މަސައްކަތް އިންތިހާއަށް ލަސްވަމުންދިޔުމާއި، މަޝްރޫއުގެ އެއްވެސް ކުރިއެރުމެއް ނެތުމާއި، ތަކުރާރުކޮށް މައުލޫމާތަށް އެދުމުންވެސް ޖަވާބެއް ލިބިފައި ނުވުމާއި، އަދި އާންމުންނަށް މުހިންމު މިފަދަ ތަންަން ބަންދުކޮށްފައި ހުރުމުގެ ސަބަބުން އާންމުންގެ ކަންބޮޑުވުން އިތުރުވަމުންދާތީ، 12 އޮގަސްޓް 2026 ގައި ބޭއްވުނު މާލެ ސިޓީ ކައުންސިލުގެ 12 ވަނަ ޖަލްސާގައި ވަނީ، ސަލްޓަން ޕާކާއި ރަސްފަންނު ތަރައްގީކުރުމުގެ މަސައްކަތް މާލެ ސިޓީ ކައުންސިލުން ކުރިއަށްގެންދަން ފާސްކޮށްފައި،" ސިޓީގައި ބުންޏެވެ.
ސަލްޓަން ޕާކުގެ މަސައްކަތް އެމްއެންޑީއެފްއާ ހަވާލުކޮށްފައިވާ ކަމަށް ރައީސް އޮފީހުގެ ވެބްސައިޓުގައި ޝާއިއުކޮށްފައިވާކަން ފާހަގަކޮށް ކައުންސިލުން ބުނީ އެތަން ތަރައްގީކޮށް ބެލެހެއްޓުމުގެ ޒިންމާ އާރްޑީސީއާ ހަވާލުކޮށްފައިވާ ކަމަށް މިނިސްޓްރީން ކުރިން ދީފައިވާ މައުލޫމާތު ފުށުއަރާ ކަމަށެވެ.
މީގެއިތުރުން ސަލްޓަން ޕާކާއި ރަސްފަނު ތަރައްގީކުރުމުގެ މަޝްރޫއުގެ އެއްވެސް އަޕްޑޭޓެއް ހިއްސާކޮށްފައި ނުވުމާއި، އާންމުކޮށް ލިބެންހުރި މައުލޫމާތުތަކުގައި ފުށުއެރުންތައް ހުރުމުގެ ސަބަބުން މަޝްރޫއުގެ މަސައްކަތާމެދުވެސް މިހާރު ސުވާލު އުފެދޭ ކަމަށެވެ.
އެމްޓީސީސީ އިން ރަސްފަންނު ސަރަހައްދު މަރާމާތު ކުރުމަށްފަހު އަލުން ހުޅުވިއިރު، އެ ސަރަހައްދުގެ މޫދު ތަގައްޔަރުވެފައިވާ މައްސަލަ ހައްލުކުރީ ސިޓީ ކައުންސިލުންނެވެ. މިދިޔަ ޖުލައި މަހު އާޒިމް ވިދާޅުވީ ރަސްފަންނު ސަރަހައްދު އެމްޓީސީސީން މަރާމާތުކޮށްފައި އޮތީ އެކަން ކުރަންޖެހޭ ގޮތަށް ނޫން ކަމަށެވެ.
އާޒިމް އޭރު ވިދާޅުވީ ރަސްފަންނު މަރާމާތު ކުރުމުގެ މަސައްކަތާ ސަރުކާރުން ހަވާލުވީ އެ ސަރަހައްދު މަރާމާތު ކުރުމަށްޓަކައި ސިޓީ ކައުންސިލުން މަސައްކަތަކެއްކޮށް، ކޮންޓްރެކްޓުކޮށް ބަޔަކާ އެ މަސައްކަތް ހަވާލު ވެސް ކޮށްފައި ވަނިކޮށް ކަމަށެވެ.
މަރާމާތު ކުރުމަށްޓަކައި މިދިޔަ އޭޕްރިލް 9، އިން ފެށިގެން ރަސްފަންނު ބަންދުކޮށްފައި ބޭއްވުމަށްފަހު، އެ ސަރަހައްދު އަލުން ހުޅުވައިލީ މިދިޔަ ޖޫން 12، ގަ އެވެ.
ރައީސް އަބްދުﷲ ޔާމީންގެ ވެރިކަމުގައި ތަރައްގީކުރި ރަސްފަންނު ބެލެހެއްޓުން އޭރުން ފެށިގެން ހަވާލުކޮށްފައި އޮތީ އެމްޓީސީސީއާ އެވެ. ނަމަވެސް އެތަން ރަނގަޅަށް ބަލަހައްޓަމުން ނުދާނީ އެ އެއްބަސްވުން މިހާރު ބާތިލްކޮށްފައިވާ ކަމަށް ސިޓީ ކައުންސިލުން ބުނެ އެވެ.
ބަޖެޓު ނެތް ކަމަށް ބުނެ އެމަނިކުފާނުގެ މޭޔަރު ކަމުގައި ތަރައްގީ ނުކުރި ޕާކުތައް ވިރާނާވާތީ މުހައްމަދު މުއިއްޒު ފެބްރުއަރީ 14، 2025، ގައި ވަނީ ހިތާމަ ފާޅުކުރައްވާފަ އެވެ. އެމަނިކުފާނު ވިދާޅުވީ ރަސްފަންނާއި ސަލްޓަންޕާކު ވީރާނާވަމުންދާތީ، އެ ދެ ތަނުގެ ރީތިކަމާއި އާރޯކަން އަނބުރާ ގެނެސްދީ އަދި ކުރިއަށްވުރެ ފުރިހަމަ ކޮށްދިނުމަށް ސަރުކާރުން މަސައްކަތްތަކެއް ކުރާނެ ކަމަށެވެ.
