ނިމިދިޔަ ސަރުކާރުން ހަވާލުކޮށްފައިވާ ހެލްތު ސެކްޓާގެ 16 މަޝްރޫއުއެއް ހިނގަމުންދަނިކޮށް ހުއްޓުވީ މި ސަރުކާރުން ކަމަށް އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ބުނެފި އެވެ.
މިދިޔަ އެމްޑީޕީ ސަރުކާރުން ހަވާލުކުރި 16 މަޝްރޫއެއް ކުރިއަށްނުގޮސް ހުއްޓިފައިވާ ކަމަށް ހެލްތު މިނިސްޓަރު ގީލާ އަލީ ވިދާޅުވި ވާހަކައަށް ރައްދުދީ އެމްޑީޕީން ނެރުނު ނޫސް ބަޔާނެއްގައި ބުނީ އެ މަޝްރޫއުތައް ހިނގަމުންދަނިކޮށް ހުއްޓުވީ މި ސަރުކާރުން ކަމަށެވެ.
އެމްޑީޕީން ބުނީ މަޝްރޫއުތައް ހަވާލުކޮށްފައިވާ ކޮންޓްރެކްޓަރުންނާއެކު ހަދާފައިވާ އެއްބަސްވުންތައް މި ސަރުކާރުން ވެރިކަމަށް އައިސް އާންމުންނަށް ގެއްލުންވާ ގޮތަށް ބާތިލުކޮށް އެ މަޝްރޫއުތައް ބޮޑު އަގުގައި ސަރުކާރުގެ އެކި އެސްއޯއީތަކާ މިހާރު ހަވާލުކޮށްފައިވާ ކަމަށެވެ.
އެމްޑީޕީ ސަރުކާރުން މަޝްރޫއުތައް ހަވާލުކޮށްފައިވަނީ މިނިސްޓްރީ އޮފް ފިނޭންސްއިން ނޭޝަނަލް ޓެންޑާ ބޯޑް މެދުވެރިކޮށް ނިންމަންޖެހޭ ހުރިހާ މަރުހަލާއެއް ނިންމުމަށްފަހުކަން ފާހަގަކޮށް އެ ޕާޓީން ބުނީ މަޝްރޫއުތަކުގެ އެއްބަސްވުންތައް ބާތިލުކުރުމުން ލިބުނު ގެއްލުމުގެ ފުރިހަމަ ޒިންމާ ނަގަން ޖެހޭނީ "މިއަދުގެ ނާގާބިލު ސަރުކާރުން" ކަމަށެވެ.
އެމްޑީޕީ ސަރުކާރުން ހަވާލުކުރި ބައެއް މަޝްރޫއުތައް:
- ހއ. އިހަވަންދޫ ހޮސްޕިޓަލް މަޝްރޫއު
- ހއ. ކެލާ ހޮސްޕިޓަލް މަޝްރޫއު
- ށ. ކަނޑިތީމު ހެލްތު ސެންޓަރު މަޝްރޫއު
- ށ. ފުނަދޫ ހޮސްޕިޓަލް މަޝްރޫއު
- ރ. އިނގުރައިދޫ ހެލްތު ސެންޓަރު މަޝްރޫއު
- ފ. ފީއަލީ ހެލްތު ސެންޓަރު މަޝްރޫއު
- ނ. ފޮއްދޫ ހެލްތު ސެންޓަރު މަޝްރޫއު
- ނ. ކުޑަފަރީ ހެލްތު ސެންޓަރު މަޝްރޫއު
މީގެއިތުރުން އެމްޑީޕީން ބުނީ ކުވައިތު ފަންޑުގެ އެހީގައި ކުރިއަށް ގެންދިޔަ ކ. ތުލުސްދޫ ހޮސްޕިޓަލް މަޝްރޫ އާއި ނ. ވެލިދޫ ހޮސްޕިޓަލް މަޝްރޫއު އަދި ށ. މިލަންދޫ ހޮސްޕިޓަލް މަޝްރޫއު ހަވާލުކޮށްފައިވާ އިންޑިއާ ކޮންޓްރެކްޓަރާއެކު ހަދާފައިވާ އެއްބަސްވުން މިދިޔަ އަހަރު ބާތިލުކުރުމުން، އެ ކޮންޓްރެކްޓަރުން ވަނީ ލިބުނު ގެއްލުމުގެ ބަދަލެއްގެ ގޮތުގައި 70 މިލިއަނަށްވުރެ ގިނަ ރުފިޔާ ހޯދަން ސަރުކާރަށް ހުށަހަޅާފައި ކަމަށެވެ.
ކޮންޓްރެކްޓާ ފައިނޭންސް އުސޫލުން ސްޕެއިންގެ އެގްޒިމް ބޭންކްގެ އެހީގައި އެމްޓީސީސީ މެދުވެރިކޮށް އިމާރާތްކުރަން ހަވާލުކޮށްފައިވާ ލ. ގަމު ޓާޝަރީ ހޮސްޕިޓަލް އަދި ގައްދޫ ހޮސްޕިޓަލްގެ މަސައްކަތް ވެސް މި ސަރުކާރުން ވަނީ ހުއްޓުވާފައި ކަމަށް އެމްޑީޕީން ބުންޏެވެ.
އެ ޕާޓީން ބުނީ މިދިޔަ ސަރުކާރުން ސައުދީ ފަންޑް ފޯ ޑެވޮލޮޕްމަންޓްއަށް ހުށަހަޅައިގެން އއ. ރަސްދޫ ހޮސްޕިޓަލް މަޝްރޫއު، ނ.މަނަދޫ ހޮސްޕިޓަލް މަޝްރޫއު އަދި ޏ. ފުވައްމުލަށް ހޮސްޕިޓަލް މަޝްރޫއަށް 50 މިލިއަން ޑޮލަރު ހޯދާފައި ވަނިކޮށް މި ސަރުކާރުން ވަނީ އޭގެތެރެއިން އއ. ރަސްދޫގެ ބަދަލުގައި ފ. ނިލަންދޫ އަދި ނ. މަނަދޫގެ ބަދަލުގައި ލ. ފޮނަދޫގައި އޭގެ ތެރެއިން ދެ ހޮސްޕިޓަލް އަޅަން ނިންމާފައި ކަމަށެވެ.
