އޮސްޓްރޭލިއާގައި އުމުރުން 16 އަހަރުން ދަށުގެ ކުދިން ސޯޝަލް މީޑިއާ ބޭނުންކުރުން މަނާކުރި ގާނޫނަށް އަމަލުކުރަން ފެށި ފަހުން، އެ އުމުރުފުރައިގެ ކުދިންގެ ކަމަށް ޝައްކުކުރެވޭ 750،000 އަށް ވުރެ ގިނަ އެކައުންޓް، ފޭސްބުކް އަދި އިންސްޓަގްރާމްގެ މައި ކުންފުނި، މެޓާއިން އުވާލައިފި އެވެ.
އޮސްޓްރޭލިއާގައި ސޯޝަލް މީޑިއާ މަނާކުރި ގާނޫނަށް އަމަލުކުރަން ފެށި މިދިޔަ ޑިސެމްބަރު މަހުން ފެށިގެން ޖޫން މަހުގެ ނިޔަލަށް، އިންސްޓަގްރާމުން ޝައްކުކުރެވޭ 462،000 އެކައުންޓް އަދި ފޭސްބުކުން 294،000 އެކައުންޓް މެޓާއިން ވަނީ އުވާލާފަ އެވެ. މިއީ މިއަހަރުގެ ޖެނުއަރީ މަހުގެ ނިޔަލަށް އެ ކުންފުނިން އުވާލި ކަމަށް ބުނާ އިންސްޓަގްރާމްގެ 331،000 އެކައުންޓާއި ފޭސްބުކްގެ 173،000 އެކައުންޓާ އަޅާބަލާއިރު ބޮޑު އިތުރުވުމެކެވެ.
ދުނިޔޭގެ އެންމެ ބޮޑު ސޯޝަލް މީޑިއާ ކުންފުނިން ބުނާ ގޮތުގައި، އެ ކުންފުނިން މަސައްކަތް ކުރަނީ އެ ގާނޫނަށް ފުރިހަމައަށް ބޯލެނބުމަށެވެ. ނަމަވެސް، މެޓާ އާއި އެހެނިހެން ޕްލެޓްފޯމްތަކުން ވަނީ މީގެ ކުރިން މި ގާނޫނާ ދެކޮޅަށް ވަރަށް ބޮޑަށް އަޑުއުފުލާފަ އެވެ. މެޓާގެ މި ބަޔާން އައިސްފައި މިވަނީ، ގާނޫނަށް އަމަލުކުރުމަށް އެކަށީގެންވާ ފިޔަވަޅުތައް އަޅާފައި ނުވާ ކަމަށް ބުނެ، މެޓާގެ ބައެއް ޕްލެޓްފޯމްތައް ހިމެނޭހެން އެކި ކުންފުނިތަކާ ދެކޮޅަށް ދައުވާ ކުރުމަށް އޮސްޓްރޭލިއާގެ އިންޓަނެޓް ރެގިއުލޭޓަރުން ވިސްނަމުންދާ ދަނޑިވަޅެއްގަ އެވެ.
މެޓާއިން ހާމަކުރި ފަދަ ތަފާސްހިސާބުތަކެއް އެހެން އެއްވެސް ޕްލެޓްފޯމަކުން މިހާތަނަށް އާންމުކޮށްފައެއް ނުވެ އެވެ. ނަމަވެސް، އޮސްޓްރޭލިއާ ސަރުކާރުގެ ހިސާބުތަކާއި މިނިވަން ދިރާސާތަކުން ދައްކާ ގޮތުގައި، މި މަނާކުރުން ތަންފީޒުކުރަން ފެށި ފުރަތަމަ ތިން މަސްދުވަހުގެ ތެރޭގައި ވެސް، އުމުރުން 16 އަހަރުން ދަށުގެ ކުދިންގެ ތެރެއިން 80 އިންސައްތައަށް ވުރެ ގިނަ ކުދިން ދިޔައީ ސޯޝަލް މީޑިއާ ބޭނުންކުރަމުންނެވެ.
ކުޑަކުދިންނާއި ފުރާވަރުގެ ކުދިންގެ ނަފްސާނީ އަދި ޖިސްމާނީ ދުޅަހެޔޮކަމަށް ސޯޝަލް މީޑިއާގެ ސަބަބުން ކުރާ ނޭދެވޭ އަސަރުތަކާ މެދު ކަންބޮޑުވުން ފާޅުކޮށް، އޮސްޓްރޭލިއާ ސަރުކާރުން މި ތާރީހީ ގާނޫނު ހުށަހަޅައި ތަންފީޒުކުރަން ފެށީ މިދިޔަ ޑިސެމްބަރު މަހުގެ 10 ވަނަ ދުވަހު އެވެ.
ދުނިޔޭގެ އެހެން ގައުމުތަކުން ވެސް މިފަދަ އުމުރުގެ ހުރަސްތައް ކުރިމަތިކުރުމަށް ވިސްނަމުންދާއިރު، އޮސްޓްރޭލިއާ ސަރުކާރުން ވަނީ ސޯޝަލް މީޑިއާ ޕްލެޓްފޯމްތަކުން ގަސްދުގައި މި ގާނޫނު ނާކާމިޔާބު ކޮށްލަން އުޅޭ ކަމަށް ތުހުމަތުކޮށްފަ އެވެ. އަދި ގާނޫނާ ހިލާފުވާ ފަރާތްތަކަށް ދޭ އެންމެ ބޮޑު އަދަބު 99 މިލިއަން އޮސްޓްރޭލިއާ ޑޮލަރަށް (69.75 މިލިއަން އެމެރިކާ ޑޮލަރު) އިތުރުކޮށް، ކުންފުނިތަކުގެ ލިޔެކިޔުންތައް ބަލައި ފާސްކުރުމުގެ ބާރު ރެގިއުލޭޓަރުންނަށް ދިނުމަށް އާ ގާނޫނެއް ވެސް މިހާރު ވަނީ ތައާރަފުކޮށްފަ އެވެ.
