ފޭސްބުކްގެ މައި ކުންފުނި މެޓާއިން ތައްޔާރުކުރި އާޓިފިޝަލް އިންޓެލިޖެންސް (އޭއައި) މޮޑެލްއެއް ޓެސްޓުކުރުމުގެ ތެރޭގައި، އަމިއްލައަށް އިންޓަނެޓާ ގުޅިގެން އެހެން އިދާރާއެއްގެ ސިސްޓަމްތައް ހެކްކޮށްފައިވާ ކަމަށް އެ ކުންފުނިން ހާމަކޮށްފި އެވެ. މިއާއެކު މެޓާ ވެފައިވަނީ މިފަދަ ހާދިސާއެއް ދިމާވިކަން ހާމަކުރި އެންމެ ފަހުގެ ޓެކްނޮލޮޖީ ކުންފުންޏަށެވެ.
މެޓާއިން ބުނި ގޮތުގައި މި ހާދިސާ ހިނގާފައިވަނީ މިނިވަން ކުންފުންޏަކުން އެ މޮޑެލް އިވެލުއޭޓް ކުރަމުން ދަނިކޮށެވެ. މިއީ އޭއައި ކުންފުނިތަކުން މިފަދަ ހާދިސާއެއް ހާމަކުރި ހަތަރުވަނަ ފަހަރެވެ.
މީގެކުރިން އޯޕަން އޭއައި އާއި އެންތްރޮޕިކްގެ މޮޑެލްތަކުން ވެސް މިފަދަ ގޮތަކަށް ސިސްޓަމްތަކަށް ވަދެފައިވާތީ، ސައިބަ ސެކިއުރިޓީއާ މެދު އޮތް ކަންބޮޑުވުންތައް ވަނީ އިތުރުވެފަ އެވެ. އަދި މިކަމާ ގުޅިގެން އޭއައި މޮޑެލްތަކުގެ ރައްކާތެރިކަން ވަރުގަދަކުރުމަށާއި، މިހާރަށްވުރެ ހަރުދަނާ ގޮތެއްގައި ޓެސްޓުތައް ކުރިއަށް ގެންދިއުމަށް ގޮވާލާ އަޑުތައް ވަނީ ގަދަވެފަ އެވެ.
މި ހެކް ކުރުމުގެ ހާދިސާ ތަހުގީގު ކުރަމުންދާ ކަމަށް މެޓައިން ބުންޏެވެ. މީގެ އިތުރުން، މެޓާއިން ބުނި ގޮތުގައި މި ހާދިސާއަކީ މީގެ ކުރިން އެހެން ކުންފުނިތަކަށް ދިމާވި ކަންތައްތަކާ އެއްގޮތް ހާދިސާއެކެވެ.
މެޓާއިން ހާމަކުރި ގޮތުގައި މި ސެކިއުރިޓީ ޓެސްޓުތައް ކުރިއަށް ގެންގޮސްފައިވަނީ "އިރެގިއުލާ" ކިޔާ އޭއައި ސެކިއުރިޓީ މަސައްކަތް ކުރާ ކުންފުންޏަކުންނެވެ. މިއީ އެންތްރޮޕިކްގެ އޭއައި މޮޑެލް ޓެސްޓުކުރި ކުންފުނި ވެސް މެއެވެ. އެންތްރޮޕިކްގެ އެ ޓެސްޓުގެ ތެރޭގައި އެ ކުންފުނީގެ އޭއައި މޮޑެލް ވަނީ އެހެން ތިން ކުންފުންޏެއްގެ ސިސްޓަމްތަކަށް ވަދެފަ އެވެ.
އިރެގިއުލާ ކުންފުނީގެ ތަރުޖަމާނަކު ބުނީ، މެޓާއަށް ދިމާވި މި ހާދިސާއަކީ މިދިޔަ ހަފުތާގައި އެންތްރޮޕިކް އިން ހާމަކުރި ފަދަ، ޓެސްޓުކުރާ މާހައުލުގައި ދިމާވި މައްސަލައެއް ކަމަށެވެ.
އޭއައި އެޖެންޓުން ބޭނުންކޮށްގެން ސައިބަ ސެކިއުރިޓީ ޓެސްޓުތައް ރައްކާތެރިކަމާއެކު ކުރިއަށް ގެންދާނެ ގޮތުގެ ރިޕޯޓެއް ތައްޔާރުކުރުމުގެ މަސައްކަތް ކުރަމުންދާ ކަމަށް އިރެގިއުލާއިން ބުންޏެވެ.
މެޓާއިން ބުނީ މި ހާދިސާއާ ގުޅޭ ހުރިހާ ހަގީގަތްތަކެއް ސާފުވުމުން، އެކަމާ ގުޅޭ އިތުރު ތަފުސީލުތައް އާންމުކުރާނެ ކަމަށެވެ.
