މެޓާގެ ޕްލެޓްފޯމްތަކުން ކުޑަކުދިންނަށް ކުރިމަތިވާ ނުރައްކާތަކާމެދު އާންމުން ހޭލުންތެރިކުރުވުމުގައި އިހުމާލުވެފައިވާތީ، އިތުރު 567 މިލިއަން އެމެރިކާ ޑޮލަރުން އެ ކުންފުނި ޖޫރިމަނާކޮށްފި އެވެ.
މިއީ ކުޑަކުދިންގެ ރައްކާތެރިކަމާ ގުޅޭގޮތުން މެޓާއާ ދެކޮޅަށް ނެރުނު އެންމެ ބޮޑު ހުކުމެވެ.
މި މައްސަލަ ބެއްލެވި އެމެރިކާގެ ނިއު މެކްސިކޯ ކޯޓުގެ ފަނޑިޔާރު ބްރަޔަން ބީޑްޝެއިޑް ވިދާޅުވީ މެޓާ ކުންފުންޏަކީ ވައި ތަގައްޔަރުވުން ފަދަ "އާންމު އުނދަގުލެއް" ކަމަށެވެ.
މެޓާއިން މި ފައިސާ ޖަމާކުރަންޖެހޭނީ ކުރިމަގުގައި ލިބޭނެ ގެއްލުންތައް ކުޑަކުރުމަށް އުފައްދާ ހާއްސަ ފަންޑަކަށެވެ. މި ހުކުމާއެކު، މީގެ ކުރިން މި މައްސަލައިގައި ދައްކަން އަމުރުކުރި 375 މިލިއަން ޑޮލަރުގެ ޖޫރިމަނާއާއެކު، މެޓާއިން ދައްކަންޖެހޭ ޖުމްލަ އަދަދު މިހާރު ވަނީ 942 މިލިއަން ޑޮލަރަށް އަރާފައެވެ.
ފަނޑިޔާރު ބީޑްޝެއިޑް މެޓާ ސިފަކުރެއްވީ ކާރުހާނާއެއްގެ ގޮތުގައެވެ. އެއީ އިޝްތިހާރާއި ކޮންޓެންޓަކީ އޭގެ އުފެއްދުންތައް ކަމަށްވާއިރު، ކުޑަކުދިންނަށް ލިބޭ ނަފްސާނީ ގެއްލުމާއި ޖިންސީ ނާޖާއިޒު ފައިދާ ނެގުމަކީ އެ ކާރުހާނާއިން ބޭރުވާ އަދި ނައްތާލަންޖެހޭ "ތަގައްޔަރުކަން" ކަމަށް ފާހަގަކުރެއްވިއެވެ.
އިންސްޓަގްރާމް، ފޭސްބުކް، ވަޓްސްއެޕް އަދި ތްރެޑްސްގެ މައި ކުންފުނި މެޓާގެ ތަރުޖަމާނަކު ވިދާޅުވީ، ކޯޓުގެ މި ނިންމުމާ މެދު ހިތްހަމަނުޖެހޭ ކަމަށާއި، މި ނިންމުން އިސްތިއުނާފު ކުރާނެ ކަމަށެވެ.
މި ޕްލެޓްފޯމްތަކުގެ ރައްކާތެރިކަން ކަށަވަރުކުރުމަށް ގަދައަޅައި މަސައްކަތްކުރަމުންދާ ކަމަށާއި، ނުރައްކާތެރި ކޮންޓެންޓް ނައްތާލުމުގައި ހުރި ގޮންޖެހުންތަކާ މެދު ހާމަކަން ބޮޑު ގޮތެއްގައި ކަންކަން ހިއްސާކޮށްފައިވާނެ ކަމަށްވެސް މެޓާއިން ބުނެއެވެ.
މައްސަލައިގެ ފަސްފަހަތް
މި މައްސަލައަކީ ނިއު މެކްސިކޯގެ އެޓާނީ ޖެނެރަލްގެ އޮފީހުން 2023 ވަނަ އަހަރު ހުށަހެޅި މައްސަލައެކެވެ. މައްސަލައިގައި ބުނެފައިވަނީ މެޓާ ޕްލެޓްފޯމްތަކުން ކުޑަކުދިން ނުރައްކަލަށް ހުށަހެޅި، ޖިންސީ ބޭނުންތަކަށް ކުދިން ހޯދަން އުޅޭ މީހުންނާ ބައްދަލުވުމުގެ ފުރުސަތު ބޮޑުވާ ގޮތަށް އަމަލުކޮށްފައިވާ ކަމަށެވެ.
ޝަރީއަތުގެ ފުރަތަމަ މަރުހަލާގައި ސާބިތުވި ގޮތުގައި، މެޓާގެ ރެކޮމެންޑޭޝަން އަލްގޮރިޒަމްތަކުން ކުޑަކުދިން ނުރައްކާތެރި ކޮންޓެންޓްތަކަށް މަގުދައްކައި، ނިއު މެކްސިކޯގެ "އަންފެއާ ޕްރެކްޓިސަސް އެކްޓް" އާ ތަކުރާރުކޮށް ވަނީ ހިލާފުވެފަ އެވެ.
މެޓާއިން އުފައްދަންޖެހޭ ފަންޑުގެ ބޮޑު ބައެއް (420 މިލިއަން ޑޮލަރު) ހަރަދުކުރަންޖެހޭނީ ލިބިފައިވާ ގެއްލުންތަކުން ސަލާމަތްވުމަށް ކުދިންނަށް ދޭންޖެހޭ ނަފުސާނީ އަދި ކްލިނިކަލް ފަރުވާއަށެވެ۔ ބާކީ ފައިސާ ހަރަދުކުރާނީ މުދައްރިސުންނާއި ސިއްހީ އެހީތެރިން ހޭލުންތެރިކުރުވުމަށެވެ. މީގެ އިތުރުން ކޯޓުން ވަނީ މެޓާއަށް އަންނަނިވި ފިޔަވަޅުތައް އަޅަން އަމުރުކޮށްފަ އެވެ:
- 18 އަހަރުން ދަށުގެ އެއްވެސް އެކައުންޓެއް ބޮޑެތި މީހުންނަށް ރެކޮމެންޑް ނުކުރުން
- ބޮޑެތި މީހުންނަށް 18 އަހަރުން ދަށުގެ ކުދިންނަށް މެސެޖު ނުކުރެވޭ ގޮތް ހެދުން.
- ކުޑަކުދިންގެ ބަރަހަނާ ފޮޓޯ/ވީޑިއޯ ފޮނުވުމާއި ބަލައިގަތުން މަނާކުރުން.
- ކުޑަކުދިންގެ ޖިންސީ ނާޖާއިޒު ފައިދާ ނަގާ ބޮޑެތި މީހުންގެ އެކައުންޓްތައް "ވަން-ސްޓްރައިކް" އުސޫލުން ވަގުތުން ބަންދުކުރުން.
- 18 އަހަރުން ދަށުގެ ކުދިންގެ އެކައުންޓްތަކުން "ލައިކް" ކައުންޓްތައް އުނިކުރުން.
- ކޮންމެ ދުވަހެއްގެ ރޭގަނޑު 10:00 އިން ހެނދުނު 7:00 އަށް އަދި ކިޔަވާ ދުވަސްވަރުގެ ހެނދުނު 8:00 އިން މެންދުރުފަހު 3:00 އަށް 'ޕުޝް ނޮޓިފިކޭޝަން' މަނާކުރުން.
- އިންސްޓަގްރާމް އަދި ފޭސްބުކް ބޭނުންކުރެވޭނެ ގަޑިއިރު މަހަކު 90 ގަޑިއިރަށް (ދުވާލަކު ގާތްގަނޑަކަށް 3 ގަޑިއިރަށް) ލިމިޓްކުރުން.
