ބޮޑު މަގުބޫލުކަމެއް ލިބުނު ފިލްމު "ޖުރަސިކް ޕާކް" ގައި ޑރ. އެލަން ގްރާންޓްގެ ރޯލުން ފެނިގެންދިޔަ އަދި 50 އަށް ވުރެ ގިނަ ފިލްމު ކުޅެފައިވާ ނިއުޒީލެންޑުގެ މަޝްހޫރު އެކްޓަރު ސޭމް ނީލް، އުމުރުން 78 އަހަރުގައި މަރުވެއްޖެ އެވެ.
ނީލްގެ އާއިލާއިން ސޯޝަލް މީޑިއާގައި ހިއްސާކުރި ޕޯސްޓެއްގައި ބުނެފައިވަނީ، ސިޑްނީގައި އޭނާ މަރުވީ ކުއްލި ގޮތަކަށް ކަމަށެވެ. ނަމަވެސް، އޭނާ މަރުވިއިރު ކެންސަރު ބަލިން މުޅިން ރަނގަޅުވެފައި ހުރުމަކީ ލިބޭ ހިތްހަމަޖެހުމެއް ކަމަށް އާއިލާއިން ފާހަގަކުރި އެވެ. ލޭގެ ކެންސަރާ ދެކޮޅަށް ކުރި ހަނގުރާމައަށް ފަހު، އޭނާ ބަލިން ރަނގަޅުވެފައިވާ ކަމަށް ނީލް އިއުލާން ކުރީ މި އަހަރުގެ އޭޕްރީލް މަހުގެ ތެރޭގަ އެވެ.
ނީލް ވަނީ ތަފާތު އެކި ގިންތިތަކުގެ ފިލްމުތަކުގައި މުހިންމު ރޯލުތައް އަދާކޮށްފަ އެވެ. އޭގެ ތެރޭގައި 1990 ވަނަ އަހަރުގެ އެކްޝަން ތުރިލާ "ދަ ހަންޓް ފޯ ރެޑް އޮކްޓޯބާ" ގައި ކުޅުނު ރޯލާއި، 1981 ވަނަ އަހަރުގެ "އޯމެން III" ގައި ކުޅުނު ރޯލު ހިމެނެ އެވެ.
މީގެ އިތުރުން، އޭނާ ވަނީ ހިތްދަތި ދިރިއުޅުމެއް ދައްކުވައިދޭ ގިނަ ރޯލުތަކެއް ކުޅެފަ އެވެ. އޭގެ ތެރޭގައި އޮސްކާ އެވޯޑް ލިބުނު 1993 ވަނަ އަހަރުގެ ފިލްމު "ދަ ޕިއާނޯ" ގައި ހޮލީ ހަންޓާއާ އެކު އަދި 1988 ވަނަ އަހަރުގެ "އީވިލް އެންޖެލްސް" ގައި މެރީލް ސްޓްރީޕާ އެކު އޭނާ ކުޅުނު ރޯލުތައް ފާހަގަކޮށްލެވެ އެވެ.
އުތުރު އަޔަލެންޑުގެ އޮމާގް ނަމަކަށް ކިޔާ ރަށަކަށް އުފަން ނައިޖަލް ޖޯން ޑާމޮޓް ނީލް، ނިއުޒީލެންޑަށް ބަދަލުވީ އޭނާގެ އުމުރުން ހަތް އަހަރުގަ އެވެ. އެއީ ނިއުޒީލެންޑަށް ނިސްބަތްވާ އޭނާގެ ބައްޕަ އަސްކަރިއްޔާއިން ރިޓަޔާކޮށް، އެނބުރި ގައުމަށް ދާން ބޭނުންވުމުންނެވެ.
އޭނާގެ ނަން "ސޭމް" އަށް ބަދަލުކުރީ އުމުރުން 11 އަހަރުގަ އެވެ. 2023 ވަނަ އަހަރު ނެރުނު އޭނާގެ ހަނދާންތައް ބަޔާންކުރާ ފޮތް "ޑިޑް އައި އެވާ ޓެލް ޔޫ ދިސް؟" ގައި އޭނާ ލިޔެފައިވާ ގޮތުގައި، "ނައިޖަލް"ގެ ނަމުގައި ޕްރައިމަރީ ސްކޫލަކަށް ދިއުމަކީ އޭނާއަށް ކުރިމަތިވި ބޮޑު ގޮންޖެހުމެކެވެ.
އޭނާ ލިޔެފައިވާ ގޮތުގައި "ސޭމް" އަކީ ކިޔަން ފަސޭހަ، ރައްޓެހި ގޮތެއް ހުންނަ، އަދި ފިރިހެންވަންތަ ނަމެކެވެ.
ނީލްއަށް ފިލްމީ ދާއިރާގައި ބޮޑު ކުރިއެރުމެއް ލިބުނީ 1977 ވަނަ އަހަރު ނިއުޒީލެންޑުން އުފެއްދި ކުޑަ ބަޖެޓް ފިލްމު "ސްލީޕިންގް ޑޮގްސް" އިންނެވެ. މި ފިލްމުން ލިބުނު މަގުބޫލުކަމާއެކު، އަވަށްޓެރި އޮސްޓްރޭލިއާގެ ބޮޑު ބަޖެޓް ފިލްމުތަކުން އޭނާއަށް ފުރުސަތުތައް ލިބެން ފެށި އެވެ.
ނީލް ވަނީ ތިން ގޯލްޑަން ގްލޯބް އެވޯޑަށާއި ދެ ޕްރައިމްޓައިމް އެމީ އެވޯޑަށް ނޮމިނޭޓްވެފަ އެވެ. އަދި އޮސްޓްރޭލިއާގެ ޓީވީ އެވޯޑް ތިން ފަހަރު ހޯދާފައިވެ އެވެ.
ފިލްމީ ދާއިރާއަށް ކޮށްދީފައިވާ އަގުހުރި ޚިދުމަތްތަކުގެ އަގުވަޒަންކޮށް ދޭ "ނައިޓްހޫޑް" ލަގަބު، އެތައް އަހަރެއް ވަންދެން އިންކާރު ކުރުމަށް ފަހު އޭނާ ގަބޫލުކުރީ 2022 ވަނަ އަހަރު އެވެ.
ދެ ކައިވެންޏެއްކޮށް، ދެ ކައިވެނި ވެސް ރޫޅިފައިވާ މި އެކްޓަރު، އޭނާގެ ހަޔާތުގެ ފަހު އަހަރުތަކުގެ ބޮޑު ބައެއް ހޭދަކުރީ އޮސްޓްރޭލިއާގަ އެވެ.
ނީލް މަރުވިއިރު، އޭނާގެ ދެ ފިރިހެން ދަރިންނާއި ދެ އަންހެން ދަރިން ދުނިޔޭގައި އެބަތިއްބެވެ.
