ރާއްޖޭގައި މަސައްކަތް ކުރާ ޑޮކްޓަރުންގެ ތެރެއިން 60 ޕަސެންޓު މީހުންނަކީ ބިދޭސީން ކަމަށް ހެލްތު މިނިސްޓަރު ގީލާ އަލީ ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް ހާޒިރުކޮށް މެންބަރަކު ކުރެއްވި ސުވާލަކަށް ޖަވާބުދެއްވަމުން ގީލާ ވިދާޅުވީ ސިއްހީ ދާއިރާގައި މަސައްކަތް ކުރާ ދިވެހީންގެ އަދަދު އިތުރު ކުރުމަށްޓަކައި މަސައްކަތްތަކެއް މިހާރު ވެސް ކުރަމުން ގެންދާ ކަމަށެވެ.
"އަޅުގަނޑުމެން އުއްމީދުކުރަނީ މި ސިއްހީ ހިދުމަތަކީ ގިނަ އަދަދެއްގެ ދިވެހިންނާއެކު ފޯރުކޮށްދެވޭ ހިދުމަތަކަށް ވާނެ ކަމަށް އަދި އެކަންކަމަށްޓަކައި މޯލްޑިވްސް ނޭޝަނަލް ޔުނިވާސިޓީގައި ތަމްރީނުތައް ފޯރުކޮށްދެވެމުން ގެންދެވޭ،" ގީލާ ވިދާޅުވި އެވެ.
ސިއްހީ ދާއިރާގެ ކޯސްތަކަށް ގިނަ ދިވެހީން ކުރިމަތިލައި އެ ދާއިރާގައި މަސައްކަތްކުރާ ދިވެހީންގެ އަދަދު އިތުރުވާނެކަމަށް އުއްމީދުކުރައްވާ ކަމަށް އެކަމަނާ ވިދާޅުވި އެވެ.
ރާއްޖޭގެ އެކި ކަންކޮޅުގައި 12،000 އަށްވުރެ ގިނަ މުވައްޒަފުން ސިއްހީ ދާއިރާގައި މަސައްކަތް ކުރާއިރު، އޭގެތެރެއިން 3000 އަށްވުރެ ގިނަ މުވައްޒަފުންނަކީ ބިދޭސީން ކަމަށް ގީލާ ވިދާޅުވި އެވެ.
އޭނާ ވިދާޅުވީ އެ 12،000 ގެ ތެރެއިން 7000 އެއްހާ މުވައްޒަފުންނަކީ އަތޮޅުތަކުގައި މަސައްކަތްކުރާ މުވައްޒަފުން ކަމަށެވެ. ބާކީ 5000 އެއްހާ މުވައްޒަފުން މަސައްކަތް ކުރަނީ މާލެ ސަރަހައްދުގައި ކަމަށް އޭނާ ވިދާޅުވި އެވެ.
