އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން އަންނަ ބުރާސްފަތި ދުވަހުގެ ރޭ "ދަތިވެއްޖެ" ނަމުގައި ބޭއްވުމަށް ހަމަޖެހިފައިވާ މުޒާހަރާ މަޖީދީ މަގުން ކުރިއަށްގެންދަން ފުރުސަތު ނުދެވޭނެ ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ޖަލްސާގައި އިހުސާން ވިދާޅުވީ އެމްޑީޕީން މަޖީދީ މަގުން މުޒާހަރާ ކުރަން ހުށަހަޅާފައިވާ ގަޑިއަކީ ބާރުބޮޑު ގަޑިއަކަށްވާތީ އެ ގަޑީގައި މުޒާހަރާ ކުރުމުގެ ފުރުސަތު ނުދެވޭނެ ކަމަށެވެ.
"އަޅުގަނޑަށް އެނގިފައިވާ ގޮތުގައި މިހާރު [އެމްޑީޕީން] އެދިވަޑައިގެންފައި އޮތް ވަގުތަކީ ހުކުރު ދުވަހެއްގެ ރޭގަނޑު ވަގުތެއް ކަމަށްވާތީވެ، އާންމު ގޮތެއްގައި ކާރޫބާރު ވަރަށް ބޮޑުކޮށް އޮންނަ ގަޑިއަކަށްވާތީވެ އެ ގަޑީގައި އެތަނަށް ނުދެވޭނެ،" އިހުސާން ވިދާޅުވި އެވެ.
މުޒާހަރާކޮށް ޝުއޫރު ފާޅުކުރުމަށް ފުޅާކޮށްފައި އޮތް މަގުތައް ބޭނުން ކުރައްވަން އިހުސާން އެދިވަޑައިގެންނެވި އެވެ. އެގޮތުން މިނިސްޓަރު ވިދާޅުވީ މުޒާހަރާއަށް މިހާރު ހުއްދަ ދީފައިވަނީ ބޭރުމަގު އާޓިފިޝަލް ބީޗުން ފެށިގެން ގާތްގަނޑަކަށް ކަޅުތުއްކަލާ ކޮއްޓާ ހިސާބަށް ކަމަށެވެ.
މީގެއިތުރުން އަމީނީ މަގުގެ މަސައްކަތް ކުރިއަށްދާތީ އެ މަގުގައިވެސް މުޒާހަރާ ކުރުމުގެ ފުރުސަތު މިވަގުތު ދެވެން ނެތް ކަމަށް އިހުސާން ވިދާޅުވި އެވެ.
އިހުސާން މިހެން ވިދާޅުވެފައިވާއިރު އެމްޑީޕީގެ މުޒާހަރާ ކުރިއަށް ގެންދެވެން އޮތް ހަމައެކަނި މަގަކީ މަޖީދީ މަގު ކަމަށް އެ ޕާޓީން ވަނީ ފުލުހުންނާ ބައްދަލުކޮށް ބުނެފަ އެވެ.
މަޖީދީ މަގުން މުޒާހަރާ ކުރިއަށްގެންދަން އެދުނީ ގިނަ ގެތައް މަޖީދީ މަގު ސަރަހައްދުގައި ހުންނާތީ، ގިނަ އަދަދެއްގެ ރައްޔިތުންނާ ހިސާބަށް އަޑު ފޯރާވަރަށް ޝުއޫރު ފާޅުކުރުމަށް ކަމަށް އެމްޑީޕީން ބުންޏެވެ.
އެމްޑީޕީގެ މުޒާހަރާ އޮގަސްޓް 13، ވާ ބުރާސްފަތި ދުވަހުގެ ރޭ 20:30 ގައި ފެށުމަށް ހަމަޖެހިފައިވަނީ މަޖީދީ މަގު، ސޯޝަލް ސެންޓަރު ކުރިމަތިންނެވެ.
"ދަތިވެއްޖެ" ނަމުގައި މި މުޒާހާރާ ބޭއްވުމަށް ރާވަމުންދަނީ ތަކެތީގެ އަގު އިންތިހާއަށް ބޮޑުވެފައިވާތީ އެވެ. ސަރުކާރުން އާންމު ތަފާސްހިސާބުތަކަށް ބަލާއިރު، އަހަރެއްގެ ތެރޭގައި އަސާސީ ކާބޯތަކެތީގެ އަގު ވަނީ އަށް ޕަސެންޓު އުފުލިފަ އެވެ.
