ސަރުކާރުގެ ތަރައްގީގެ މަޝްރޫއުތައް ހިންގުމަށްޓަކައި ރަށްތަކާއި ސިޓީ ކައުންސިލުތަކުގެ އިހުތިސާސުން ބިންތަކާއި ތަންތަން މައި ސަރުކާރުން ބޭނުން އިރެއްގައި ވަކިކޮށް، އެ ތަންތަން ސަރުކާރަށް ނެގޭ ގޮތަށް ގާނޫނަށް ގެންނަން ހުށަހެޅި އިސްލާހާއެކު ރައްޔިތުންގެ ބިންތައް ވެސް ކެބިނެޓަށް ނަގައި ބޭނުން ބަޔަކަށް ދެވޭނެ ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
އެ ބިލާ ދެކޮޅަށް އަޑުއުފުއްލަވަން މަޖިލިސް ކައިރިއަށް ވަޑައިގެން ނޫސްވެރިންނާ ވާހަކަ ދައްކަވަމުން ނަޝީދު ވިދާޅުވީ ބިލު މިހާރު އޮތް ގޮތުން ކޮންމެ ރައްޔިތެއްގެ ބިމެއް ވެސް ކެބިނެޓުން ބޭނުންވެއްޖެނަމަ ނަގާފައި އެހެން ބަޔަކަށް ދެވޭ ގޮތަށް އޮތުން ގާނޫނުއަސާސީއާ ހިލާފުވާނެ ކަމަށެވެ.
"އެންމެ ބޮޑުވާހަކައަކީ ރާއްޖޭގެ ކޮންމެ ރައްޔިތެއްގެ ވެސް ބިން، ކޮންމެ ރަށެއްގައި ހުރި ކޮންމެ މީހެއްގެ ވެސް ބިން މިހާރު ކެބިނެޓަށް ނަގާފައި ކެބިނެޓުން ބޭނުންވާ ފަރާތަކަށް އެ ބިން ދެވޭނެއޭ. މިއީ ރާއްޖޭގެ ގާނޫނުއަސާސީ ހުއްދަކުރާ ކަމެއް ނޫން. އެހެންވީމަ މި ބިލެއް އަޅުގަނޑު ހިތުން ރައްޔިތުންގެ މަޖިލީހުގައި ބަހުސް ކުރުމުގެ ފުރުސަތެއް ވެސް ނެތް،" ނަޝީދު ވިދާޅުވި އެވެ.
މި އިސްލާހަކީ ވިސްނާނުލައި ހުށަހަޅުއްވާފައިވާ ބިލެއްކަން ފާހަގަކުރައްވާ ނަޝީދު ވިދާޅުވީ އެ ބިލު ބޭރުކޮށްލަން ޖެހޭ ކަމަށެވެ. އޭގެއިތުރުން އެމަނިކުފާނު ވިދާޅުވީ އެ ބިލު މަޖިލީހުން ފާސްކޮށްފިނަމަ، ރައީސް މުހައްމަދު މުއިއްޒު އެ ބިލު ތަސްދީގުކުރައްވައިގެން ނުވާނެ ކަމަށެވެ.
ނަޝީދު ވިދާޅުވީ ބިލުގެ ސަބަބުން މީހުންގެ ގޯތިތައް ނުގަވައިދުން ނެގުމަށް ފުރުސަތު ފަހިވަމުންދާ ކަމަށާއި އެކަމަށް ރައްޔިތުން ވަރިހަމަވެގެން ތިބޭނެ ތަނެއް ނުފެންނަ ކަމަށެވެ.
ކައުންސިލްތަކުން ބަލަހައްޓާ ބިންތައް ރަށްރަށުގެ އިހުތިސާސުން ވަކިކޮށް ސަރުކާރަށް ނެގޭ ގޮތަށް ލާމަރުކަޒީ ގާނޫނަށް ހުށަހެޅި އިސްލާހުގެ ބިލު ހުށަހެޅުއްވީ ތުޅާދޫ ދާއިރާގެ މެންބަރު އަބްދުލްހަންނާނު އަބޫބަކުރެވެ. އޭނާއަކީ މިނިވަން މެންބަރެއް ނަމަވެސް މަސައްކަތް ކުރައްވަމުން ގެންދަވަނީ ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އާ އެކީގަ އެވެ.
އެ ބިލު މަޖިލީހަށް ބަލައިގަތީ ވޯޓުގައި ބައިވެރިވެވަޑައިގެންނެވި 55 މެންބަރުންގެ ވޯޓުންނެވެ. އެ އިސްލާހު މަޖިލީހަށް ބަލައިގަތުމާ ދެކޮޅަށް އަށް މެންބަރަކު ވޯޓުދެއްވި އެވެ.
ބިލުގައި ވަނީ ސަރުކާރުގެ މަޝްރޫއުތައް ހިންގުމަށް ޓަކައި ކައުންސިލެއްގެ އިހުތަސާސްގެ ތެރޭގައި ހިމެނޭ ބިމެއް ނުވަތަ ތަނެއް ވަކިކުރުމަށް ވަޒީރުންގެ މަޖިލީހުން ނިންމުމަށް ފަހު، ކައުންސިލުގެ މިލްކިއްޔާތުން އެ ތަނެއް ވަކިވާނެ ކަމަށެވެ. އަދި، އެ ތަނަކީ ދައުލަތުގެ ފުރިހަމަ ބާރު ހިނގާ ބިމާއި ތަންތަނަށް ވެގެން ދާނެ އެވެ.
ހަމަ އެހެންމެ، ރަށްރަށުގެ ފިޒިކަލް ޑިވެލޮޕްމަންޓު ޕްލޭން ފާސްކުރުމުގެ ކުރިން ވެސް ސަރުކާރުން ތަރައްގީގެ މަޝްރޫއުއެއް ހިންގަން ބިމެއް ހޯދަން އެދޭ ހާލަތްތަކުގައި އެ ބިން ސަރުކާރާ ހަވާލުކުރަން ޖެހެ އެވެ.
އެ ބިލު މަޖިލީހަށް ބަލައިގެންފައިވާއިރު، އިދިކޮޅު އެމްޑީޕީން ބުނަމުން ދަނީ އެ އިސްލާހަކީ ގާނޫނުއަސާސީއާ މުޅީން ހިލާފު ބިލެއް ކަމަށެވެ. ނަމަވެސް، ޕީއެންސީގެ މެންބަރުން ގެންދަވަނީ އެ ބިލު ދިފާއުކުރައްވަމުންނެވެ.
އެ ބިލު މަޖިލީހަށް ބަލައިގެންފައިވާއިރު، އެ ބިލާ ދެކޮޅަށް އާންމުންގެ ތެރެއިން ބަޔަކު ވަނީ ޕެޓިޝަނެއްގައި ސޮއިކުރަން ފަށައިފަ އެވެ. މިހާރު ބަދަލުތަކާ ދެކޮޅަށް ސޮއިކުރަމުން އަންނަ ޕެޓިޝަނުގައި ވަނީ އެ ބިލަކީ ލާމަޒުކަޒީ ގާނޫނޫގެ ރޫހާ ހިލާފު ބިލެއް ކަމަށް ބުނެ އެ ބިލު އަނބުރާ ގެންދަން ގޮވާލާފަ އެވެ.
