ސަރުކާރުގެ ތިން ވުޒާރާއެއް ހިންގަމުން އައި ދެ އިމާރާތެއްގައި ޑިސެމްބަރު 12، 2024، ގައި ރޯވި މައްސަލަ ތަހުގީގުކޮށް އެ މައްސަލައިގެ ހަގީގަތާ ހަމައަށް ވާސިލުވެވިއްޖެ ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގައި އޭނާއާ ކުރި ސުވާލަކަށް ޖަވާބު ދެއްވަމުން އިހުސާން މިއަދު ވިދާޅުވީ "އެ ހާދިސާ ވަނީ ތަހުގީގުކޮށް، ތަހުގީގު ނިންމާފައި" ކަމަށެވެ. އެތަނުގައި އެންމެ ފުރަތަމަ އަލިފާން ރޯވީ އެސީތަކެއްގައި ކަމަށް އިހުސާން ވިދާޅުވި އެވެ.
"ފުރަތަމަ އިނީޝިއަލް ސްޓޭޖުގައި ފުލުހުން އެތަނަށް އެޓެންޑުވެގެން، ފުލުހުންގެ ބޮޑީކެމްގެ ވީޑިއޯ ފުޓޭޖުން އަޅުގަނޑުމެންނަށް ސާބިތު އެބަވޭ، އެންމެ ފުރަތަމަ އަލިފާން ރޯވެފައިވަނީ ސީލިންގުގަނޑު ތެރޭގައި އެއާކޮންޑިޝަނާތަކުގެ ތެރޭގައި ހުރި ވަޔަރުތަކެއްގައި،" އިހުސާން ވިދާޅުވި އެވެ.
އެ މައްސަލައިގެ ތަހުގީގު ނިމިފައިވާ ކަމަށް ހޯމް މިނިސްޓަރު މި ވިދާޅުވީ، އެ މައްސަލައިގެ މައުލޫމާތު ހާމަ ކުރަން ސަރުކާރުން ދެކޮޅު ހަދަމުންދިޔަތާ ދެ އަހަރުވާން ކައިރިވެފައި ވަނިކޮށެވެ. މިނިސްޓަރު މިއަދު ވިދާޅުވީ އެ މައްސަލައިގައި މައުލޫމާތު ދިނުމަށް ނޫސްވެރިންގެ ބައްދަލުވުމެއް ވެސް ފަހުން ބާއްވަވާނެ ކަމަށެވެ.
ދެ އިމާރާތުގައި ރޯވި އަލިފާންގަނޑާ ގުޅޭ ގޮތުން އެކި ކަހަލަ ސީރިއަސް ތުހުމަތުތައް ސަރުކާރަށް ވަނީ އަމާޒުވެފަ އެވެ. އެގޮތުން، އެ ދެ އިމާރާތުގައި ސަރުކާރުން ގަސްތުގައި ރޯކޮށްލީ ކަމަށް ކުރީގެ ރައީސް އަބްދުﷲ ޔާމީން ވިދާޅުވެފައިވެ އެވެ.
"މުއިއްޒު ވެރިކަމުން ފައިބައިގެން ދާއިރު އެއްވެސް ހެއްކެއް ނުފެންނާނެ. އެ ހެކިތައް ނައްތާލުމުގެ ގޮތުން ނޫންތޯ ގްރީން ބިލްޑިން އެ އަންދާލީވެސް. އެއީ މޭޔަރަކަށް ވެސް ހުރި. ކޮންސްޓްރަކްޝަން މިނިސްޓަރީގެ ޑޮކިއުމަންޓްތައް ވެސް ހުރީ އެ ތަނުގައި. ހަމަ ބަޔަކު އަންދާލީ ތަނެއް އިނގޭތޯ؟ ބަޔަކު އަންދާލީ، ހަމަ ރޯކޮށް ހުރިހާ ހެކި ތަނެއް ނައްތާލީ،" ޔާމީން ވިދާޅުވި އެވެ.
