ރަސްމާލޭގެ ބިމުގެ ދެބައިކުޅަ އެއްބައި ބޭރުގެ ކުންފުންޏަކަށް ދިނުމާ ދެކޮޅުހަދާ ކޮންމެ މީހަކީ މި ގައުމުގެ ގައްދާރެއް ކަމަށް ރައްޔިތުންގެ މާފަންނު ހުޅަނގު ދާއިރާގެ މަޖިލިސް މެންބަރު، މުހައްމަދު މުސްތަފާ އިބްރާހިމް ވިދާޅުވެއްޖެ އެވެ.
ރަސްމާލޭގެ ބިމުން 500 ހެކްޓަރުގެ ބިން ޔޫއޭއީގެ އީގަލް ހިލްސް ކުންފުންޏަށް ދޭން ސަރުކާރުން ނިންމި ނިންމުަމަށް ފާޑުކިޔުން އަމާޒުވެފައިވަނިކޮށް މުސްތަފާ އެހެން ވިދާޅުވީ ފޭސްބުކްގައި އޭނާ ކުރެއްވި ޕޯސްޓެއްގަ އެވެ.
"20 ބިލިއަންގެ ޕްރޮޖެކްޓާ ދެކޮޅު ކޮންމެ މީހަކީ ގައުމީ ލޯތްބެއް ނެތް ގައުމުގެ އަދުއްވެއް،" މުސްތަފާ ކުރެއްވި ޕޯސްޓުގައި ވިދާޅުވި އެވެ.
ރަސްމާލެއިން 500 ހެކްޓަރުގެ ބިން ބޭރު ބަޔަކަށް ދޭން ނިންމާފައިވާކަން ސަރުކާރުން އިއުލާނުކުރީ ސެޕްޓެމްބަރު 21، ގަ އެވެ.
ރަސްމާލެ ޑީލް: 500 ހެކްޓަރު ބިމަށް ރާއްޖެއަށް ލިބެނީ "ޗިޕްސް"
އީގަލް ހިލްސްއާއެކު ވެފައިވާ އެއްބަސްވުމުގެ ހާމަކަން ކުޑަވުމާއި، އެހެން ގައުމުތަކުގައި އެ ކުންފުނިން ހިންގާފައިވާ މަޝްރޫއުތަކުން ދައުލަތަށް ލިބުނު ފަދަ ހިއްސާއެއް ރާއްޖެއަށް ނުލިބުމަކީ ބޮޑު ބޭއިންސާފެއް. ދިވެހި ދައުލަތަށް ލިބޭ ބަދަލަކީ ބިމުގެ ހަގީގީ އަގާ އަޅާބަލާއިރު "ޗިޕްސް" ކޮޅެއް.
ސަރުކާރުން ރަސްމާލެ ދޫކޮށްލީ ލޭންޑް އިކުއިޒިޝަން ފީއެއް އަދި ބިމު ކުުއްޔެއް ނުނަގާ ގޮތަށެވެ. ރަސްމާލެއިން ސަރުކާރަށް ލިބެނީ، އެތަނުގައި އަޅާ އިމާރާތް ޑިވެލޮޕަރު ފުރަތަމަ ފަހަރު ވިއްކާލުމުން ލިބޭ 10 ޕަސެންޓުގެ ފީއަކާއި ގަންނަ ފަރާތުން ދައްކަންޖެހޭ ހަތަރު ޕަސެންޓުގެ ފީއެކެވެ. އެތަނުގެ އޯނާޝިޕް ޓްރާންސްފާ ކުރާ ކޮންމެ ފަހަރަކު ވެސް ހަތަރު ޕަސެންޓުގެ ފީއެއް ލިބޭނެ އެވެ.
ރަސްމާލެ ދޫކޮށްލީ 99 އަހަރަށް ކަމަށް ސަރުކާރުން ބުނި ނަމަވެސް އެގްރިމެންޓު ފްރޭމްކޮށްފައި އޮތް ގޮތުން އެތަން އެއްކޮށް ގެއްލޭނެ އެވެ. ރަސްމާލެއިން ޕްރޮޕަޓީސް ގަންނަ މީހާއަށް ލިބޭ މީހާ އެތަން ވިއްކާލުމުން، އަލުން 99 އަހަރުގެ އާ ލީސް މުއްދަތެއް ފެށޭނެ އެވެ. އަދި ހިބައިން ދިނަސް އަނެއްކާ 99 އަހަރުގެ އާ ލީސް މުއްދަތެއް ފެށޭނެ އެވެ.
