ޑޮލަރު ގަނެވިއްކާ ކުންފުންޏެއް އުފެއްދީ ޑޮލަރުން އާމްދަނީ ލިބެމުންދާތީ ކަމަށާއި ނަމަވެސް މިހާތަނަށް އެ ކުންފުނިން ޑޮލަރު މާރުކުރުމުގެ އެއްވެސް މުއާމަލާތެއް ކޮށްފައި ނުވާނެ ކަމަށް، ރައްޔިތުންގެ މަޖިލީހުގެ މެޖޯރިޓީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވެއްޖެ އެވެ.
ފަލާހު މިއަދު އަދަދު ނޫހަށް ވިދާޅުވީ، އޭނާއަކީ ރައްޔިތުންގެ މަޖިލީހުގެ މެންބަރަކަށް ވެވަޑައިގަތުމުގެ ކުރިން ވެސް ފުޅާ ދާއިރާއެއްގައި ވިޔަފާރި ކުރައްވާ އަދި ޑޮލަރުން އާމްދަނީ ލިބޭ ބޭފުޅެއް ކަމަށެވެ. އެގޮތުން މިހާރު ވެސް އޭނާގެ ހަތަރު ސަފާރީ އޮންނަ ކަމަށާއި، އެ ވިޔަފާރިތަކުން އާމްދަނީ ލިބެނީ ޑޮލަރުން ކަމަށް އޭނާ ފާހަގަކުރެއްވިއެވެ.
"ރާއްޖޭގައި ބޭންކު ރޭޓުގައި ޑޮލަރުގެ މުއާމަލާތް ކުރި ނަމަވެސް އެކަމަށް ހާއްސަ ހުއްދައެއް އޮންނަންޖެހޭތީ ކުންފުނި އުފެއްދީ. އެހެންނަމަވެސް އެފަދަ މުއާމަލާތެއް އަދި ނުކުރާތީ އަދި ކުރަން ނުޖެހޭތީ އެމްއެމްއޭގެ ލައިސަންސް ވެސް ނުހޯދަން،" ފަލާހު ވިދާޅުވި އެވެ.
ސަން ކަރަންސީ އެކްސްޗޭންޖުގެ ނަމުގައި އުފައްދާފައިވާ އެ ކުންފުންޏަކީ އަމަލީ ގޮތުން އެއްވެސް މަސައްކަތެއް ކުރާ ތަނެއް ނޫން ކަމަށާއި، އެއީ ހަމައެކަނި ނަމެއްގައި އޮތް، ވުޖޫދުގައި ނެތް ފަދަ ކުންފުންޏެއްގެ ގޮތުގައި ފަލާހު ވިދާޅުވި އެވެ.
މިކަން ފެންމަތިވެފައިވަނީ 20 ވަނަ މަޖިލީހުގެ މެންބަރުންގެ މާލީ ބަޔާންތައް މަޖިލީހުގެ ވެބްސައިޓުގައި އާންމުކުރުމާ ގުޅިގެންނެވެ.
އާންމުކޮށްފައިވާ މާލީ ބަޔާނަށް ބަލާއިރު، މިދިޔަ އަހަރުގެ ތެރޭގައި ފަލާހު ވަނީ އޭނާގެ 90 ޕަސެންޓު ހިއްސާ އޮންނަ ގޮތަށް ސަން ކަރަންސީ އެކްސްޗޭންޖުގެ އިތުރުން ސަން ކްރަފްޓް ކޮންސްޓްރަކްޝަންގެ ނަމުގައި ކޮންސްޓްރަކްޝަން ކުންފުންޏެއް ވެސް އުފައްދަވާފަ އެވެ.
ފާއިތުވި އަހަރު މަޖިލީހުގެ މުސާރައިގެ ގޮތުގައި އޭނާއަށް ނުވަލައްކަ ނުވަދިހަ ހާސް ރުފިޔާ ލިބިފައިވާއިރު، ވިޔަފާރީގެ ނަފާގެ ގޮތުގައި 1.8 މިލިއަން ރުފިޔާ އަދި ކުލީގެ ގޮތުގައި 2.8 މިލިއަން ރުފިޔާ ލިބިފައިވާކަން ބަޔާނުން އެނގެއެވެ.
ފަލާހުގެ މާލީ ބަޔާނުގައިވާ ގޮތުން އޭނާ ވަނީ ބޭންކް އޮފް މޯލްޑިވްސް އިން 15 މިލިއަން ރުފިޔާގެ ލޯނެއް ނަންގަވައިފަ އެވެ. އަދި މާލެއާއި ހުޅުމާލެ ހިމެނޭ ގޮތަށް ޖުމްލަ ފަސް ބިމެއް އޭނާގެ މިލްކިއްޔާތުގައި އޮތްކަން ވެސް އެ ބަޔާނުން ވަނީ ހާމަވެފައެވެ.
