ވ. އާރަށް ކުއްޔަށް ދޫކުރުމުގައި ހިޔާނާތް ހިންގި ކަމަށް ބުނާ މައްސަލައިގައި ކުރީގެ ރައީސް، ޔާމީން އަބްދުލްގައްޔޫމްގެ މައްޗަށް އުފުލާފައިވާ ހިޔާނާތުގެ ދައުވާތަކުން ބަރީއަވުމަށް ޔާމީންގެ ފަރާތުން ހުށަހެޅި ދިފާއި ހެކި ބަލައިނުގަތުމަށް ދައުލަތުގެ ފަރާތުން ކްރިމިނަލް ކޯޓުގައި އެދިއްޖެ އެވެ.
އާރަށް ކުއްޔަށް ދިނުމުގެ މުއާމަލާތުގެ ތެރެއިން ރިޝްވަތުގެ ގޮތުގައި 1.1 މިލިއަން ޑޮލަރު ނަންގަވައި އެ ފައިސާ ލޯންޑަ ކުރެއްވި ކަމަށް ސާބިތުވާ ކަމަށް ކަނޑައަޅައި 11 އަހަރުގެ ޖަލު ހުކުމެއް އެމަނިކުފާނުގެ މައްޗަށް ކްރިމިނަލް ކޯޓުން އިއްވީ ޑިސެމްބަރު، 25، 2022 ގަ އެވެ.
ކްރިމިނަލް ކޯޓުން ޔާމީންގެ މައްޗަށް އެ މައްސަލަ ސާބިތުވާ ކަމަށް ނިންމީ އެމަނިކުފާނުގެ ދިފާއީ ހެކިތައް ނަފީ ކުރަން ދައުލަތުން ހުށަހެޅި އާ ހެކިތައް ބަލައިގަތުމަށް ފަހުގަ އެވެ. ނަމަވެސް އެ މައްސަލަ ޔާމީންގެ ފަރާތުން ހައި ކޯޓުގައި އިސްތިއުނާފު ކުރުމުން އެ ކޯޓުން ވަނީ އާ ހެކިތައް ބަލައިގަތުން ގޯސް ކަމަށް ނިންމާ، ދަށު ކޯޓުން އަލުން މައްސަލަ ބަލަން ހުކުމްކޮށްފަ އެވެ.
އެ މައްސަލައިގެ ޝަރީއަތް މަޑުޖެހިފައި އޮތީ ދައުވާތައް ސާބިތު ކުރަން ދައުލަތުން ހުށަހެޅި އާ ހެކިތައް ބަލައިގަތުމާ ގުޅޭ މައްސަލައާ ގުޅިގެންނެވެ. އެ މައްސަލައިގައި ސުޕްރީމް ކޯޓުން ހުކުމް ކުރީ ހެކި ބަލައިގަތީ ގޯސްކޮށް ކަމަށެވެ.
އެ މައްސަލައިގެ ދިފާއުގައި ޔާމީން ވިދާޅުވަމުން ގެންދަވަނީ އެއީ ޑޮލަރު މާރުކުރުމުގެ މުއާމަލާތަކުން ލިބިފައިވާ ފައިސާ ކަމަށެވެ. ޔާމީންގެ ފަރާތުން ޑޮލަރު މާރުކުރިކަން ސާބިތުކުރަން ހެކިންގެ ގޮތުގައި ޔޫތު މިނިސްޓަރުގެ އެޑްވައިޒަރު އަހުމަދު ނަރީޝް އާއި ވިލިމާލެ ދާއިރާގެ މެންބަރު މުހައްމަދު އިސްމާއިލް އާއި ހުޅުދޫ ދާއިރާގެ މެންބަރު މުހައްމަދު ޝާހިދުގެ އިތުރުން އަބްދުالله ރަޝީދު ކިޔާ މީހަކު ވަނީ ހުށަހަޅާފަ އެވެ. އޭގެ އިތުރުން ޑޮލަރު މާރުކުރިކަމުގެ ލިޔުމެއް ވެސް ހެކީގެ ގޮތުގައި ހުށަހަޅާފައިވެ އެވެ.
ނަމަވެސް، ދައުލަތުން އެދުނީ އެ ހެކިތައް ބަލައިނުގަތުމަށެވެ. އެގޮތުން، ދައުލަތުން ބުނަނީ ތަހުގީގު މަރުހަލާގައި ޔާމީން ހަނު ހުންނެވާފައިވާތީ އެ މަރުހަލާގައި ހާމަނުކުރި ހެކިތަކަށް ފުރުސަތު ދެވިގެން ނުވާނެ ކަމަށެވެ.
މިއަދު މައްސަލައިގައި ކުރައަށްދިޔައީ ޝަރީއަތުގެ ކުރިން ހުށަހަޅާ ކަންކަން ހުށަހެޅުމާއި އެ ކަންކަމާ ގުޅޭގޮތުން ދައުވާ ކުރާ ފަރާތާއި ދައުވާ ލިބޭ ފަރާތުން ވާހަކަ ދެއްކުމެވެ.
