ޔޫއޭއީގެ އީގަލް ހިލްސް ކުންފުންޏަށް ރަސްމާލެ ދޫކޮށްލައިފި ނަމަ ދިވެހީންގެރާއްޖެ ދިވެހީންގެ އަތުގައި އޮވެދާނެ ކަމާމެދު މި ސަރުކާރުގައި އެމްޑަބްލިޔޫއެސްސީގެ މެނޭޖިން ޑިރެކްޓަރުކަން ކުރެއްވި އަބްދުލް މަތީން ސުވާލު އުފައްދަވައިފި އެވެ.
ކުރީގެ ރައީސް އަބްދުﷲ ޔާމީންގެ ސަރުކާރުގައި ސްޓޭޓު މިނިސްޓަރަކާއި ޕީޕީއެމްގެ ސެކްރެޓަރީ ޖެނެރަލްގެ މަގާމު ވެސް ފުރުއްވި މަތީން ރޭ ފޭސްބުކްގައި ކުރެއްވި ޕޯސްޓެއްގައި، ރަސްމާލެ ފަދަ ތަންތަން ބިދޭސީންނަށް ވިއްކާލަން އުޅޭ ކަމަށް ދެކެވޭ ވާހަކަތަކާ ގުޅިގެން ކަންބޮޑުވުން ފާޅުކުރެއްވި އެވެ. އަދި މިފަދަ ކަންކަމުގައި ފުންކޮށް ވިސްނައި، އިލްމީ ބަހުސަކަށް ދާން އޭނާ ގޮވާލެއްވި އެވެ.
"މި ވިޔަފާރި މޮޑެލްގައި ސަތޭކަ ވަރަކަށް އަހަރުގެ ރާސްތާ ކަޑައްތުކުރާއިރު ދިވެހީންގެރާއްޖެ ދިވެހީންގެ އަތުގައި އޮންނާނެތޯ އެއީ ވަކިފަރާތަކަށް ނުޖެހި ކުރަންޖެހޭ އިލްމީ ބަހުސެއް. މިކަންކަމާގުޅޭ ލިޔެކިޔުންތައް ރައްޔިތުންނަށް ހާމަވާންޖެހޭ. ނިންމުންތަކުގެ ދެފުށްފެންނަން ޖެހޭ. މި ބަހުސްގައި ބައިވެރިވުމަކީ ތަރައްގީއާއި ދެކޮޅުހެދުމެއް ނޫން. އެއީ ދިވެހީންގެރާއްޖޭގެ ހިމާޔަތާ ރައްކާތެރިކަމަށްޓަކައި މި ޖީލުގެ ދިވެހީން އުފުލަންޖެހޭ ޒިންމާއެއް،" މަތީން ވިދާޅުވި އެވެ.
ދުނިޔޭގެ އެންމެ އުސް ބިނާ، ބުރުޖް ހަލީފާގެ ހިންގާ ކުންފުނީގެ ވެރިޔާ އީގަލް ހިލްސްއަށް ނިމުމެއް ނެތް މުއްދަތަކަށް ރަސްމާލޭގެ 500 ހެކްޓަރުގެ ބިން ދޫކޮށްލަން މުއިއްޒު ވަނީ ނިންމަވައި، އެކަމުގެ ޝަރުތުތައް އެކުލެވޭ އެއްބަސްވުމުގައި ސޮއިކޮށްފަ އެވެ.
އީގަލް ހިލްސްއިން ތަރައްގީކުރާ ރަސްމާލެ ވޯޓާފްރަންޓް އަދި މެރީނާ މަޝްރޫއުގެ ދަށުން ބިދޭސީންނަށް އެތަނުން ގެދޮރު ގަނެ އެތަނުގައި އެމީހުން ވަޒަންވެރިކުރުވުން ހިމެނެ އެވެ.
މަތީން ރޭ ކުރެއްވި ޕޯސްޓުގައި ވިދާޅުވީ ދުނިޔޭގެ އެހެން ގައުމުތަކުގައި ކާމިޔާބު ކަމާއެކު ކުރިޔަށްގެންގޮސްފައިވާ ވިޔަފާރި މޮޑެލްތައް ރާއްޖެއަށް ގެންނަން ވިސްނާއިރު އޭގެ ސަބަބުން ރާއްޖޭގެ އަސާސީ ސިފަތަކަށް ކޮށްފާނެ އަސަރާމެދު ފުންކޮށް ވިސްނާންޖެހޭ ކަމަށެވެ.
"ދިވެހިރާއްޖެއަކީ ހަމައެކަނި ދިވެހި ދަރިކޮޅުގެ، ސުންނީ މުސްލިމް ގައުމެއް،" އޭނާ ވިދާޅުވި އެވެ.
ބިދޭސީން ގެދޮރު ގަނެގެން ދިގު މުއްދަތަކަށް ރާއްޖޭގައި ދެމި ތިބެވޭ ވިޔަފާރި މޮޑެލް ރާއްޖެއަށް ގެނެވޭތޯ ބަޔަކު މަސައްކަތްކުރާތާ އެތައް އަހަރެއް ވެއްޖެ ކަމަށާއި މިހާރު މިވަނީ އެ މޮޑެލް ފުޅާކޮށް ސަހަރުތައް ބިނާކުރުމުގެ މަސައްކަތް ފެށިފައި ކަމަށް އޭނާ ވިދާޅުވި އެވެ.
"ރަސްމާލެއާއި، ނޫނުއަތޮޅާއި ތާ އަތޮޅުގައެވެ. އެތައްހާސް ބިދޭސީންގެ ބަޔަކު ގެދޮރުގަނެގެން ރާއްޖޭގައި ދިރިއުޅުމަށް މަގުފަހިކޮށްދިނުމަކީ ހަމައެކަނި ވިޔަފާރިއާއި އިގުތިސާދީ ކަމެއް ނޫން. އެދެކެވެނީ ބަވަނަކުރެވި ހުޅުވާލެވިފައިވާ މުޖުތަމައުތަކެއް ރާއްޖޭގައި ބިނާކުރާވާހަކަ. އެހެނަސް އެއީ ތަފާތު ދީންތަކާ ތަފާތު ސަގާފަތްތަކާ، އާދަކާދަތަކުގެ އަހުލުވެރި މުއްސަދި ނުފޫޒުގަދަ މީހުން އެމީހުނަށް ބޭނުންވާ އެންމެހާ ވަސީލަތްތަކާއެކު ރާއްޖޭގެ އެކި ކަންކޮޅުތަކުގައި ފައިހަރުކުރާ ވާހަކަ ނޫންކަން ދިވެހި ރައްޔިތުންނަށް ޔަގީންވާން ޖެހޭ،" މަތީން ވިދާޅުވި އެވެ.
ކެބިނެޓުގައި ވެސް އަދި ރައްޔިތުންގެ މަޖިލީހުގައި ވެސް މަޝްވަރާ ނުކޮށް، ސިއްރިޔާތުގައި ނިންމި މި މުއާމަލާތާމެދު ގިނަ ބަޔަކު އަންނަނީ ނުރުހުން ފާޅުކުރަމުންނެވެ.
އެއްބަސްވުމުގައި ސޮއިކުރި ނަމަވެސް، ދިވެހިރާއްޖޭގައި މިހާރު އަމަލު ކުރަމުންދާ ގާނޫނުތަކުގެ ދަށުން މި މަޝްރޫއަށް ހުއްދަ ނުލިބޭތީ، 12 ބިލިއަން ޑޮލަރުގެ މަޝްރޫއުއަށް މަގުފަހިކުރަން އާ ގާނޫނުތަކެއް ހަދަން ނިންމާފައިވާ ކަމަށް ބަންޑާރަނައިބު އަހުމަދު އުޝާމް އިއްޔެ ވަނީ ވިދާޅުވެފަ އެވެ.
ޔޫއޭއީގެ އީގަލް ހިލްސް އަށް ރަސްމާލެ ދޫކޮށްލަން ސަރުކާރުން އެއްބަސްވީ 99 އަހަރަށެވެ. ރަސްމާލެއިން އެޕާޓްމަންޓެއް ގަންނަ ބިދޭސީ މީހާއަށް ލިބޭ 99 އަހަރުގެ ލީސް މުއްދަތުގައި އެތަން ވިއްކާލައިފި ނަމަ ނުވަތަ ހިބައިން ދީފި ނަމަ 99 އާ ލީސް މުއްދަތެއް ފެށޭނެ އެވެ.
