ރަސްމާލޭގެ އެއްވެސް ބައެއް ބޭރުގެ ފަރާތަކަށް ކުއްޔަށް ނުދެއްވާނެ ކަމަށް ރައީސް މުހައްމަދު މުއިއްޒު ވިދާޅުނުވާކަމަށް ވިދާޅުވެ ފުވައްމުލަކު ދެކުނު ދާއިރާގެ މަޖިލިސް މެންބަރު. އިބްރާހިމް ހުސެއިން މަޖިލީހުގެ ތަޅުމުގައި މިއަދު ދޮގު ހައްދަވައިފި އެވެ.
އިބްރާހިމް ހުސެއިން ދޮގުހެއްދެވީ މިއަދު ބޭއްވި މަޖިލީހުގެ ޖަލްސާގައި ރަސްމާލޭގެ ބިމުން ބޮޑުބައެއް ބޭރުގެ ބަޔަކަށް ކުއްޔަށް ދިނުމާ ގުޅޭ ގޮތުން ހުށަހެޅި ކުއްލި މައްސަލައަށް ބަހުސް ކުރައްވަމުންނެވެ.
"ދިވެހިރާއްޖޭގެ އިއްޒަތްތެރި ރައީސުލްޖުމްހޫރިއްޔާ ދުވަހަކު ވެސް ވިދާޅުވެފައެއް ނުވާނެ މި ރަސްމާލެއިން ތަނެއް ކުއްޔަށް ނުދޭނެ ވާހަކައެއް، އަބަދުވެސް ވިދާޅުވަމުން ގެންދެވީ ރަސްމާލެ ހިއްކުމުގައި އެއްވެސް ބައެއް، ވެލިފުކެއްހާ މިންވަރު ވެސް ނުދެއްވާނެ ކަމަށް،" އިބްރާހިމް ހުސެއިން ވިދާޅުވި އެވެ.
ރަސްމާލެ 99 އަހަރަށް ދެނީ "އެންމެ ދުވަހަކަށް" ވެސް އެރަށް ބޭރު ބަޔަކަށް ނުދޭން މުއިއްޒު ވެވަޑައިގެންނެވި ވައުދާ ހިލާފަށް
"އެތަނުން ހިއްކާ ކޮންމެ ބިމެއްގެ، ކޮންމެ ވެލިފުކަކީ ދިވެހި ރައްޔިތުންނަށް މިލްކުވާ ވެލިފުކެއް. އެއްވެސް ބޭރު ފަރާތަކަށް އެންމެ ދުވަހަކަށް ވެސް ކުއްޔަށް ދޭން، ނޫނީ ހިލޭ ވެސް ލިބޭނެ ބިމެއްނޫން، ދެން އެތަނުން ހިކިގެން ދާނީކީއެއް،" މުއިއްޒު ވިދާޅުވެފައިވެ އެވެ.
އިބްރާހިމް ހުސެއިން އެހެން ވިދާޅުވި ނަމަވެސް، ރާއްޖޭގެ މިނިވަން ދުވަސް ފާހަގަ ކުރަން ޖުލައި 26، 2024، ބޭއްވި ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ ރަސްމާލެއަކީ "އެއްވެސް ބޭރު ފަރާތަކަށް އެންމެ ދުވަހަކަށް ވެސް ކުއްޔަށް ދޭން، ނޫނީ ހިލޭވެސް ލިބޭނެ ބިމެއް ނޫން" ކަމަށެވެ.
"އެތަނުން [ރަސްމާލެއިން] ހިއްކާ ކޮންމެ ބިމެއްގެ، ކޮންމެ ވެލިފުކަކީ ދިވެހި ރައްޔިތުންނަށް މިލްކުވާ ވެލިފުކެއް. އެއްވެސް ބޭރު ފަރާތަކަށް އެންމެ ދުވަހަކަށް ވެސް ކުއްޔަށް ދޭން، ނޫނީ ހިލޭ ވެސް ލިބޭނެ ބިމެއްނޫން، ދެން އެތަނުން ހިކިގެން ދާނީކީއެއް،" މުއިއްޒު ވިދާޅުވެފައިވެ އެވެ.
އޭގެ އިތުރުން، ރަސްމާލެ ދެން ހިއްކާނީ އެއްވެސް ބިމެއް ދޭން ނުޖެހޭ ގޮތަށް ކަމަށް ވެސް މުއިއްޒު އެ ދުވަހު ވިދާޅުވި އެވެ.
"ރަސްމާލޭގެ މަސައްކަތް ކުރިން ހިންގި ގޮތް އަޅުގަނޑުމެންނަށް ކަމުނުގޮސްގެން، އެ އެގްރިމެންޓް ބާތިލުކޮށް، މިހާރު އެއްވެސް ފަރާތަކަށް ބިމެއް، ކުރު މުއްދަތަކަށްވިޔަސް، ދިގު މުއްދަތަކަށްވިޔަސް ދޭން ނުޖެހޭ ގޮތަށް ހިންގަން ނިންމައި، އެ މަސައްކަތް އެވަނީ އަލުން ފެށިފައި،" އެމަނިކުފާނު ވިދާޅުވި އެވެ.
ރަސްމާލެ 99 އަހަރަށް ދެނީ ޔޫއޭއީގެ އީގަލް ހިލްސްއަށެވެ. އެއީ ބުރުޖު ހަލީފާގެ މަސައްކަތުގައި ޝާމިލުވި ރިއަލް އެސްޓޭޓް ވިޔަފާރިވެރިޔާ މުހައްމަދު އަލައްބާރުގެ ކުންފުންޏެވެ. ރަސްމާލެ ޑިވެލޮޕް ކުރުމުގެ ކޮމާޝަލް ޓާމްސްގައި ސޮއި ކުރީ މިދިޔަ މަހުގެ 21، ވަނަ ދުވަހު އެވެ.
