ހުޅުމާލޭގައި ހުރި ވަގުތީ މިސްކިތްތައް ނަގައި، މި އަހަރު ނިމުމުގެ ކުރިން ހުޅުމާލެއަށް ބޭނުންވާ ދާއިމީ މިސްކިތްތައް އަޅައި ނިންމާނެ ކަމަށް އިސްލާމިކް މިނިސްޓަރު، މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ރައްޔިތުންގެ މަޖިލީހަށް މިއަދު ހާޒިރުކޮށް މެންބަރަކު ކުރެއްވި ސުވާލަކަށް ޖަވާބުދެއްވަމުން ޝަހީމް ވިދާޅުވީ އިސްލާމިކް މިނިސްޓްރީގެ ދަށުން މިހާރު ވެސް 81 މަޝްރޫއުއަށް ވުރެ ގިނަ މަޝްރޫއު ފެށިގެން ކުރިއަށް ގެންދާ ކަމަށެވެ. އޭގެ ތެރޭގައި މިސްކިތްތަކާއި ވަގުފް ބިނާތަކާއި އިސްލާމީ މަރުކަޒުތައް ހިމެނޭ ކަމަށް އޭނާ ވިދާޅުވި އެވެ.
"މާލެ އޭރިއާގައި ހުރި ވަގުތީ މިސްކިތްތައް، ހުޅުމާލޭގައި ޓިނުން ހަދާފައި ހުރި ތަންތަން މި އަހަރުގެ ތެރޭގައި ރިމޫވް ކުރެވޭނެ. ދާއިމީ މިސްކިތްތައް ހުޅުމާލޭގެ ހުރިހާ ސަރަހައްދެއްގައި ގާއިމުކުރެވިގެންދާނެ މި އަހަރު ނިމުމުގެ ކުރިން،" ޝަހީމް ވިދާޅުވި އެވެ.
އަންނަ ރޯދަމަހުގެ ކުރިން ވެސް 20 އަކަށް މިސްކިތް ނިންމައި ހުޅުވުމަށް ތައްޔާރުވަމުންދާ ކަމަށް އޭނާ ވިދާޅުވި އެވެ.
މަނަދޫ ދާއިރާގެ މެންބަރު، ހުސްނީ މުބާރަކް ޝަހީމްއާ ސުވާލުކުރެއްވީ މި ސަރުކާރު ވެރިކަމަށް އައިފަހުން ކިތައް މިސްކިތް އަޅައި ނިންމިފައިވޭތޯ އެވެ. ނަމަވެސް، އެ ސުވާލަށް ޝަހީމް ސީދާ ޖަވާބެއް ނުދެއްވަ އެވެ.
އޭނާ ވިދާޅުވީ މިދިޔަ ސަރުކާރުގެ ދުވަސްވަރު ފަށާފައި ހުރި ގިނަ މަޝްރޫއުތަކަކީ ބަޖެޓުގައި ފައިސާ ނުހިމަނައި ފަށާފައި ހުރި މަޝްރޫއުތައް ކަމަށެވެ. ނަމަވެސް، މި ސަރުކާރުގެ ވިސްނުމަކީ އެ މަޝްރޫއުތައް ވެސް ކުރިއަށް ގެންގޮސް ނިންމުން ކަމަށް އޭނާ ވިދާޅުވި އެވެ.
