ރާއްޖޭގެ ފަޅުރަށްރަށާއި ފަޅުތައް އެކި ބޭނުންތަކަާށް އެކަށައެޅުމާއި ކުއްޔަށް ދިނުމުގެ އިޖުރާއަތްތައް ކަނޑައެޅުމަށް ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި ބިލަކީ އެ ކަމުގެ ހުރިހާ ބާރެއް ރައީސުލްޖުމްހޫރިއްޔާއަށް ދިނުމަށް ފަރުމާކޮށްފައިވާ އޮތް ބިލެއް ކަމަށް ވިދާޅުވެ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ މެންބަރުން ކަންބޮޑުވުން ފާޅުކޮށްފި އެވެ.
ސަރުކާރުގެ ފަރާތުން ތިނަދޫ އުތުރު ދާއިރާގެ މެންބަރު ސައުދުالله ހިލްމީ ހުށަހެޅުއްވި ބިލުގެ އިބްތިދާއީ ބަހުސް މިއަދުގެ މަޖިލިސް ޖަލްސާގައި ކުރިއަށްގެންދިޔަ އެވެ. އެ ބިލުގެ ބަހުސްގައި އެމްޑީޕީއަށް ނިސްބަތްވާ މެންބަރުން ވަނީ އެއީ ރާއްޖޭގެ ފަޅުރަށްރަށާއި ފަޅުތައް ސަރުކާރުން ބޭނުން ބަޔަކަށް ދިނުމަށް ފަރުމާކޮށްފައިވާ ބިލެއް ކަމަށް ވިދާޅުވެފަ އެވެ.
"ފަސް އަހަރުގެ ދައުރަކަށް އަޅުގަނޑުމެން ހޮވާ ރައީސަކަށް މުޅި ގައުމުގެ، މި ގައުމަކީ އެތައް ހާސް އަހަރަކަށް ދެމިއޮންނާނެ. ގައުމެއް، އެ ރައީސަކަށް މި ގައުމުގައި ހުރި ހުރިހާ ފަޅުރަށްރަށާއި ފަޅުތައް ދޫކޮށްލުމުގެ އިހުތިޔާރު ލިބިގެން ނުވާނެ. ގާނޫނުގައި ލިމިޓޭޝަންތަކެއް އޮންނަންވާނެ،" ހުޅުމާލެ ދެކުނު ދާއިރާގެ މެންބަރު އަހުމަދު ޝަމްހީދު ވިދާޅުވި އެވެ.
އޭގެ އިތުރުން، ރާއްޖޭގެ ސަރަހައްދުތަކުން ވަކި އިންސައްތައެއްގެ ފަޅުރަށްރަށާއި ފަޅުތައް ދޫނުކުރެވޭ ގޮތަށް ގާނޫނުގައި ހިމަނަން ޖެހޭ ކަމަށް ޝަމްހީދު ވިދާޅުވި އެވެ. އޭނާއަށް ފަހު ވާހަކަ ދެއްކެވި ތޮއްޑޫ ދާއިރާގެ މެންބަރު ހުސައިން ސަމީރު ވެސް ވަނީ ރާއްޖެއަކީ ބިން ކުޑަ ގައުމަކަށްވުމާއެކު ބޭނުން ގޮތަކަށް ރަށްރަށް ދޫކުރެވިގެން ނުވާނެ ކަމަށް ވިދާޅުވެފަ އެވެ.
"މާލެ އަތޮޅާއި ކައިރި އަތޮޅުތަކުގެ ފަޅުތަކާއި ފަޅުރަށްތަކެއް ނެތޭ މިއަދު. އަޅުގަނޑުމެން އެއްބަސްވެގެން ނުވާނެ ވެރިކަމަށް އަރާ ބަޔަކަށް މުޅި ރާއްޖޭގެ ހުރިހާ ރަށަކާ ކުޅުމުގެ އިހުތިޔާރާ ބާރު.... މިއީ ހުރިހާ ދިވެހި ރައްޔިތުންގެ ރައުސުލްމާލެއް. އެންމެ މީހެއްގެ އަތް މައްޗަށް މި ބާރު ދިނުމަކީ ރައްޔިތުންނަށް ވެވޭ ބޮޑު ހިޔާނާތެއް،" ސަމީރު ވިދާޅުވި އެވެ.
މީގެކުރިން ރަށްރަށް ދޫކުރުމަށް ހުރި ގޮންޖެހުންތައް ހައްލުކުރުމުގެ ބަދަލުގައި އެ ބިލުގައި އޮތީ ހުރިހާ ބާރެއް ރައީސުލްޖުމްހޫރިއްޔާއަށް ލިބޭ ގޮތަށް ކަމަށް ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވި އެވެ.
ފަޅުރަށްރަށް ކުއްޔަށް ދޫކުރެވޭނީ ފަތުރުވެރިކަމާއި، ސިނާއީ ބޭނުންތަކާއި، މަސްވެރިކަމާއި، ދަނޑުވެރިކަމާއި، އިގުތިސޯދީ އެހެނިހެން ބޭނުންތަކާއ، އިޖުތިމާއި ބޭނުންތަކާއި ދައުލަތުގެ ބޭނުމަށް ކަމަށް ބިލުގައި ބުނެފައިވެ އެވެ.
ސިނާއީ އަދި އިގުތިސޯދީ ބޭނުމަށް ދޫކުރާ ރަށްރަށުގެ ކުއްޔަކީ އަކަމީޓަރަކަށް އަހަރަކަށް ތިން ރުފިޔާ އެވެ. މަސްވެރިކަމާއި ދަނޑުވެރިކަމުގެ ބޭނުމަށް ދޫކުރާ ރަށްރަށުގެ ކުއްޔަކީ އަކަމީޓަރަކަށް 2.50ރ. އެވެ. އަދި އިޖުތިމާއީ ބޭނުމަށް ދޫކުރާ ރަށްރަށުގެ ކުއްޔަކީ އަކަމީޓަރަކަށް ދެ ރުފިޔާ އެވެ.
ފަޅު ކުއްޔަށް ދޫކުރެވޭނީ ލާޖް-ސްކޭލް ސިނާއީ މަސައްކަތްތަކާއި، މީޑިއަމް-ސްކޭލް ސިނާއީ މަސައްކަތްތަކާއި، ލާޖް-ސްކޭލް އިގުތިސޯދީ މަސައްކަތްތަކާއި އެކުއަކަލްޗާ ނުވަތަ އެކުއަކަލްޗާއާ ގުޅުންހުރި ހަރަކާތްތައް ހިންގުމަށް ކަމަށް ބިުގައި ބަޔާންކޮށްފައިވެ އެވެ.
ސިނާއީ އަދި އިގުތިސޯދީ ބޭނުމަށް ކުއްޔަށް ދޫކުރާ ފަޅުގެ ކުއްޔެއްގެ ގޮތުގައި އޮތީ އަކަމީޓަރަކަށް ތިން ރުފިޔާ އެވެ. މަސްވެރިކަމުގެ ބޭނުމަށް ދޫކުރާ ފަޅުތަކުގެ ކުއްޔަކީ އަކަމީޓަރަކަށް 50 ލާރި އެވެ.
ފަޅާއި ފަޅުރަށްރަށް ވިޔަފާރީގެ ބޭނުމަށް ކުއްޔަަށް ދެވޭނީ ރާއްޖޭގައި ރަޖިސްޓްރީ ކޮށްފައިވާ ކުންފުނިތަކާއި، ޕާޓްނާޝިޕްތަކާއި، އަމިއްލަ ފަރުދުންގެ ވިޔަފާރިތަކުގެ އިތުރުން ރީރަޖިސްޓްރީކޮށްފައިވާ ބޭރުގެ ކުންފުނިތަކާއި ޕާޓްނާޝިޕްތަކަށް ކަމަށް ބިލުގައި ބުނެފައިވެ އެވެ.
