ދައުލަތަށް އެކި ގޮތްގޮތުން ފައިސާ ހޯދުމަށް ކަމަށް ބުނެ ތަފާތު އެކި މަޝްރޫއުތަކުގެ ނަމުގައި މި ސަރުކާރު ފެށުނީއްސުރެ ކުރަމުން ދަނީ ވައްކަން ކަމަށް ކެންދޫ ދާއިރާގެ މަޖިލިސް މެންބަރު، މައުރޫފް ޒާކިރު ވިދާޅުވެއްޖެ އެވެ.
ރައްޔިތުންގެ މަޖިލީހުގައި މިއަދު ވާހަކަދައްކަވަމުން މައުރޫފް ވިދާޅުވީ ދައުލަތަށް ފައިސާ ހޯދުމަށް ކަމަށް ބުނެ މި ސަރުކާރުން ތަފާތު އެކި މަޝްރޫއުތައް ހިންގަމުން ދަނީ އެއްވެސް އުސޫލެއް ހަމައެއް ނެތި ކަމަށެވެ.
"އެހެންނަމަވެސް، މައިގަނޑު ގޮތެއްގައި މި ކުރާ ކަމަކީ، މަޝްރޫއުތަކުގެ ނަމުގައި ވައްކަން ކުރަނީ،" މައުރޫފް ވިދާޅުވި އެވެ.
އޭނާގެ ވާހަކައަށް ބާރުދެއްވުމަށް މައުރޫފް މިސާލުތަކެއް ދެއްކެވި އެވެ. އެގޮތުން، ހުޅުމާލޭގައި ތަރައްގީ ކުރުމަށް މި ސަރުކާރުން ނިންމި ފައިނޭންޝަލް ސެންޓަރާއި ދައުލަތުގެ ބަޖެޓުން އެތައް ފައިސާއެއް ހަރަދުކޮށްގެން ގެނައި ޑްރޯންތަކުން ދިވެހި ރައްޔިތުންނަށް އެއްވެސް ފައިދާއެއް ނުވާ ކަމަށް އޭނާ ވިދާޅުވި އެވެ.
އޭގެ އިތުރުން، ރާއްޖޭގެ އިގުތިސާދު ހީނަރުވެފައިވާ މި ދަނޑިވަޅުގައި ފުށިދިއްގަރުފަޅު ހިއްކަމުންދާ ދިޔުމަށް ވެސް އޭނާ ފާޑުވިދާޅުވި އެވެ.
"ދިވެހިރާއްޖޭގެ އިގުތިސާދީ ހާލަތު މި ވަގުތު މި އޮތް ގޮތުން، ދިވެހިރާއްޖޭގެ ޑޮލަރުގެ ދަތިކަން މިހާރު މި އޮތް ގޮތަށް ބަލާއިރު 800 މިލިއަން ޑޮލަރު ހަރަދުކޮށްގެން ފުށިދިއްގަރު ފަޅު ހިއްކަނީ، އެއީ ކީއްކުރަން މި ވަގުތު ކުރާ ކަމެއްތޯ؟ އޭގެން ކޮން ރައްޔިތަކަށްތޯ ފައިދާ ވަނީ،" މައުރޫފް ވިދާޅުވި އެވެ.
މި މޭރުމުން މައުރޫފް ވާހަކަދެއްކެވީ ހުޅުމާލެ ދެކުނު ދާއިރާގެ މެންބަރު، އަހުމަދު ޝަމްހީދު ހުށަހަޅުއްވާފައިވާ ގަރާރަށް ބަހުސް ކުރައްވަމުންނެވެ.
އޭނާ ހުށަހެޅުއްވި ގަރާރުގައި ވަނީ ދިވެހިރާއްޖޭގެ ބިމާއި، ފަޅުތަކާއި، ގައުމީ ސަލާމަތާ ސީދާ ގުޅިފައިވާ ސިޔާދަތީ ބާރުތަކެއް، ރައްޔިތުންގެ މަޖިލީހަށް ސިއްރުން ބޭރުގެ އަމިއްލަ ކުންފުންޏަކަށް ދޫކޮށްލާފައިވާ ކަމަށް ބުނާ މައްސަލާގައި "މޯލްޑިވްސް ޕާލް ރެޒިޑެންސް ޕްރޮގްރާމް" ވަގުތުން ހުއްޓާލުމަށް ގޮވާލައިފަ އެވެ.
