ރިޔާސީ އިންތިހާބު ކާމިޔާބުކުރެވޭވަރާ ގާތަށްވެސް މުހައްމަދު މުއިއްޒަށް ވޯޓު ނުލިބޭނެކަން އެމަނިކުފާނަށް މިހާރު އެނގޭނެ ކަމަށް ކުރީގެ ރައީސް އަބްދުﷲ ޔާމީން މިރޭ ވިދާޅުވެއްޖެ އެވެ.
ސަންގު ޓީވީއަށް ދެއްވި އިންޓަވިއުއެއްގައި ޔާމީން ވިދާޅުވީ ރިޔާސީ އިންތިހާބެއް ކާމިޔާބު ކުރެވޭވަރަށް ވޯޓު ނުލިބޭނެކަން މުއިއްޒު މިހާރު ގަބޫލުކުރައްވަނީ ދިމާވެފައިވާ ދަތިތަކުން އަރައިގަނެ ދެ އަހަރު ތެރޭގައި ސަރުކާރަށް ތާއީދު ނުހޯދޭނެތީ ކަމަށެވެ.
"ޖެނެރަލީ ފީލްވޭ މި ހުރިހާ ދައްޗަކާއި އަދި މި ދަތިތަކުން އަރައިގަތުމުގައި އެއްވެސް ކަހަލަ ފޯމިއުލާއެއް ސަރުކާރުގައި ނެތީމަ، ރައްޔިތުންގެ ތާއީދެއް އިތުރުވެގެން ދާނެ ކަމަކަށް ބާކީ އޮތް ދެ އަހަރެއްހާ ދުވަހުގެ ތެރޭގައި އިތުރުވެގެންދާނެ ކަމަކަށް ގަބޫލެއް ނުކުރެވޭ،" ޔާމީން ވިދާޅުވި އެވެ.
"އެހެންވީމަ ހަމަ ގަބޫލުކުރެވެނީ ރައީސް މުއިއްޒުވެސް ގަބޫލުކުރައްވާނެއޭ ހަމަ ރިޔާސީ އިންތިހާބެއް ކާމިޔާބުކުރެއްވޭވަރާ ކައިރިއަށްވެސް ރައީސް މުއިއްޒަށް ވޯޓު ލިބިވަޑައި ނުގަންނަވާނެކަން މުއިއްޒު ގަބޫލުކުރައްވާނެ މިހާރު."
ޔާމީން ވިދާޅުވީ ދިމާވެގެން އުޅޭ ދަތިތަކުން އަރައިގަތުމުގެ ގާބިލުކަން ސަރުކާރުގެ ނެތް ކަމަށާއި އެއާއެކު ރައްޔިތުން ތިބީ މާޔޫސްވެފައި ކަމަށެވެ. އެއާއެކު މުއިއްޒަށް ތާއީދު އޮތްކަން ވެސް އެމަނިކުފާނު ގަބޫލުނުކުރައްވާނެ ކަމަށް ޔާމީން ވިދާޅުވި އެވެ.
ރައްޔިތުންގެ މެދުގައި ނެގި ފެންނަ ނުފެންނަ ވޯޓުގައިވެސް މުޅި ސަރުކާރު އެއްކޮށް ނުކުމެ ވަކި ގޮތަކަށް ވޯޓުދޭން ބާރުއެޅިއިރު ރައްޔިތުން ވޯޓުލި ގޮތާއި މޭޔަރު އިންތިހާބު ސަރުކާރަށް ގެއްލުމުން ދައްކުވައިދެނީ ސަރުކާރަށް ތާއީދު ނެތްކަން ކަމަށް ޔާމީން ފާހަގަކުރެއްވި އެވެ.
ކުރިއަށް އޮތް ރީޔާސީ އިންތިހާބުގައި ވާދަކުރައްވާނެކަން ޔާމީން އިއުލާންކުރައްވާފައިވާއިރު، މުއިއްޒުވެސް ދެވަނަ ދައުރަކަށް ކުރިމަތިލައްވާކަން ވަނީ އިއުލާން ކުރައްވާފަ އެވެ. ނިމިދިޔަ ރިޔާސީ އިންތިހާބުގައި މުއިއްޒު ވާދަކުރެއްވީ އެ އިންތިހާބުގައި ޔާމީނަށް ކުރިމަތިލެއްވޭނެ މަގު ބަންދުވުމުން އެމަނިކުފާނުގެ ބަދަލުގަ އެވެ.
