ވެރިކަންކުރާ ޕީއެންސީގެ ނައިބުރައީސުން ހޮވަން މިއަދު ބޭއްވި އިންތިހާބުގައި ރައީސުލްޖުމްހޫރިއްޔާ މުހައްމަދު މުއިއްޒުގެ ކޮއްކޮ ފާތިމަތު ސައުދާ ފަހަތަށް ޖައްސައިލުމަށްފަހު އެންމެ ގިނަ ވޯޓު، ޔޫތު މިނިސްޓަރު އަބްދުﷲ ރާފިއު ހޯއްދަވައިފި އެވެ.
މިއަދު ކުރިއަށް ގެންދިޔަ އެ އިންތިހާބުގައި ސައުދާއަށްވުރެ ގިނައިން ދެ ބޭފުޅަކު ވޯޓު ހޯއްދެވި އެވެ. ރާފިއުގެ އިތުރުން، ސައުދާއަށްވުރެ ގިނަ ވޯޓު ހޯއްދެވީ އަހުމަދު ޝިޔާމް އެވެ.
އެ އިންތިހާބުގައި ވޯޓު ދިން 1095 މީހުންގެ ތެރެއިން ސައުދާއަށް ލިބިވަޑައިގެންނެވީ 923 ވޯޓެވެ. އެ އިންތިހާބުގައި އެންމެ ގިނަ ވޯޓު ހޯއްދެވި ރާފިއުއަށް ލިބިވަޑައިގެންނެވީ 968 ވޯޓެވެ. ދެވަނައަށް އެންމެ ގިނަ ވޯޓު ލިބިވަޑައިގެންނެވި ފިޝަރީޒް މިނިސްޓަރު، އަހުމަދު ޝިޔާމުއަށް 964 ވޯޓު ލިބިވަޑައިގެންނެވި އެވެ.
އެ އިންތިހާބުން ނާކާމިިޔާބުވެވަޑައިގެންނެވީ މާފަންނު މެދު ދާއިރާގެ މެންބަރު، އަސްމާ ރަޝީދު އާއި އެލްޖީއޭގެ ސީއީއޯ، މުހައްމަދު ނިމާލް އެވެ. އަސްމާއަށް ލިބިވަޑައިގެންނެވީ 288 މީހުންނެވެ. ނިމާލްއަށް ވޯޓުދެއްވީ 301 މީހުންނެވެ.
ޕީއެންސީ ނައިބު ރައީސުންގެ އިންތިހާބު
| Label | Value |
|---|---|
| އަބްދުﷲ ރާފިއު | 968 |
| އަހުމަދު ޝިޔާމް | 964 |
| ފާތިމަތު ސައުދާ | 923 |
| އިބްރާހިމް ސުޖާއު | 862 |
| މުހައްމަދު ހުސައިން ޝަރީފް | 780 |
| އަސްމާ ރަޝީދު | 288 |
| މުހައްމަދު ނިމާލް | 301 |
| މުހައްމަދު ސައީދު | 833 |
މި އިންތިހާބުގައި ވޯޓުލުން ކުރިއަށް ގެންގޮސްފައި މޯބައިލް އެޕްލިކޭޝަނެއް ބޭނުންކޮށްގެންނެވެ. މެންބަރުން ވޯޓުލާންޖެހެނީ ކިއުއާރް ކޯޑެއް ސްކޭންކޮށްގެންނެވެ. އަދި ވޯޓުލުމަށް ދީފައި ވަނީ ފަސް މިނެޓުގެ ވަގުތުކޮޅެކެވެ.
ވޯޓު ނިމުމުން ކުޑަ ވަގުތުކޮޅެއްގެ ތެރޭގައި ނަތީޖާ ވަނީ އިއުލާނުކޮށްފަ އެވެ. ނަތީޖާ އިއުލާންކޮށްދެއްވީ ޕީއެންސީގެ އިންތިހާބު ކޮމިޓީގެ ފަރާތުން ފުއާދު ތައުފީގެވެ.
މިއަދު ކުރިއަށްދާ އިންތިހާބުތަކަށްފަހު ޕާޓީ ބައިބައިނުވެ އެކަތިގަނޑެއްގެ ގޮތުގައި ކުރިއަށްދާން ރައީސް މުހައްމަދު މުއިއްޒު ވަނީ ރޭ އިލްތިމާސްކޮށްފަ އެވެ.
