އިދިކޮޅު މޯލްޑިވިއަން ޑިމޮކްރެޓިކް ޕާޓީ އިން އޯގަސްޓު 12، ގައި ވެރި ރަށް މާލޭގައި މުޒާހަރާ ކުރަން ނިންމައިފި އެވެ.
"ކަޅު ހުކުރު" ގެ ގޮތުގައި މަޝްހޫރުވެފައިވާ އޯގަސްޓު 12، ގައި މުޒާހަރާއެއް ބާއްވަން ނިންމާފައިވާކަން އިއުލާނު ކުރެއްވީ އެމްޑީޕީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު އެވެ.
އެމްޑީޕީ އިން މިރޭ ބޭއްވި ގައުމީ މަޖިލީހުގެ ޖަލްސާއެއްގައި ވާހަކަ ދައްކަވަމުން ނަޝީދު ވިދާޅުވީ، މުޒާހަރާ ކުރުމުގެ ބޭނުމަކީ ތަކެތީގެ އަގު އުފުލުމާއި ރައްޔިތުންނަށް ދިމަވާ އެހެނިހެން ދަތިތަކާ ގުޅިގެން އަޑު އުފުލުން ކަމަށެވެ.
"ކަޅު ހުކުރު ދުވަހާ ގުޅުވައި މުޒާހަރާއެއް ރާވާއިރުގައި އަޅުގަނޑުމެން މި ރާވަނީ ތަކެތީގެ އަގު ބޮޑުވުމާއި ޑޮލަރުގެ އަގު މައްޗަށް ދިޔުމާއި ގޭބީސީތަކަށް، އާއިލާތަކަށް ޖުމްލަކޮށް މި ކުރިމަތިވަމުން އަންނަ ދަތިތަކާ ގުޅޭ ގޮތުން އަޅުގަނޑުމެން އަޑު އުފުލަން ކަމުގެ ނިޔަތުގައި،" ނަޝީދު ވިދާޅުވި އެވެ.
ރައީސް މުހައްމަދު މުއިއްޒުގެ ވެރިކަމުގައި ތަކެތީގެ އަގު ވަނީ ވަރަށް ބޮޑަށް އުފުލިފަ އެވެ. ސަރުކާރުން އާންމު ތަފާސްހިސާބުތަކަށް ބަލާއިރު، އަހަރެއްގެ ތެރޭގައި އަސާސީ ކާބޯތަކެތީގެ އަގު ވަނީ އަށް ޕަސެންޓު އުފުލިފަ އެވެ.
ސްޓެޓިސްޓިކްސް ބިއުރޯއިން ނެރޭ އެސެންޝަން ކޮމޮޑިޓީސް ޕްރައިސް އިންޑެކްސް އިން ދައްކާ ގޮތުގައި އަހަރެއްގެ ތެރޭގައި އެންމެ ބޮޑުވީ ގޭހާއި ތެލުންނެވެ. ކާބޯތަކެއްޗާއި ބެވެރޭޖާސް އާއި ރީތިވާ ސާމާނުގެ އަގުތައް ވެސް ވަނީ އުފުލިފަ އެވެ.
އޭގެ އިތުރުން، ޑޮލަރުގެ ހަރަދު މަދު ނުކުރުމާއި ޑޮލަރުން ލިބޭ އާމްދަނީ އެކަށީގެންވާ މިންވަރަކަށް އިތުރުނުވާތީ ޑޮލަރުގެ އަގު ވެސް ވަނީ ވަރަށް ބޮޑުތަން އުފުލިފަ އެވެ. މިވަގުތު ޑޮލަރެއް ގަންނަން ލިބެނި 21.70 ރުފިޔާއަށެވެ.
