އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ކޮންގްރެސް ސެޕްޓެމްބަރު 19، ގައި ބާއްވަނީ އެ ޕާޓީގެ ގައުމީ މަޖިލީހުން މިރޭ ފާސްކޮށްފި އެވެ.
ސެޕްޓެމްބަރު 19، އެމްޑީޕީގެ ކޮންގްރެސް ބާއްވަން ހުށަހެޅުއްވީ ގައުމީ މަޖިލީހުގެ ރިޔާސަތުގައި އިންނެވި އެ ޕާޓީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު އެވެ.
ނަޝީދުގެ ހުށަހެޅުން ފާސްވީ 52 ވޯޓާއެކު އެވެ. މިރޭގެ ޖަލްސާއަށް 63 މެންބަރުން ވަޑައިގެންނެވި އެވެ.
"19 ސެޕްޓެމްބަރުގައި ކޮންގްރެސް ބާއްވާފަ ވެސް ގައުމީ މަޖިލީހުގެ އިންތިހާބު ބާއްވާކަށް ލަހެއް ނުވާނެ. ގައުމީ މަޖިލީސް ދަންމާލަކަށް ވެސް ނޫޅެން. ގައުމީ މަޖިލީހުގެ ދައުރު ހަމަވާއިރަށް އިންތިހާބު ބޭއްވޭނެ،" ނަޝީދު ވިދާޅުވި އެވެ.
އެމްޑީޕީގެ ކޮންގްރެސްއަކީ ގޮފިތަކާއި އެހެނިގެން މުހިންމު ހުރިހާ ގުނަވަނެއް ހިމެނޭ ގޮތަށް އެކުލެވިގެންވާ ޕާޓީގެ އެންމެ އިސް ގުނަވަނެވެ. އެންމެ މަދުވެގެން ކޮންމެ ފަސް އަހަރަކުން އެއްފަހަރު ކޮންގްރެސްގެ ބައްދަލުވުމެއް ބާއްވަންޖެހެ އެވެ.
ކޮންގްރެސްގެ ޒިންމާއަކީ ޕާޓީގެ ސިޔާސަތުތައް އެކަށައެޅުމާއި އަސާސީ ގަވާއިދު އިސްލާހު ކުރުމާއި ޕާޓީ އުވާލުމެވެ.
އެމްޑީޕީގެ ކޮންގްރެސް ސެޕްޓެމްބަރަށް ތާވަލުކޮށްފައިވާއިރު، އެ ބައްދަލުވުމުގައި އެމްޑީޕީގެ ގައުމީ މަޖިލީހަށް ބަދަލުތަކެއް ގެންނަން ވަނީ މަޝްވަރާ ކުރެވިފަ އެވެ. އޭގެ ތެރޭގައި އިންތިހާބަކާ ނުލާ ގައިމީ މަޖިލީހަށް އެއްވެސް މެންބަރަކު އައްޔަން ނުކުރެވޭ ގޮތަށް އިސްލާހެއް ގެނައުން ހިމެނެ އެވެ.
އެމްޑީޕީ އިން ކޮންގްރެސް ބާއްވަން ތައްޔާރުވަމުން އަންނައިރު ވެރިކަން ހިންގާ ޕީޕަލްސް ނެޝަނަލް ކޮންގްރެސްގެ، ޕާޓީ ކޮންގްރެސް ވެސް ބާއްވަން އަންނަނީ ތައްޔާރުވަމުންނެވެ. އެ ކޮންގްރެސްގައި ޕާޓީގެ ނައިބު ލީޑަރުންގެ މަގާމަށް ހަ ބޭފުޅަކު އިންތިހާބު ކުރާނެ އެވެ.
